ରୂପ୍ସା,୧୩।୮(ଡି.ଏନ.ଏ.)-ବାଲେଶ୍ୱର ସଦର ଥାନା ଅନ୍ତର୍ଗତ ନଗ୍ରମ ସ୍କୁଲଛକଠାରେ ସୋମବାର ଏକ ଫାଇନାନ୍ସ କମ୍ପାନୀର କର୍ମଚାରୀଙ୍କଠାରୁ ୧ଲକ୍ଷ ୧୮ହଜାର ଟଙ୍କା ଲୁଟ୍ ହୋଇଥିବା ଅଭିଯୋଗ ହୋଇଛି। ଏ ସଂକ୍ରାନ୍ତରେ ପୋଲିସ ଏକ ମାମଲା (ନଂ. ୨୫୭/୧୯) ରୁଜୁକରି ତଦନ୍ତ ଜାରି ରଖିଛି। ତେବେ କର୍ମଚାରୀ ଜଣକ ଏହି ଅର୍ଥ ହଡ଼ପ କରିବା ପାଇଁ ସୁପରିକଳ୍ପିତ ଯୋଜନା କରିଥିବା ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି ବୋଲି ତଦନ୍ତ ଅଧିକାରୀ ହଳଦୀପଦା ଫାଣ୍ଡି ଅଧିକାରୀ ବଦ୍ରିଶଙ୍କର ଷଣ୍ଢ ପ୍ରକାଶ କରିଛନ୍ତି।
ଖୋର୍ଦ୍ଧା ଅଞ୍ଚଳର ପୂର୍ଣ୍ଣଚନ୍ଦ୍ର ମାର୍ଥା ଭାରତ ଫାଇନାନ୍ସ କମ୍ପାନୀରେ ଚାକିରି କରନ୍ତି। ସେ ସୋମବାର ନଗ୍ରମ ଗ୍ରାମକୁ ଯାଇ ମହିଳା ଗୋଷ୍ଠୀଙ୍କଠାରୁ ଋଣ ଓ ମାସିକିଆ କିସ୍ତି ଆଦାୟ କରିଥିଲେ। ଆଦାୟ ପଇସା ନେଇ ବାଲେଶ୍ୱର କାର୍ଯ୍ୟାଳୟକୁ ଜମା କରିବା ପାଇଁ ଯିବା ସମୟରେ ୩ଜଣ ଦୁର୍ବୃତ୍ତ ମାରଣାସ୍ତ୍ର ଦେଖାଇ ତାଙ୍କଠାରୁ ୧ଲକ୍ଷ ୧୮ହଜାର ଟଙ୍କା ଲୁଟ୍ କରି ଚମ୍ପଟ ମାରିଥିବା ସେ ଫାଣ୍ଡିରେ ଅଭିଯୋଗ କରିଥିଲେ। ଘଟଣା ଘଟିଥିଲା ଅପରାହ୍ନ ଗୋଟାଏ ୫ ମିନିଟ୍ରେ। କିନ୍ତୁ ପୂର୍ଣ୍ଣଚନ୍ଦ୍ର ଦିନ ଗୋଟାଏ ୪ ମିନିଟ୍ ସମୟରେ ତାଙ୍କ ଫାଇନାନ୍ସ ଅଫିସ୍କୁ ଫୋନ୍ ଯୋଗେ ଲୁଟ୍ ସମ୍ପର୍କରେ ଅବଗତ କରାଇଥିବା ପୋଲିସ ତଦନ୍ତରୁ ଜାଣିପାରିଛି। ଅପରପକ୍ଷରେ ଗାଁ ସ୍କୁଲ ଛକଠାରେ ଏହି ଘଟଣା ଘଟିଥିଲେ ହେଁ ପୂର୍ଣ୍ଣଚନ୍ଦ୍ର ସେଠାରେ କୌଣସି ଚିତ୍କାର କରି ନ ଥିଲେ କି ଉପସ୍ଥିତ ଗ୍ରାମବାସୀଙ୍କୁ ଏନେଇ କିଛି କହି ନ ଥିଲେ ବୋଲି ଫାଣ୍ଡି ଅଧିକାରୀ ଷଣ୍ଢ ସୂଚନା ଦେଇଛନ୍ତି। ବରଂ ସେ ଦିନ ଗୋଟାଏ ୪୧ମିନିଟ୍ରେ ଫାଣ୍ଡିରେ ପହଞ୍ଚତ୍ ଲିଖିତ ଅଭିଯୋଗ କରିଥିବାରୁ ଲୁଟ୍ ଘଟଣା ନେଇ ପୋଲିସ ସନ୍ଦେହ ପ୍ରକଟ କରିଛି। ତେବେ ପ୍ରକୃତ ଘଟଣାର ସତ୍ୟାସତ୍ୟ ଜାଣିବା ପାଇଁ ପୋଲିସ ପକ୍ଷରୁ ଛାନଭିନ୍ ଆରମ୍ଭ କରିଛି।