ବ୍ୟାଙ୍କକ୍,୩।୮(ପି.ଟି.)- ସାତ୍ୱିକସାଇରାଜ ରାଙ୍କୀରେଡ୍ଡୀ ଓ ଚିରାଗ ଶେଟ୍ଟି ଶନିବାର ଥାଇଲାଣ୍ଡ ଓପନ ବ୍ୟାଡ୍ମିଣ୍ଟନ ଟୁର୍ନାମେଣ୍ଟର ପୁରୁଷ ଡବଲ୍ସ ବର୍ଗର ଫାଇନାଲରେ ପ୍ରବେଶ କରିଛନ୍ତି। ଫଳରେ ପ୍ରଥମ ଭାରତୀୟ ଯୋଡ଼ି ଭାବେ ରାଙ୍କୀରେଡ୍ଡୀ ଓ ଶେଟ୍ଟିଙ୍କ ଯୋଡ଼ି ବିଡବ୍ଲ୍ୟୁଏଫ୍ ସୁପର ୫୦୦ ଟୁର୍ନାମେଣ୍ଟ ଫାଇନାଲରେ ସ୍ଥାନ ପାଇଛି। ବିଶ୍ୱର ୧୬ତମ ର଼୍ୟାଙ୍କ୍ ଭାରତୀୟ ଯୋଡ଼ି ୨୨-୨୦, ୨୨-୨୪, ୨୧-୯ ଗେମ୍ରେ ୧୯ତମ ର଼୍ୟାଙ୍କ କୋରିଆନ ସୁଙ୍ଗ୍ ହ୍ୟୁନ ଓ ଶିନ ବେକ ଚେଓଲଙ୍କୁ ହରାଇ ଦେଇଛନ୍ତି। ଏହି ବିଜୟ ଲାଗି ରାଙ୍କୀରେଡ୍ଡୀ ଓ ଶେଟ୍ଟିଙ୍କୁ ଏକଘଣ୍ଟା ୩ ମିନିଟ୍ ଧରି କଡ଼ା ସଂଘର୍ଷର ସମ୍ମୁଖୀନ ହେବାକୁ ପଡ଼ିଥିଲା। ରାଜ୍ୟଗୋଷ୍ଠୀ କ୍ରୀଡ଼ାର ରୌପ୍ୟ ପଦକ ବିଜେତା ଯୋଡ଼ି ଚଳିତ ବର୍ଷ ପ୍ରଥମ ଥର କୌଣସି ଟୁର୍ନାମେଣ୍ଟ ଟାଇଟଲ ମୁକାବିଲାରେ ସ୍ଥାନ ପକ୍କା କରିଛନ୍ତିି। ଅଣସିଡ୍ ଭାରତୀୟ ଯୋଡ଼ି ଚାଇନାର ଲି ଜୁନ୍ ହୁଇ ଓ ଲିଉ ୟୁ ଚେନ୍ଙ୍କୁ ଫାଇନାଲରେ ଭେଟିବେ।