ଫନୀକୁ ନେଇ ନିର୍ମିତ ‘ମର୍ସି ଅଫ୍ ଗଡ୍’ : ଆମେରିକାରେ ୬ ପୁରସ୍କାର ଜିତିଲା ଅମର୍ତ୍ତ୍ୟଙ୍କ ଫିଲ୍ମ
05 ଭୁବନେଶ୍ୱର,୧୪ା୧୦(ବ୍ୟୁରୋ) : ଜାତୀୟ ଓ ଅନ୍ତର୍ଜାତୀୟସ୍ତରରେ ଖ୍ୟାତି ଅର୍ଜନ କରିଥିବା ଫିଲ୍ମ ନିର୍ମାତା ଅମର୍ତ୍ତ୍ୟ ଭଟ୍ଟାଚାର୍ଯ୍ୟ ପୁଣିଥରେ ଓଡ଼ିଶା ଏବଂ ଓଡ଼ିଆ ଫିଲ୍ମକୁ ବିଶ୍ୱସ୍ତରୀୟ ମଞ୍ଚରେ ପହଞ୍ଚାଇଛନ୍ତି। ନିକଟରେ ଓଡ଼ିଶାରେ ହୋଇଥିବା ପ୍ରଳୟଙ୍କରୀ ବାତ୍ୟା ‘ଫନୀ’ ଉପରେ ତାଙ୍କ ନିର୍ମିତ ଫିଲ୍ମ ‘ମର୍ସି ଅଫ୍ ଗଡ୍’ ଯୁକ୍ତରାଷ୍ଟ୍ର ଆମେରିକାର ନ୍ୟୁ ଜର୍ସିରେ ଅନୁଷ୍ଠିତ ଦ୍ୱାଦଶ ‘ନୋହୁ ଇଣ୍ଟରନ୍ୟାଶନାଲ ଶର୍ଟ ଫିଲ୍ମ ଫେଷ୍ଟିଭାଲ ୨୦୧୯’ରେ ପ୍ରଦର୍ଶିତ ହୋଇଛି। ଏଥିସହ ବିଭିନ୍ନ ବିଭାଗରେ ୬ ଗୁରୁତ୍ୱପୂର୍ଣ୍ଣ ପୁରସ୍କାର ଜିତିବାରେ ସଫଳ ହୋଇଛି। ଶ୍ରେଷ୍ଠ ଚଳଚ୍ଚିତ୍ର ପୁରସ୍କାର ସହ ଶ୍ରେଷ୍ଠ ନିର୍ଦ୍ଦେଶକ, ଶ୍ରେଷ୍ଠ ସଙ୍ଗୀତ, ଶ୍ରେଷ୍ଠ ଚଳଚ୍ଚିତ୍ର ସମ୍ପାଦନା, ଶ୍ରେଷ୍ଠ ସିନେମାଟୋଗ୍ରାଫି ସହ ପ୍ରଯୋଜନା ବିଭାଗରେ ମଧ୍ୟ ଶ୍ରେଷ୍ଠ ପୁରସ୍କାର ପାଇଛି। ଅକ୍ଟୋବର ୧୧ରେ ଅନୁଷ୍ଠିତ ହୋଇଥିବା ଏହି ଫିଲ୍ମ ଫେଷ୍ଟିଭାଲରେ ବିଶ୍ୱର ମୋଟ ୮ଟି ଫିଲ୍ମ ପ୍ରଦର୍ଶିତ ହୋଇଥିବାବେଳେ ‘ମର୍ସି ଅଫ୍ ଗଡ୍’ ଏକମାତ୍ର ଭାରତୀୟ ଫିଲ୍ମଭାବେ ଏଠାରେ ପ୍ରଦର୍ଶିତ ହେବାକୁ ମନୋନୀତ ହୋଇଥିଲା।
ମେ’ ୩ରେ ଓଡ଼ିଶା ଅତିକ୍ରମ କରିଥିବା ବାତ୍ୟା ଫନୀ ରାଜ୍ୟର ୧୧ଜିଲାରେ ବ୍ୟାପକ କ୍ଷୟକ୍ଷତି ଘଟାଇଥିଲା। ବିଶେଷକରି ପୁରୀ, ଖୋର୍ଦ୍ଧା, କଟକ ଆଦି ଜିଲାକୁ ଧ୍ୱଂସବିଧ୍ୱଂସ କରିଦେବା ସହ ଚାରିଆଡେ ହାହାକାର ସ୍ଥିତି ସୃଷ୍ଟି କରିଥିଲା। ସ୍ବାଭାବିକ ସ୍ଥିତିକୁ ଫେରିବାକୁ ମାସ ମାସ ସମୟ ଲାଗିଯାଇଥିବାବେଳେ ମୁଣ୍ଡ ଗୁଞ୍ଜିବାକୁ ନା ଲୋକଙ୍କ ମୁଣ୍ଡଉପରେ ଛାତ ଥିଲା ନା ପାଖରେ ଅର୍ଥ ଥିଲା। ଏହି ସମୟରେ ବାତ୍ୟା ପ୍ରଭାବିତ ବିଭିନ୍ନ ଅଞ୍ଚଳ ବୁଲି ତାହାକୁ ନିଜ କ୍ୟାମେରା ଲେନ୍ସରେ ତୋଳିବା ସହ ଫିଲ୍ମର ରୂପ ଦେଇ ବିଶ୍ୱ ନଜରକୁ ଆଣିବାକୁ ଚେଷ୍ଟା କରିଥିଲେ ଅମର୍ତ୍ତ୍ୟ। ‘ମର୍ସି ଅଫ୍ ଗଡ୍’କୁ ଅମର୍ତ୍ତ୍ୟ ବାତ୍ୟା ପ୍ରଭାବିତ ଅଞ୍ଚଳର ଲୋକଙ୍କ ଉଦ୍ଦେଶ୍ୟରେ ଅର୍ପଣ କରିଥିବାବେଳେ ୟୁ ଟ୍ୟୁବ୍ରେ ରିଲିଜ ହୋଇ ଏହା ବିଭିନ୍ନ ସ୍ତରରେ ପ୍ରଶଂସିତ ହୋଇଥିଲା। ଏନେଇ ଅମର୍ତ୍ତ୍ୟ କୁହନ୍ତି, ଫିଲ୍ମଟି ଗୋଟିଏ କି ଦୁଇଟି ନୁହେଁ, ବରଂ ଫିଲ୍ମ ମେକିଂର ଗୁରୁତ୍ୱପୂର୍ଣ୍ଣ ବିଭାଗଗୁଡ଼ିକରେ ଏହା ପୁରସ୍କୃତ ହୋଇଥିବାରୁ ଖୁସି ଲାଗୁଛି। କୌଣସି ଅତ୍ୟାଧୁନିକ ଉପକରଣ ବ୍ୟବହାର ନ ହୋଇ ମଧ୍ୟ ସିନେମାଟୋଗ୍ରାଫି, ଏଡିଟିଂ ଭଳି ଟେକ୍ନିକାଲ ବିଭାଗରେ ପୁରସ୍କୃତ ହେବା ଆମ ପାଇଁ ଗର୍ବର ବିଷୟ ବୋଲି ସେ କହିଛନ୍ତି।