ମେଲବୋର୍ନ, ୧୪।୪(ପି.ଟି.)- କୋଭିଡ୍-୧୯ ମହାମାରୀ କାରଣରୁ ଏବେ ସାରା ବିଶ୍ୱର କ୍ରୀଡ଼ା ସ୍ଥାଣୁ ହୋଇଯାଇଛି। କରୋନା ଭାଇରସର ସଂକ୍ରମଣକୁ ରୋକିବା ପାଇଁ ବିଭିନ୍ନ ଦେଶରେ ଲକ୍ଡାଉନ ଜାରି ରହିଛି। ଏପରିସ୍ଥଳେ ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଟି୨୦ ବିଶ୍ୱକପ୍ ଆୟୋଜନ ନେଇ ଆଶଙ୍କା ପ୍ରକାଶ ପାଇଛି। ତେବେ ଫାଙ୍କା ଷ୍ଟାଡିୟମରେ ଟି୨୦ ବିଶ୍ୱକପ୍ ଆୟୋଜନ ବିଚାରକୁ ଅଷ୍ଟ୍ରେଲିଆ ପୂର୍ବତନ ଅଧିନାୟକ ଅଲାନ ବର୍ଡର ନାପସନ୍ଦ କରିଛନ୍ତି। ଶୂନ୍ୟ ଷ୍ଟାଡିୟମରେ ବିଶ୍ୱକପ ଆୟୋଜନ କରିବାନେଇ କଳ୍ପନା ମଧ୍ୟ କରିହେବ ନାହିଁ ବୋଲି ସେ କହିଛନ୍ତି। ଉଲ୍ଲେଖଥାଉ କି, ଏହି ବିଶ୍ୱକପ୍ ଅଷ୍ଟ୍ରେଲିଆରେ ଆସନ୍ତା ଅକ୍ଟୋବର ୧୮ରୁ ଆରମ୍ଭ ହୋଇ ନଭେମ୍ବର ୧୫ ତାରିଖରେ ଶେଷ ହେବାର କାର୍ଯ୍ୟକ୍ରମ ରହିଛି।
କୋଭିଡ୍- ୧୯ କାରଣରୁ ବର୍ତ୍ତମାନ ଅଷ୍ଟ୍ରେଲିଆ ସରକାର ତା’ର ସୀମାକୁ ୬ ମାସ ଅର୍ଥାତ୍ ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ବନ୍ଦ ରଖିଛି। ଅଷ୍ଟ୍ରେଲିଆରେ ଏହି ଭାଇରସ ସଂକ୍ରମଣ ଯୋଗୁ ୬୧ଜଣ ମୃତ୍ୟୁବରଣ କରିଥିବା ବେଳେ ୬୪,୦୦୦ ଲୋକ ସଂକ୍ରମିତ ହୋଇଛନ୍ତି। ଏଭଳି ସ୍ଥିତିରେ ଦର୍ଶକଙ୍କ ଅନୁପସ୍ଥିତିରେ ଫାଙ୍କା ଷ୍ଟାଡିୟମରେ ବିଶ୍ୱକପ୍ ଆୟୋଜନ କରିବାକୁ କ୍ରିକେଟ ଅଷ୍ଟ୍ରେଲିଆ ନିଷ୍ପତ୍ତି ନେଇପାରେ ବୋଲି କଳ୍ପନାଜଳ୍ପନା ପ୍ରକାଶ ପାଇଛି। ତେବେ ଏହା ଗ୍ରହଣୀୟ ନୁହଁ ଓ ଏହା ଚିନ୍ତା କରିବା ଅମୂଳକ ବୋଲି ବର୍ଡର କହିଛନ୍ତି। ଯଦି ଷ୍ଟାଡିୟମକୁ ଦର୍ଶକ ନ ଆସନ୍ତି ତା’ହେଲେ ଏହି ମେଗା ଇଭେଣ୍ଟ ଆୟୋଜନ କଥା ଚିନ୍ତା କରିପାରୁ ନାହିଁ। ତେବେ ଏ ନେଇ କ୍ରିକେଟ ଅଷ୍ଟ୍ରେଲିଆ ତରଫରୁ କିଛି କୁହାଯାଇନାହିଁ। ଏହି ଟୁର୍ନାମେଣ୍ଟକୁ ପୂର୍ବରୁ ଯେଉଁଭଳି ଆୟୋଜିତ ହେଉଥିଲା ଠିକ୍ ସେହିଭଳି ଆୟୋଜନ ହେବା ଉଚିତ। ଯଦି ସମ୍ଭବ ନୁହଁ ତେବେ ଏହାକୁ ବାତିଲ କରିବା ଶ୍ରେୟସ୍କର ହେବ ବୋଲି ୬୪ ବର୍ଷୀୟ ବର୍ଡର କହିଛନ୍ତି।