ବାରିପଦା ଅଫିସ, ୧୮ା୩- ବାରିପଦାର ସହରରେ ଥିବା ୭ଟି ବନ୍ଧର ଉନ୍ନତିକରଣ ଓ ସୌନ୍ଦର୍ଯ୍ୟକରଣ ପାଇଁ ୧୨ ଫେବୃୟାରୀ ୨୦୧୯ରେ ଭିିତ୍ତିପ୍ରସ୍ଥର ସ୍ଥାପନ ହୋଇଥିଲା। ଭିତ୍ତିପ୍ରସ୍ଥର ସ୍ଥାପନ ହେବାର ବର୍ଷେ ବିତି ଯାଇଥିଲେ ମଧ୍ୟ ଏ ପର୍ଯ୍ୟନ୍ତ କାଣିଚାଏ କାମ ହୋଇ ପାରି ନାହିଁ।
ଉଲ୍ଲେଖଯୋଗ୍ୟ, ସହରରେ ଥିବା ଝିଞ୍ଜିିରି ବନ୍ଧ, ବଡ଼ ପୋଖରୀ, ଚାପଲପୋଖରୀ, ହେମସାଗର ପୋଖରୀ, ଷ୍ଟେଶନ ବନ୍ଧ, ମାତା ପୋଖରୀ, ୧୫ ନମ୍ବର ୱାର୍ଡ଼ର ଏକ ପୋଖରୀ ଆଦି ୭ଟି ପୋଖରୀର ଉନ୍ନତିକରଣ ଓ ସୌନ୍ଦର୍ଯ୍ୟକରଣ ପାଇଁ ଶିଳାନ୍ୟାସ ହୋଇଥିଲା। ତତ୍କାଳୀନ ଉପବାଚସ୍ପତି ସାନନ୍ଦ ମାର୍ଣ୍ଡିଙ୍କ ସମେତ ବାରିପଦା ପୌରପରିଷଦର ପାରିଷଦମାନେ ଉପସ୍ଥିତ ରହି ଶିଳାନ୍ୟାସ କରିଥିଲେ। ତେବେ ଶିଳାନ୍ୟାସର ବର୍ଷେ ପରେ ମଧ୍ୟ କାର୍ଯ୍ୟ ନ ହେବା ପଛରେ ରାଜନୀତିର ବାସ୍ନା ବାରି ହୋଇ ପଡ଼ୁଛି। ଚର୍ଚ୍ଚା ହେଉଛି ଯେ, ୧୨ ତାରିଖରେ ପୌରପରିଷଦର ନିର୍ବାଚିତ ପ୍ରତିନିଧିଙ୍କ କାର୍ଯ୍ୟକଳାପର ଶେଷ ଦିବସ ଥିବାରୁ ତରବରିଆ ଭାବେ ଏହି ଉନ୍ନୟନ କାର୍ଯ୍ୟଗୁଡିକର ଶିଳାନ୍ୟାସ ହୋଇଥିଲା। ସେହିଭଳି ଆଗକୁ ସାଧାରଣ ନିର୍ବାଚନ ଥିବାରୁ ସହରର ଭୋଟରମାନଙ୍କୁ ମନେଇବା ପାଇଁ ଏପରି କରାଯାଇଥିଲା। ହେଲେ ଏବେ ଏହିି କାର୍ଯ୍ୟ ପାଇଁ କେହି ମନ ଦେଉ ନାହାନ୍ତିି। ଅନ୍ୟପକ୍ଷେ ପୌର ପରିଷଦ ଭାଙ୍ଗିବା ପୂର୍ବରୁ ଉକ୍ତ କାର୍ଯ୍ୟର ପ୍ରସ୍ତାବ ଓ ଡିପିଆର (ଡିଟେଲ ପ୍ରୋଜେକ୍ଟ୍ର ରିପୋର୍ଟ) ବିଭାଗକୁ ଦିଆଯାଇଥିଲା। ଅର୍ଥ ମଧ୍ୟ ମଞ୍ଜୁର ହୋଇଛି, ହେଲେ ପୌରପରିଷଦ କାର୍ଯ୍ୟ କରୁ ନ ଥିବା ଅଭିଯୋଗ ହେଉଛି। ଏ ନେଇ ପୌରପରିଷଦ ନିର୍ବାହୀ ଅଧିକାରୀ ସରୋଜ କୁମାର ଦାସଙ୍କୁ ପଚାରିବାରୁ ସରକାରଙ୍କ ପକ୍ଷରୁ କାମ ମଞ୍ଜୁର ହୋଇଛି। ବର୍ତ୍ତମାନ ଟଙ୍କା ଯୋଗାଡ଼ ଚାଲିଛି, ଟଙ୍କା ହେଲେ ଟେଣ୍ଡର ଡକାଯାଇ କାମ ହେବ ବୋଲି ସେ କହିଥିଲେ।