ନୂଆଦିଲ୍ଲୀ, ୨୫ା୬ (ପି.ଟି.)-ଆସନ୍ତା ଅଷ୍ଟ୍ରିଆ ଓ ସିଲଭରଷ୍ଟୋନ୍ ରାଉଣ୍ଡ ପାଇଁ ଏଫ୍ଆଇଏ ଫର୍ମୁଲା-୨ ଗ୍ରୀଡ୍କୁ ସାମୟିକ ଫେରିବେ ଯୁବ ଭାରତୀୟ ରେସର ଅର୍ଜୁନ ମାଇନି। ମଙ୍ଗଳବାର ସେ ଏହା ଘୋଷଣା କରିଛନ୍ତି। ଗତବର୍ଷ ଫର୍ମୁଲା ୨ରେ ନୈରାଶ୍ୟଜନକ ପ୍ରଦର୍ଶନ ପରେ ଅର୍ଜୁନ ସ୍ପୋର୍ଟ କାର୍ ରେସିଂରେ ଯୋଗଦେବାକୁ ନିଷ୍ପତ୍ତି ନେଇଥିଲେ। ବାରମ୍ବାର କାର୍ ସମସ୍ୟା ଯୋଗୁ ଟ୍ରାଇଡେଣ୍ଟ ତରଫରୁ ପ୍ରତିନିଧିତ୍ୱ କରି ସେ ଚାମ୍ପିୟନଶିପ୍ରେ ୨୪ ପଏଣ୍ଟ ସହ ୧୬ତମ ସ୍ଥାନରେ ରହିଥିଲେ। ଏଥିରେ ସେ ଅସନ୍ତୁଷ୍ଟ ଥିଲେ। ୨୧ ବର୍ଷୀୟ ଏହି ଡ୍ରାଇଭର ବର୍ତ୍ତମାନ ୨୦୧୯ ୟୁରୋପିଆନ ଲି ମାନ୍ସ ସିରିଜର ମଧ୍ୟ ଭାଗରେ ଅଛନ୍ତି। ଫର୍ମୁଲା ୨ରୁ ଦୁଇଟି ରାଉଣ୍ଡରେ ଅଂଶଗ୍ରହଣ ଦ୍ୱାରା ସ୍ପୋଟର୍ସ କାର୍ ରେସିଂ ପାଇଁ ସେ ଦେଇଥିବା ପ୍ରତିଶ୍ରୁତିର ଖିଲାପ ହେଉ ନାହିଁ। ଚଳିତ ମାସ ପ୍ରାରମ୍ଭରେ କରୁଣ ଚାଣ୍ଡୋକଙ୍କ ପରେ ଦ୍ୱିତୀୟ ଭାରତୀୟ ଭାବେ ଅର୍ଜୁନ ଆଇକନିକ ୨୪ ଆଓ୍ବାର୍ସ ଅଫ୍ ଲି’ ମାନ୍ସରେ ଭାଗ ନେବାର ସୌଭାଗ୍ୟ ଲାଭ କରିଛନ୍ତି। ସ୍ପୋଟର୍ସ କାର୍ ରେସିଂରେ ଅପ୍ରତ୍ୟାଶିତ ଭାବେ ଯୋଗ ଦେଇଥିଲେ ମଧ୍ୟ ଫର୍ମୁଲା ଓ୍ବାନ ଫର୍ମୁଲା ୨ ଭଳି ଫିଡର ସିରିଜକୁ ସେ ଅଗ୍ରାଧିକାର ଦେବେ ବୋଲି କହିଛନ୍ତି। ଅର୍ଜୁନ ବର୍ତ୍ତମାନ କ୍ୟାମ୍ପସ ରେସିଂରେ ରେନଲ୍ଟ ଫର୍ମୁଲା ଓ୍ବାନ ଜୁନିୟର ଏଟ୍କେନଙ୍କ ଟିମ୍ମେଟ ହେବେ। ସ୍ପାନିଶ ମୋଟର ରେସିଂ ଟିମ୍ କ୍ୟାମ୍ପସ ରେସିଂ ବର୍ତ୍ତମାନ ୧୧୫ ପଏଣ୍ଟ ସହ ଷ୍ଟାଣ୍ଡିଂରେ ଚତୁର୍ଥ ସ୍ଥାନରେ ରହିଛି।