ବାରଙ୍ଗ,୯।୧୧(ଡି.ଏନ୍.ଏ.)- ଚନ୍ଦକା ଥାନା ଅନ୍ତର୍ଗତ ଏସ୍ଓଜି ନିକଟ ଏକ ଫାର୍ମହାଉସରୁ ଚୋରି ଅଭିଯୋଗରେ ପୋଲିସ ୧୨ ଅଭିଯୁକ୍ତଙ୍କୁ ଗିରଫ କରି ଶନିବାର କୋର୍ଟଚାଲାଣ କରିଛି। ପୋଲିସ ସେମାନଙ୍କଠାରୁ ମୋବାଇଲ ଫୋନ, ଘଣ୍ଟା, ଲାପ୍ଟପ, ୯ ଗ୍ୟାସ ସିଲିଣ୍ଡର ଓ ପାଣିପମ୍ପ ଆଦି ଚୋରି ସାମଗ୍ରୀ ଜବତ କରିଛି। ଏ ସମ୍ପର୍କରେ ପୋଲିସ ଏକ ମାମଲା ନଂ.୧୮୯/୧୯ ରୁଜୁକରି ତଦନ୍ତ ଚଳାଇଛି। ସୂଚନା ମୁତାବକ, ଏସ୍ଓ ନିକଟରେ ବିଜୟ ମହାନ୍ତି ନାମକ ବ୍ୟକ୍ତିଙ୍କ ଏକ ଫାର୍ମହାଉସ ରହିଛି। ଏହି ଫାର୍ମହାଉସରୁ ଗତ ଦୁଇଦିନ ତଳେ ଚୋରି ହୋଇଥିବାର ଚନ୍ଦକା ଥାନାରେ ଅଭିଯୋଗ ହୋଇଥିଲା। ଏ ନେଇ ଥାନାଧିକାରୀ ଦେବେନ୍ଦ୍ର ବିଶ୍ୱାଳ ଘଟଣାର ତଦନ୍ତ ଚଳାଇଥିତ୍ବାବେଳେ ସ୍ଥାନୀୟ ଗ୍ରାମର କେତେଜଣ ଯୁବକ ମିଶି ଚୋରି କରିଥିବାର ଜାଣିବାକୁ ପାଇଥିଲେ। ଶୁକ୍ରବାର କୌଶଳକ୍ରମେ ଦାରୁଠେଙ୍ଗ ପାଟଣା ସାହିର ଶିବ ସାହୁ ଏଥିରେ ସମ୍ପୃକ୍ତ ଥିବା ଜଣାପଡ଼ିଥିବାବେଳେ ସଂଘବଦ୍ଧ ହୋଇ ଏହି ଚୋରି କରିଥିବା ସେ ମାନିଥିଲେ। ଶିବ ମାଧ୍ୟମରେ ଅନ୍ୟ ୬ଜଣ ଦାରୁଠେଙ୍ଗ ନୂଆ ସାହିର ବିଶ୍ୱନାଥ ଦେଉରୀ, ଜେଠୀ ସାହିର ଚନ୍ଦନ ମହାପାତ୍ର ଓ ପିଙ୍କୁ ବେହେରା, ସିମିଳିପାଟଣା ଗ୍ରାମର ବଚନ ନାୟକ ଓ ଆରତ ଜେନା ଏବଂ ଭୁଆଶୁଣି ଗ୍ରାମର ଧୀରେନ୍ଦ୍ର ଦେଉରୀଙ୍କୁ ଧରିବାରେ ସକ୍ଷମ ହୋଇଥିଲେ। ଏହାପରେ ସେମାନେ ଚୋରି ସାମଗ୍ରୀକୁ ଅନ୍ୟ ୫ଜଣଙ୍କୁ ବିକ୍ରି କରିଥିବା ପୋଲିସକୁ କହିଥିଲେ। ରାତିରେ ଚଢ଼ାଉ କରି ଚୋରି ସାମଗ୍ରୀ ରଖିବା ଜେଠି ସାହିର ଚନ୍ଦ୍ରଶେଖର ମାଝି, ପାଟଣା ସାହିର ରମେଶ ସାହୁ, ଭୁଆଶୁଣୀର ଜିତେନ୍ଦ୍ର ପାଟଶାଣୀ, ମହାକାଳପଡ଼ା ଥାନା ଅନ୍ତର୍ଗତ ଜାମ୍ବୁ ଗ୍ରାମର କମଳ ଦାସ ଓ ଆସ୍କା ଥାନା ଅଧୀନ ଭେଟଣୀ ଗ୍ରାମର ଅନିରୁଦ୍ଧ ନାୟକଙ୍କୁ ଗିରଫ କରିଥିଲା।