ଚଣ୍ଡିଖୋଲ,୧୧।୪(ଡି.ଏନ.ଏ)- ଯାଜପୁର ଜିଲା ବଡଚଣା ବ୍ଲକ ବଡବାଲିକୁଦା ପଞ୍ଚାୟତରେ ରାଜ୍ୟ ଓ ରାଜ୍ୟ ବାହାରର ଶ୍ରମିକ ଲକଡାଉନ ପାଇଁ ଫସି ରହିଛନ୍ତି। କରୋନା ପାଇଁ ଲକଡାଉନ ଘୋଷଣା ହେବା ଯୋଗୁ ଏମାନେ ନିଜ ରାଜ୍ୟ ଓ ଜିଲାକୁ ଯାଇପାରି ନାହାନ୍ତି। ପଞ୍ଚାୟତର ସ୍କୁଲ ବାରଣ୍ଡା, ବିଭିନ୍ନ ଦୋକାନ ବାରଣ୍ଡାରେ ସେମାନେ ଅତି ଦୟନୀୟ ଭାବେ ରହୁଛନ୍ତି। ତେବେ ଏହି ଶ୍ରମିକଙ୍କ ମଧ୍ୟରୁ ୬୦ ପ୍ରତିଶତ ହେଉଛନ୍ତି ମହିଳା। ବଡଚଣା ବ୍ଲକ ଅନ୍ତର୍ଗତ ସାଉଡିଆ, ନିଆଳି, ବରପଦା, ବଡବାଲିକୁଦା ଆଦି ଅନେକ ପଞ୍ଚାୟତରେ ବ୍ୟାପକ ଭାବେ ବଦାମ ଚାଷ କରାଯାଏ। ବାଦାମ ଅମଳ ସମୟରେ ଅଧିକ ଶ୍ରମିକଙ୍କ ଆବଶ୍ୟକ ପଡ଼ୁଥିବାରୁ କିଛି ବର୍ଷ ହେବ କେନ୍ଦୁଝର, ମୟୁରଭଞ୍ଜ ଓ ପଶ୍ଚିମବଙ୍ଗରୁ ଶ୍ରମିକମାନେ ଆସି ଏହି ପଞ୍ଚାୟତଗୁଡିକରେ କାର୍ଯ୍ୟ କରିଥାନ୍ତି। ଚଳିତ ବର୍ଷ କେନ୍ଦୁଝର, ମୟୁରଭଞ୍ଜ ଓ ପଶ୍ଚିମବଙ୍ଗରୁ ୧୫୦ରୁ ଊର୍ଦ୍ଧ୍ୱ ଶ୍ରମିକ ଆସିଥିଲାବେଳେ ସେମାନଙ୍କ ମଧ୍ୟରୁ କେତେଜଣ ଲକଡାଉନ ପୂର୍ବରୁ ନିଜ ଅଞ୍ଚଳକୁ ଫେରି ଯାଇଥିବାବେଳେ ବାକି ୧୦୦ରୁ ଊର୍ଦ୍ଧ୍ୱ ଶ୍ରମିକ ଏବେ ବି ଫସି ରହିଛନ୍ତି। ଏମାନେ ଏବେ ଏହି ସବୁ ପଞ୍ଚାୟତର ଦୋକାନ ଗୃହ ବାରଣ୍ଡା, ସ୍କୁଲ ବାରଣ୍ଡାରେ ଅତ୍ୟନ୍ତ ଦୟନୀୟ ଜୀବନ ବିତାଉଛନ୍ତି। ଯାହା ସଞ୍ଚିତ ଅର୍ଥ ଥିଲା ତାହା ସରିଗଲାଣି। ପାଖରେ ଖାଦ୍ୟ ନ ଥିବାରୁ ସେମାନେ ସହୟତା ପାଇଁ ନିବେଦନ କରିଛନ୍ତି।