ଜାକର୍ତ୍ତା,୨୦।୭(ପି.ଟି.)- ଅଲିମ୍ପିକ୍ ରୌପ୍ୟ ପଦକଧାରୀ ପି. ଭି. ସିନ୍ଧୁ ଏଠାରେ ଚାଲିଥିବା ଇଣ୍ଡୋନେସିଆ ଓପନ ବିଡବ୍ଲ୍ୟୁଏଫ୍ ଟୁର୍ ସୁପର ୧୦୦୦ ଟୁର୍ନାମେଣ୍ଟର ଫାଇନାଲରେ ପ୍ରବେଶ କରିଛନ୍ତି। ଶନିବାର ଅନୁଷ୍ଠିତ ସେମିଫାଇନାଲରେ ହାଇଦ୍ରାବାଦ ଖେଳାଳି ଅଲ ଇଂଲଣ୍ଡ ଚାମ୍ପିୟନ ଚାଇନାର ଚେନ ୟୁଫେଇଙ୍କୁ ହରାଇ ଦେଇଛନ୍ତି। ଚଳିତ ସିଜନରେ ଫର୍ମ ସହ ସଂଘର୍ଷ କରୁଥିବା ସିନ୍ଧୁ ୨୧-୧୯, ୨୧-୧୦ ଗେମ୍ରେ ମ୍ୟାଚ୍ ଜିତି ନେଇଛନ୍ତି। ଚଳିତ ବର୍ଷ ଅଷ୍ଟ୍ରେଲିଆ, ସୁଇସ ଓ ଅଲ୍ ଇଂଲଣ୍ଡ ଟୁର୍ନାମେଣ୍ଟ ଜିତିଥିବା ଚେନ ପ୍ରଥମ ଗେମ୍ରେ ସିନ୍ଧୁଙ୍କୁ କଡ଼ା ଚ୍ୟାଲେଞ୍ଜ ଦେଇଥିଲେ। ବହୁବାର ଉଭୟ ଖେଳାଳିଙ୍କ ପଏଣ୍ଟ ବରାବର ରହିଥିଲା। ହେଲେ ସିନ୍ଧୁ ପ୍ରଥମ ଗେମ୍ ଜିତିବା ପରେ ଦ୍ୱିତୀୟରେ ଚାଇନିଜ ଖେଳାଳିଙ୍କୁ ଫେରିବାକୁ ସୁଯୋଗ ଦେଇ ନ ଥିଲେ। ବିଜୟ ସହ ବିଶ୍ୱର ୫ମ ର଼୍ୟାଙ୍କ ଭାରତୀୟ ଖେଳାଳି ଚଳିତ ସିଜନରେ ପ୍ରଥମ ଥର ପାଇଁ କୌଣସି ଟୁର୍ନାମେଣ୍ଟର ଫାଇନାଲକୁ ଉନ୍ନୀତ ହୋଇଛନ୍ତି। ସିନ୍ଧୁ ଓ ଜାପାନର ୪ର୍ଥ ସିଡ୍ ଆକାନେ ୟାମାଗୁଚିଙ୍କ ମଧ୍ୟରେ ଫାଇନାଲ ମୁକାବିଲା ହେବ। ଏଥିପୂର୍ବରୁ ଦୁଇ ଶଟଲର ପରସ୍ପରକୁ ୧୪ଥର ଭେଟି ସାରିଛନ୍ତି। ଏଥିରେ ସିନ୍ଧୁ ୧୦-୪ରେ ଆଗୁଆ ଅଛନ୍ତି। ଅନ୍ତିମ ୪ ମ୍ୟାଚ୍ରେ ମଧ୍ୟ ସିନ୍ଧୁ ବିଜୟୀ ହୋଇଛନ୍ତି। ଏଭଳି ରେକର୍ଡ ସତ୍ତ୍ୱେ ସିନ୍ଧୁଙ୍କୁ ଫାଇନାଲ ଲଢ଼େଇ ପାଇଁ ପ୍ରସ୍ତୁତ ରହିବାକୁ ପଡ଼ିବ।