ଆନନ୍ଦପୁର,୨୪।୭(ସ୍ବ.ପ୍ର.) : କେନ୍ଦୁଝର ଜିଲା ଆନନ୍ଦପୁର ପୌରପରିଷଦ ଫକୀରପୁର ଗ୍ରାମରେ ଗତ ୧୬ ତାରିଖ ମଙ୍ଗଳବାର ଜଣେ ଯୁବକଙ୍କ ମୃତ୍ୟୁ ଘଟିଥିବା ନେଇ ଚର୍ଚ୍ଚା ଜୋର ଧରିଥିଲା। ମୃତକ ହେଉଛନ୍ତି ଫକୀରପୁର ଗ୍ରାମର କାଶୀନାଥ ଦାଶଙ୍କ ପୁଅ ମଣ୍ଟୁଣି ଦାଶ ଓରଫ ଦୀପକ ରଞ୍ଜନ ଦାଶ(୩୫)। ଏହି ଘଟଣାରେ ମଣ୍ଟୁଣିଙ୍କ ବାପା କାଶୀନାଥ ପୁଅକୁ ଶ୍ୱଶୁର ଘର ଲୋକେ ହତ୍ୟା କରିଥିବା ନେଇ ଆନନ୍ଦପୁର ଥାନାରେ ଲିଖିତ ଅଭିଯୋଗ କରିଥିଲେ। କେସ୍ ନଂ ୧୨୯/୧୯ରେ ଘଟଣାର ତଦନ୍ତକାରୀ ଅଧିକାରୀ ଏସଆଇ ଦିଲେଶ୍ୱର ରାଉତ ଭଦ୍ରକ ଥାନା ତଦନ୍ତରେ ଯାଇ ସିସିଟିଭି ଫୁଟେଜ୍ ସଂଗ୍ରହ କରିବା ସହିତ ଆବଶ୍ୟକ ତଥ୍ୟ ହାସଲ କରିଛନ୍ତି। ଭଦ୍ରକ ପୋଲିସ ଦ୍ୱାରା ମଣ୍ଟୁଣିଙ୍କ ଉପରେ ହୋଇଥିବା ମାଡ଼ ଘଟଣାକୁ ଖଣ୍ଡନ କରିଛି ଆନନ୍ଦପୁର ପୋଲିସ। ପୋଲିସ ତଦନ୍ତ ପ୍ରକ୍ରିୟାର ଅଗ୍ରଗତି ଅନୁସାରେ ମୃତ ମଣ୍ଟୁଣିଙ୍କ ପରିବାର କରିଥିବା ହତ୍ୟା ଅଭିଯୋଗକୁ ପୋଲିସ ପରୋକ୍ଷରେ ଅସ୍ବୀକାର କରିଛି। ଅଧିକ ତଦନ୍ତ ଚାଲୁ ରହିଥିବା ଆନନ୍ଦପୁର ଆଇଆଇସି ଗଗନ ବିହାରୀ ବିଶ୍ୱାଳ ସୂଚନା ଦେଇଥିବାବେଳେ ଅତ୍ୟଧିକ ମଦ୍ୟପାନ କିମ୍ବା ଆତ୍ମହତ୍ୟା ଅନ୍ୟ କାରଣ ହୋଇପାରେ ବୋଲି କହିଛନ୍ତି। ତେବେ ମୃତ ମଣ୍ଟୁଣିଙ୍କ ଗ୍ରାମ ଫକୀରପୁରରେ ସ୍ଥାନୀୟ ଲୋକେ ବଡ଼ ଶ୍ୱଶୁର ପୂର୍ଣ୍ଣଚନ୍ଦ୍ର ପତିଙ୍କୁ କାନଧରି ଆଣ୍ଠେଇ ଦେବା ଓ ମାଡ଼ମାରିବା ଭିଡିଓ ଭାଇରାଲ ହୋଇଥିଲେ ବି ଏନେଇ କୌଣସି ଅଭିଯୋଗ ହୋଇ ନ ଥିବା ଥାନାଧିକାରୀ ବିଶ୍ୱାଳ ସୂଚନା ଦେଇଛନ୍ତି।