ଭଦ୍ରକ ଅଫିସ,୧୭।୧୨: ପ୍ରଥମେ ପ୍ରେମ ପରେ ବିବାହର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ, ତା’ ପରେ ଧୋକା। ଏଭଳି ଏକ ଅଭାବନୀୟ ଘଟଣାକ୍ରମରେ ଭଦ୍ରକ ଥାନା ଅଞ୍ଚଳର ଜଣେ କନ୍ଷ୍ଟେବଳ ମଙ୍ଗଳବାର ଗିରଫ ହୋଇଛନ୍ତି। ଗିରଫ କନ୍ଷ୍ଟେବଳ ହେଲେ ଜଗତ୍ପତି ହାଁସଦା। ବିବାହର ପ୍ରତିଶ୍ରୁତି ଦେଇ ହାଁସଦା ଜଣେ ମହିଳା କନ୍ଷ୍ଟେବଳଙ୍କ ସହ ଶାରୀରିକ ସମ୍ପର୍କ ରଖିଥିବା ଅଭିଯୋଗ ହୋଇଛି। ସୋମବାର ମହିଳାଜଣକ ଥାନାରେ ଅଭିଯୋଗ କରିବା ପରେ ପୋଲିସ କେସ୍(ନଂ. ୩୮୫/୧୯)ରେ ଏକ ମାମଲା ରୁଜୁକରି ହାଁସଦାଙ୍କୁ ଗିରଫ କରି ଡାକ୍ତରୀ ପରୀକ୍ଷା କରାଇଥିଲା। ଏଥିସହ ତାଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଥିବା ଜଣାପଡ଼ିଛି।
ସୂଚନାନୁଯାୟୀ, ହାଁସଦା ତଳ ବ୍ୟାଚର ଜଣେ ମହିଳା କନ୍ଷ୍ଟେବଳଙ୍କୁ ପ୍ରେମ କରୁଥିଲେ। ପରେ ବିବାହ ପାଇଁ ରାଜି ନ ହେବାରୁ କନ୍ଷ୍ଟବଳ ଏନେଇ ଭଦ୍ରକ ଟାଉନ ଥାନାରେ ଏତଲା ଦେଇଥିଲେ । ବିବାହ ପାଇଁ ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିଥିବା ନେଇ ସେ ଅଭିଯୋଗ କରିଥିଲେ। ଏ ନେଇ ଗିରଫ କନ୍ଷ୍ଟେବଳ କହିଛନ୍ତି, ସେ ବିବାହ ପାଇଁ ପ୍ରସ୍ତୁତ, ମାତ୍ର ପୋଲିସ କ’ଣ କରୁଛି ସେ ଜାଣି ନାହାନ୍ତି ।