ନୂଆଗାଁ,୮।୬(ଡି.ଏନ.ଏ.): ନୟାଗଡ ଜିଲା ନୂଆଗାଁ ବ୍ଲକ ଦୁର୍ଦ୍ଦୁରା ପଞ୍ଚାୟତ ବନମାଳୀପୁର ହରିଜନସାହି ଲୋକଙ୍କ ଯାତାୟାତରେ ବାଧକ ସାଜିଛି ଶୂଳିଆ ନାଳ। ଏହି ନାଳ ଉପରେ ପୋଲ ନିର୍ମାଣ ପାଇଁ ଗ୍ରାମବାସୀ ଦୀର୍ଘବର୍ଷରୁ ଦାବି କରି ଆସୁଥିବାବେଳେ ଗତ ୫ବର୍ଷ ତଳେ ତତ୍କାଳୀନ ଏମପି ଭିତ୍ତିପ୍ରସ୍ତର ସ୍ଥାପନ କରିଥିଲେ। ହେଲେ ଆଜି ପର୍ଯ୍ୟନ୍ତ ପୋଲ ନିର୍ମାଣ କାର୍ଯ୍ୟ ଆରମ୍ଭ ହେଲା ନାହିଁ। ଭିତ୍ତିପ୍ରସ୍ତର ସ୍ଥାପନର ଏକ ଫଳକ ଏବେ ମୂକସାକ୍ଷୀ ହୋଇରହିଛି।
ଦ୍ରକାଶ ଯେ, ନୟାଗଡ ଜିଲା ନୂଆଗାଁ ବ୍ଲକ ଦୁର୍ଦ୍ଦୁରା ପଞ୍ଚାୟତ ବନମାଳୀପୁର ହରିଜନ ସାହିରେ ୨୦ ପରିବାର ବସବାସ କରୁଛନ୍ତି । ସେମାନେ ଯେ କୌଣସି କାମରେ ମୁଖ୍ୟ ରାସ୍ତାକୁ ଯିବାକୁ ହେଲେ ସାହି ମୁଣ୍ଡରେ ଥିତ୍ବା ଶୂଳିଆ ନଦୀ ପାର ହୋଇ ଯିବାକୁ ପଡିଥାଏ । ଏପରିକି ଛୋଟ ପିଲାମାନେ ବନମାଳୀପୁର ଅଙ୍ଗନଓ୍ବାଡି କେନ୍ଦ୍ରକୁ ଯିବାକୁ ହେଉ କିମ୍ବା ଅନ୍ୟ ପିଲାମାନେ ସ୍କୁଲ କଲେଜକୁ ଯିବାକୁ ହେଉ ଶୂଳିଆ ନଦୀ ପାର ହେବାକୁ ପଡିଥାଏ। ସେହିପରି କିଏ ରୋଗରେ ପଡିଲେ ଚିକିତ୍ସା ପାଇଁ ଡାକ୍ତରଖାନା କିମ୍ବା ସଉଦା ଆଣିବା ପାଇଁ ଦୋକାନକୁ ଯିବାକୁ ହେଲେ ଶୂଳିଆ ନଦୀ ପାର ହୋଇ ଯାଇଥାନ୍ତି। ଲୋକମାନେ ଖରାଦିନେ କଷ୍ଟେମଷ୍ଟେ ନଦୀ ପାର ହୋଇ ଯାଉଥିବାବେଳେ ଅଳ୍ପ ବର୍ଷା ହେଲେ କିମ୍ବା ବର୍ଷା ଦିନେ ତାହା ସମ୍ଭବ ହୋଇ ନ ଥାଏ। ନଦୀରେ ପାଣି ଭର୍ତ୍ତି ହୋଇଯିବାରୁ ପିଲାଙ୍କ ପାଠପଢା, ଡାକ୍ତରଖାନା ଯିବା, ବଜାର ସଉଦା ଆଦି କରିବା ବନ୍ଦ ହୋଇଯାଏ। ଏପରି ଅସୁବିଧାରେ ରହୁଥିବା ଲୋକମାନେ ଶୂଳିଆ ନଦୀରେ ପୋଲଟିଏ ନିର୍ମାଣ କରିବା ପାଇଁ ବିଭିନ୍ନ ଅଧିକାରୀଙ୍କଠାରୁ ଆରମ୍ଭ କରି ରାଜନେତାମାନଙ୍କୁ ଗୁହାରି କରି ନିରାଶ ହେବା ପରେ ଗ୍ରାମବାସୀ ଏକତ୍ରିତ ହୋଇ ତତ୍କାଳୀନ କନ୍ଧମାଳ ଏମପି ରୁଦ୍ରମାଧବ ରାୟଙ୍କୁ ଜଣାଇଥିଲେ । ବନମାଳୀପୁର ହରିଜନସାହି ଲୋକଙ୍କ ପାଇଁ ଶୂଳିଆ ନଦୀରେ ପୋଲ ନିର୍ମାଣ ନିହାତି ଆବଶ୍ୟକ ଅନୁଭବ କରି ଏମପି ରାୟ ୨୦୧୪ ଜାନୁୟାରୀ ୧ ତାରିଖରେ ନଦୀ କୂଳରେ ଶୂଳିଆ ନାଳ ପୋଲର ଭିତ୍ତିପ୍ରସ୍ତର ସ୍ଥାପନ କରିଥିଲେ। ଏ ନେଇ ଏକ ଫଳକ ନିର୍ମାଣ କରାଯାଇଥିଲା। ଯେଉଁଥିରେ କି କନ୍ଧମାଳ ଏମପିଙ୍କ ନାମ ସହ ତତ୍କାଳୀନ ନୂଆଗାଁ ବ୍ଲକ ଚେୟାରମ୍ୟାନ , ଉପାଧ୍ୟକ୍ଷ, ବିଡିଓ, ସରପଞ୍ଚଙ୍କ ନାମ ଉଲ୍ଲେଖ କରାଯାଇଥିଲା । କିନ୍ତୁ ଭିତ୍ତିପ୍ରସ୍ତର ସ୍ଥାପନର ୫ ବର୍ଷ ବିତିଯାଇଥିଲେ ମଧ୍ୟ ସେଠାରେ ପୋଲ ନିର୍ମାଣ ହୋଇ ପାରିଲା ନାହିଁ । ଲୋକମାନେ କଷ୍ଟରେ ନଦୀ ପାର ହେଉଥିବାବେଳେ ନଦୀ ମୁହାଣରେ ରହି ଫଳକ କେବଳ ଉପହାସ କରୁଥିବା ଭଳି ମନେ ହେଉଥିବା କହିଛନ୍ତି ବନମାଳୀପୁର ହରିଜନସାହିର ସୁଧାଂଶୁ ନାୟକ,ପଙ୍କଜ ନାୟକ,ଦୀପକ ନାୟକ ପ୍ରମୋଦ ନାୟକ,ପ୍ରଫୁଲ ନାୟକ ପ୍ରମୁଖ। ବନମାଳୀପୁର ଲୋକଙ୍କ ସୁବିଧା ଦୃଷ୍ଟିରୁ ଶୂଳିଆ ନାଳରେ ପୋଲ ନିର୍ମାଣ ବାବଦରେ ନୂଆଗାଁ ବିଡିଓ ଶିରିୟାଲ ଏସ ପଟେଲଙ୍କୁ ପଚାରିବାରେ ସେ କୁହନ୍ତି, ମୁଁ ସେ ବିଷୟରେ କିଛି ଜାଣିନି କିମ୍ବା ସେ ନେଇ କୌଣସି ଅଭିଯୋଗ ବି ଆସିନି । ମୁଁ ତଦନ୍ତ କରିବି, ଯଦି ଆବଶ୍ୟକ ଥିବ ତେବେ କିଭଳି ପୋଲ ନିର୍ମାଣ ହୋଇ ପାରିବ ଚେଷ୍ଟା କରିବି ।