ଝୁମ୍ପୁରା ୧୪।୧୦(ଡି.ଏନ.ଏ.)-କେନ୍ଦୁଝର ଜିଲା, ଚମ୍ପୁଆ ରେଞ୍ଜ ଅନ୍ତର୍ଗତ ବାଲିବନ୍ଧ ଫରେଷ୍ଟ ସେକସନର ଗ୍ରାମାଞ୍ଚଳରେ ରବିବାର ବିଳମ୍ବିତ ରାତିରେ ପୁଣି ହାତୀପଲ ପଶି ଆସିଛନ୍ତି। ହାତୀପଲ ୨ଟି ଦଳରେ ବିଭକ୍ତ ହୋଇଥିବାବେଳେ, ବନ ବିଭାଗର ସୂଚନା ଅନୁଯାୟୀ ଗୋଟିଏ ଦଳରେ ୨୩ ହାତୀ ଏବଂ ଅନ୍ୟ ଦଳରେ ୧୮ହାତୀ ରହିଛନ୍ତି। ସୂଚନା ଅନୁଯାୟୀ ୧୮ସଂଖ୍ୟା ଥିବା ହାତୀପଲ ନୟାଗଡ ପଞ୍ଚାୟତର ବାମନଡିହା ଜଙ୍ଗଲରେ ରହିଥିବାବେଳେ, ୨୩ଟିକିଆ ହାତୀପଲ ଚଉଠିଆ ପଞ୍ଚାୟତର ମଣନ୍ଦା ଜଙ୍ଗଲରେ ରହିଛନ୍ତି। ହାତୀପଲ ପଶି ଆସିଥିବାରୁ ଗ୍ରାମବାସୀ ତଥା ଚାଷୀମାନେ ଭୟଭୀତ ଅବସ୍ଥାରେ ଅଛନ୍ତି। ହାତୀପଲ ଫସଲ ଉଜାଡିବା ସହିତ ଘର ଭଙ୍ଗୁଛନ୍ତି। ୧୮ସଂଖ୍ୟା ଥିବା ହାତୀପଲର କ୍ଷୟକ୍ଷତି ସମ୍ପର୍କରେ ଜଣା ପଡିନାହିଁ। ଏହି ୨୩ଟିକିଆ ହାତୀ ପଲ ବ୍ୟାପକ ଫସଲ କ୍ଷୟକ୍ଷତି କରିବା ସହିତ ମଣନ୍ଦା ଗ୍ରାମ ଜାମୁଡି ସାହିରେ ପୂର୍ଣ୍ଣଚନ୍ଦ୍ର ମୁଣ୍ଡା, ଲଗେନ ମୁଣ୍ଡା, କଇଁ ବେଣ୍ଟକାର, ରତ୍ନା ବେଣ୍ଟକାରଙ୍କର ଘର ଭାଙ୍ଗିଛନ୍ତି। ଘର ଭାଙ୍ଗି ହାତୀପଲ ଧାନ, ଚାଉଳ ଖାଇଛନ୍ତି। ହାତୀ ଆକ୍ରମଣରୁ ଉକ୍ତ ୪ଟି ପରିବାରର ସଦସ୍ୟ ଅଳ୍ପକେ ରକ୍ଷା ପାଇଯାଇଛନ୍ତି। ଜଙ୍ଗଲ ପାର୍ଶ୍ୱରେ ବନ କର୍ମଚାରୀ ହାତୀ ପଲକୁ ଜଗି ରହିଛନ୍ତି। ବାଲିବନ୍ଧ ଫରେଷ୍ଟର ଖଗେଶ୍ୱର ବାରିକ କହିଲେ, କ୍ଷୟକ୍ଷତିର ରିପୋର୍ଟ ଖୁବ ଶୀଘ୍ର ରେଞ୍ଜ ଅଫିସକୁ ଦିଆଯିବ।