ନୂଆଦିଲ୍ଲୀ,୨୮।୫: ଦିଲ୍ଲୀର ଜହାଁଗିରପୁରୀରେ ରହୁଥିବା ଜଣେ ଯୁବତୀଙ୍କୁ ନିଜ ଅଫିସରେ ହଙ୍ଗାମା କରିଥିବା ଦେଖିବାକୁ ମିଳିଛି। ସେକ୍ଟର-୧୮ ସ୍ଥିତ ଥିବା ଏକ କନଷ୍ଟ୍ରକସନ୍ କମ୍ପାନୀ ଜିଆର ଇମ୍ଫ୍ରାରେ ଯୁବତୀ ଜଣଙ୍କ କାର୍ଯ୍ୟରତ ଥିଲେ। ଡ୍ରାଫ୍ଟସ୍ମ୍ୟାନ ପଦରେ ୬ ମାସ ପାଇଁ ଟ୍ରେନିଙ୍ଗ ପିରିୟଡରେ ରହିଥିଲେ। ମହିଳାକର୍ମୀଙ୍କ ଦ୍ୱାରା ଗଠିତ ହୋଇଥିବା ହ୍ବାଟସ୍ ଆପ୍ ଗ୍ରୁପରେ ଉକ୍ତ ଯୁବତୀ ଅଫିସର ପରିସ୍ଥିତକୁ ନେଇ ମହିଳାଙ୍କ ପାଇଁ ସୁରକ୍ଷିତ ନୁହେଁ ବୋଲି ମ୍ୟାସେଜ କରିଥିଲେ। ଏହି ମ୍ୟାସେଜ କେଉଁଭଳି ଭାବେ କମ୍ପାନୀର ମ୍ୟାନେଜମେଣ୍ଟ ପାଖରେ ପହଞ୍ଚିଥିଲା। ମ୍ୟାନେଜର ଓ ଅନ୍ୟ ଅଫିସରଙ୍କ ସହ ଏକ ମିଟିଙ୍ଗ କରାଯାଇ ଯୁବତୀଙ୍କୁ ଇସ୍ତଫା ଦେବାକୁ କୁହାଯାଇଥିଲା। ଏଥିସହ ଏହି ଟ୍ରେନିଂ ପିରିୟଡରେ ତାଙ୍କର କାର୍ଯ୍ୟଶୈଳି ଭଲ ନାହିଁ ଏବଂ ମ୍ୟାସେଜ ଡିଲିଟ କରି କ୍ଷମା ପ୍ରାର୍ଥନା କରନ୍ତୁ ବୋଲି ମ୍ୟାନେଜମେଣ୍ଟ କହିଥିଲା। ଏହି କାର୍ଯ୍ୟାନୁଷ୍ଠାନରୁ ଯୁବତୀ ଜଣକ ଚିନ୍ତାଗ୍ରସ୍ତ ହୋଇ କମ୍ପାନୀର ୪ମହଲାକୁ ଚଢ଼ିଯାଇଥିଲେ। ଛାତରୁ ଡେଇଁ ଆତ୍ମହତ୍ୟା କରିବା ପାଇଁ ଧମକ ଦେଇଥିଲେ। ଘଟଣାସ୍ଥଳରେ ପୋଲିସ ଓ ଅଫିସର କର୍ମଚାରୀମାନେ ତାଙ୍କୁ ବହୁ ବୁଝାସୁଝା କରିଥିଲେ। ହେଲେ ଯୁବତୀ ଜଣକ କାହାରି କଥା ଶୁଣି ନ ଥିଲେ। ପରେ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯିବ ନାହିଁ ବୋଲି ମ୍ୟାନେଜର ପ୍ରତିଶୃତି ଦେବା ପରେ ଯୁବତୀ ଜଣଙ୍କ ତଳକୁ ଓହ୍ଲାଇଥିଲେ।