ଢେଙ୍କାନାଳ ଅଫିସ,୨୪।୬: ଢେଙ୍କାନାଳ ସହର ଗଣେଶ ବଜାରରେ ଥିବା ଫରେଷ୍ଟ କଲୋନୀରେ ବୁଧବାର ସକାଳେ ବିସ୍ଫୋରଣ ଘଟିଛି। ଏଥିରେ ଜାଣେ ଗୁରୁତର ହୋଇଛନ୍ତି। ସେ ହେଲେ ହାତୀ ସ୍କ୍ବାଡ୍ କର୍ମଚାରୀ ସୁଜିତ୍ କୁମାର ସାମଲ।
ପ୍ରକାଶ ଯେ, ଫରେଷ୍ଟ କଲୋନୀର ଏକ ଷ୍ଟୋର ଘରେ ହାତି ଘଉଡ଼ାଇବା ପାଇଁ ବୋମା ରଖାଯାଇଥିଲା। ଏହି ବୋମା ବିସ୍ଫୋରଣ ଘଟି ଷ୍ଟୋର ଘର ଛାତ ଉଡିଯାଇଛି। ଏଥିରେ ହାତୀ ସ୍କ୍ବାଡ୍ କର୍ମଚାରୀ ସୁଜିତ୍ ଗୁରୁତର ହୋଇଛନ୍ତି। ଚିକିତ୍ସା ପାଇଁ ତାଙ୍କୁ ପ୍ରଥମେ ଜିଲା ମୁଖ୍ୟ ଚିକିତ୍ସାଳୟ ଓ ପରେ କଟକ ସ୍ଥାନାନ୍ତର କରାଯାଇଛି। ଖବର ପାଇଁ ଅଗ୍ନିଶମ କର୍ମଚାରୀ ପହଞ୍ଚି ଉଦ୍ଧାର କାର୍ଯ୍ୟ କରିଥିଲେ। ଟାଉନ ଥାନା ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ବୋମା ଫିଟିବାର କାରଣ ସମ୍ପର୍କରେ ତଦନ୍ତ ଜାରି ରଖିଛନ୍ତି।