ଭୁବନେଶ୍ୱର,୧୫।୬(ବ୍ୟୁରୋ): ‘ଏମ୍.ଏସ୍. ଧୋନୀ’ ଫିଲ୍ମରେ ନିଖୁଣ ଅଭିନୟ କରି ଦର୍ଶକଙ୍କ ହୃଦୟ ଜିତିଥିବା ଯୁବ ଅଭିନେତା ସୁଶାନ୍ତ ସିଂ ରାଜପୁତ ଆଉ ନାହାନ୍ତି। ହେଲେ ତାଙ୍କୁ ଆଜି ସମସ୍ତେ ଝୁରୁଛନ୍ତି। ରିଲ୍ ଲାଇଫରେ ଜଣେ ସାଦାସିଧା ଯୁବକଭାବେ ଅଧିକାଂଶ ଫିଲ୍ମରେ ନଜରକୁ ଆସିଥିବା ସୁଶାନ୍ତ ରିୟଲ ଲାଇଫ୍ରେ ମଧ୍ୟ ବେଶ୍ ଶାନ୍ତ, ସରଳ ଓ ପରୋପକାରୀ ଥିଲେ। ଓଡ଼ିଶା ପ୍ରତି ତାଙ୍କର ରହିଥିବା ମହାନୁଭବତାକୁ ଓଡ଼ିଶାବାସୀ ମନେପକାଉଛନ୍ତି। ୨୦୧୯ ମେ’ ୩ରେ ଓଡ଼ିଶାକୁ ଧ୍ୱସ୍ତବିଧ୍ୱସ୍ତ କରିଦେଇଥିବା ପ୍ରଳୟଙ୍କରୀ ବାତ୍ୟା ‘ଫନୀ’ ପରେ ଓଡ଼ିଶାକୁ ଏଭଳି ଏକ ବଡ଼ ବିପତ୍ତିର ଆମେ ଓଡ଼ିଶାକୁ ରକ୍ଷା କରିବାକୁ ନିଜ ପ୍ରଶଂସକଙ୍କୁ ଅନୁରୋଧ କରିଥିଲେ। ଇନ୍ଷ୍ଟାଗ୍ରାମରେ ସେ ଲେଖିଥିଲେ, ଓଡ଼ିଶା ଆମକୁ ଏହି ମୁହୂର୍ତ୍ତରେ ଆବଶ୍ୟକ କରୁଛି। ଯେତେଶୀଘ୍ର ସମ୍ଭବ ଆମେ ସେମାନଙ୍କ ନିକଟରେ ପହଞ୍ଚତ୍ବା ଉଚିତ ବୋଲି କହିଥିଲେ। ଓଡ଼ିଶା ମୁଖ୍ୟମନ୍ତ୍ରୀ ରିଲିଫ୍ ଫଣ୍ଡ୍ରେ ଦାନ କରିବାକୁ କହିବାସହ ଏହାର ଲିଙ୍କ୍ ମଧ୍ୟ ଶେୟାର କରିଥିଲେ। ତେବେ ଏହି ‘କେଦାରନାଥ’ ଅଭିନେତା ପୂର୍ବରୁ ମଧ୍ୟ ଅନେକ ସାମାଜିକ ସେବାକାର୍ଯ୍ୟ ସହ ଜଡ଼ିତ ଥିଲେ। କେରଳ ବାତ୍ୟାବେଳେ ମୁଖ୍ୟମନ୍ତ୍ରୀ ରିଲିଫ ଫଣ୍ଡକୁ ୧ କୋଟି ଟଙ୍କା ଦାନ କରିଥିବାବେଳେ ୨୦୧୮ ନାଗାଲାଣ୍ଡ ବାତ୍ୟା ସମୟରେ ୧.୨୫ କୋଟି ଟଙ୍କାର ସହାୟତା ପ୍ରଦାନ କରିଥିଲେ। ସେହିଭଳି ନିଜର ଜଣେ ପ୍ରଶଂସକଙ୍କ ନାମରେ ସେ ୧ କୋଟି ଟଙ୍କା ବିପର୍ଯ୍ୟୟ ପୀଡ଼ିତଙ୍କ ପାଇଁ ଦେଇଥିଲେ, ଯାହା ତାଙ୍କ ମହାନତା ଓ ସେବା ମନୋବୃତ୍ତିକୁ ପ୍ରମାଣିତ କରିଥିଲେ।