ଭଦ୍ରକ ଅଫିସ, ୪ା୩- ସରକାରଙ୍କ ଗେଜେଟ୍ ନୋଟିଫିକେସନ୍କୁ ଇତି ମଧ୍ୟରେ ୩ ବର୍ଷ ପୂରିଲା, ହେଲେ ଭଦ୍ରକ ମାଷ୍ଟର ପ୍ଲାନ ଭିତ୍ତିରେ ଆଶାତୀତ କାର୍ଯ୍ୟକାରୀ ହୋଇ ପାରିଲାନି। ଯୋଜନା କାର୍ଯ୍ୟକାରୀ ହେବା ଦୂରେ ଥାଉ ଯୋଜନାର ଅଗ୍ରଗତିକୁ ନେଇ ଏବେ ଅନ୍ଧାରରେ ସହରବାସୀ। ଟାଉନ ପ୍ଲାନିଂ ମୁତାବକ ସହର ଅବ୍ୟବସ୍ଥିତ ହୋଇ ରହିଛି। ବସ୍ଷ୍ଟାଣ୍ଡଟି ଅସ୍ଥାୟୀ ଭାବେ ବନ୍ତଛକରେ କାର୍ଯ୍ୟ କରୁଛି। ସେହିଭଳି ଅନେକ ସମସ୍ୟା ରହିଛି। ଆଗାମୀ ୨୦ ବର୍ଷକୁ ଦୃଷ୍ଟିରେ ରଖି ଗତ ୨୦୧୩ ରେ ରାଜ୍ୟ ସରକାର ଭଦ୍ରକ ମାଷ୍ଟରପ୍ଲାନ ପ୍ରସ୍ତୁତି ପ୍ରକ୍ରିୟା ଆରମ୍ଭ କରିଥିଲେ। ଭଦ୍ରକ ପୌରପାଳିକାର ୩୦ଟି ୱାର୍ଡ଼ର ୨୬ଟି ରାଜସ୍ବ ଗ୍ରାମ ଏବଂ ପୌରପାଳିକା ସଂଲଗ୍ନ ୨୪ଟି ରାଜସ୍ବ ଗ୍ରାମର ମୋଟ ୧ ଲକ୍ଷ ୫୨ ହଜାର ୫୩୬ ବର୍ଗ କି.ମି ନେଇ ଏହି ମାଷ୍ଟରପ୍ଲାନର ପରିକଳ୍ପନା କରାଯାଇଥିଲା। ପ୍ଲାନ ପ୍ରସ୍ତୁତି ନିମନ୍ତେ ହରିୟାନା ଗୁରୁଗାଓଁ ସ୍ଥିତ ଏମ୍ଏସ୍ ଫିଡବ୍ୟାକ୍ ଇନଫ୍ରା ପ୍ରାଇଭେଟ୍ ଲିମିଟେଡ଼ କମ୍ପାନୀଙ୍କୁ ଦାୟିତ୍ୱ ଦିଆଯାଇଥିଲା। ରାଜ୍ୟ ସରକାର ୫୦ ଲକ୍ଷ ଟଙ୍କା ପ୍ଲାନ ପ୍ରସ୍ତୁତିରେ ଖର୍ଚ୍ଚ ମଧ୍ୟ କରିଥିଲେ। ଭୌଗୋଳିକ ସ୍ଥିତି, ପ୍ରାକୃତିକ ସମ୍ବଳ, ଅବସ୍ଥିତି, ଆଞ୍ଚଳିକ ପୃଷ୍ଠଭୂମି ଜଳବାୟୁ ଆଦିକୁ ବିଚାରକୁ ନେଇ ଉପଗ୍ରହ ଛବି ଏବଂ କ୍ଷେତ୍ର ପରିଦର୍ଶନ କରି ଏହା ନକ୍ସା ପ୍ରସ୍ତୁତି କରାଯାଇଥିଲା। ଯୋଜନା ପ୍ରସ୍ତୁତ ପରେ ଷ୍ଟେକ ହୋଲଡର୍ମାନଙ୍କୁ ନେଇ ଏ ବାବଦରେ ଏକାଧିକ କର୍ମଶାଳାମାନ ଅନୁଷ୍ଠିତ କରାଯାଇ ଯୋଜନା ଚୂଡ଼ାନ୍ତ କରାଯାଇଥିଲା। ଯୋଜନାରେ ବସ୍ଷ୍ଟାଣ୍ଡ, ପାର୍କ, ଡାକ୍ତରଖାନା, ବ୍ୟବସ୍ଥିତ ଡ୍ରେନେଜ ଏହିଭଳି ସମସ୍ତ ବ୍ୟବସ୍ଥା ପାଇଁ ପରିକଳ୍ପନା ସ୍ଥାନ ପାଇଥିଲା। ପୌରପାଳିକା ବ୍ୟତୀତ ପଡ଼ୋଶୀ ୧୯ଟି ରାଜସ୍ବ ଗ୍ରାମକୁ ନେଇ ଏଥିରେ ସାମିଲ କରାଯାଇଥିଲା। ଗତ ୨୦୧୭ ଜୁନ ୩୦ ତାରିଖରେ ସରକାରୀ ଗେଜେଟ୍ ନୋଟିଫିକେସନ୍ରେ ପ୍ରକାଶିତ ହୋଇଥିଲା। ଇତିମଧ୍ୟରେ ପାଖାପାଖି ୩ ବର୍ଷ ବିତିବାକୁ ବସିଥିଲେ ମଧ୍ୟ ଯୋଜନା କାର୍ଯ୍ୟକାରୀ ହେବା ନେଇ ନାନା ସନ୍ଦେହ ପ୍ରକାଶ ପାଇଛି। ଗୋଟିଏ ପଟରେ ସରକାର ଗେଜେଟ୍ ନୋଟିଫିକେସନ୍ରେ ଭଦ୍ରକ ମାଷ୍ଟରପ୍ଲାନକୁ ସୀମିତ ରଖିଥିଲେ ମଧ୍ୟ ଏହାର ଅଢ଼ୁଆଳରେ ସହରରେ ଜମିବାଡ଼ି କ୍ରୟ ବିକ୍ରୟ ଉପରେ ଲାଗିଛି କଟକଣା। ମାଷ୍ଟରପ୍ଲାନ ଏରିଆ ଆଳରେ ଜମିର ମୂଲ୍ୟ ଅତ୍ୟଧିକ ବୃଦ୍ଧି ପାଇଥିବା ବେଳେ ଜମିଜମା ରେଜିଷ୍ଟ୍ରେଶନ ମୂଲ୍ୟ ଅହେତୁକ ଭାବେ ବୃଦ୍ଧି ପାଇଛି। ତେଣେ ମାଷ୍ଟରପ୍ଲାନ କାର୍ଯ୍ୟକାରୀ ହେଉନଥିବା ବେଳେ ଅବ୍ୟବସ୍ଥିତ ଭାବେ ସହର କଳେବର ବୃଦ୍ଧିପାଇବାରେ ଲାଗିଛି। ଅପରପକ୍ଷରେ ଭଦ୍ରକ ପୌରପାଳିକା ପାଇଁ ସ୍ବତନ୍ତ୍ର ଟାଉନ ପ୍ଲାନିଂ ଅଧିକାରୀ ନାହାନ୍ତି। ଯିଏ ଅଛନ୍ତି ୪ଟି ସହର ପାଇଁ କାର୍ଯ୍ୟ କରୁଛନ୍ତି। ଭଦ୍ରକ, ବାଲେଶ୍ୱର, ଭୁବନେଶ୍ୱର ଓ କେନ୍ଦୁଝର ପାଇଁ। ଏଣୁ ସମସ୍ୟା ସୃଷ୍ଟି ହେଉଥିବା ଜଣାପଡ଼ିଛି। ଏନେଇ ଭଦ୍ରକ ଟାଉନ ପ୍ଲାନିଂ ଅଧିକାରୀ ପ୍ରଶାନ୍ତ କୁମାର ପରିଡ଼ାଙ୍କୁ ପଚାରିବାରୁ ଗେଜେଟ୍ ନୋଟିଫିକେସନ୍ ପାରିତ ହେବା ପରେ ଜିଲାରେ କାର୍ଯ୍ୟ କରୁଥିବା ସମସ୍ତ ବିଭାଗକୁ ଉକ୍ତ ପ୍ଲାନିଂର ନକଲ ପ୍ରଦାନ କରାଯାଇଛି। ବିଭାଗରେ ଥିବା ବଜେଟ୍ ମୁତାବକ କାର୍ଯ୍ୟ କରିବା ପାଇଁ ନିର୍ଦ୍ଦେଶାନାମା ରହିଛି। ଏଣୁ ବିଭାଗୀୟ ଅଧିକାରୀମାନେ ବଜେଟ ଅର୍ଥକୁ ନେଇ କାମ କରୁଛନ୍ତି। ସହର ପାଇଁ ପ୍ରସ୍ତାବିତ ରିଂ ରୋଡ଼ ନିର୍ମାଣ ଲା ଆବଶ୍ୟକ ଜମି ଚିହ୍ନଟ କରି ଅଧିଗ୍ରହଣ କାର୍ଯ୍ୟ କରିବା ପାଇଁ ନିକଟରେ ଗ୍ରାମ୍ୟ ଉନ୍ନୟନ ବିଭାଗ ଓ ପୂର୍ତ୍ତ ବିଭାଗକୁ ନିର୍ଦ୍ଦେଶାନାମା ଦିଆଯାଇଛି । ଏଣୁ ସହର ପାଇଁ ମାଷ୍ଟରପ୍ଲାନ ହୋଇଛି। ଅର୍ଥ ଅଭାବ ଥିବାରୁ ଏହା କାର୍ଯ୍ୟକାରୀ ହୋଇପାରୁନାହିଁ ବୋଲି ସେ କହିଛନ୍ତି।