ଚଣ୍ଡିଗଡ଼, ୧୫।୨: ପୁଲଓ୍ବାମାରେ ଶହୀଦ ହୋଇଥିବା ୪୦ ସିଆର୍ପିଏଫ୍ ଯବାନଙ୍କ ବଳିଦାନକୁ ଆମେ ସାଲ୍ୟୁଟ୍ କରୁଛୁ। ଆକ୍ରମଣର ବର୍ଷେ ପରେ ବି ଅନେକ ପ୍ରଶ୍ନ ଅନୁତ୍ତରିତ ହୋଇ ରହିଛି ବୋଲି କଂଗ୍ରେସ ମୁଖପାତ୍ର ରଣଦୀପ ସୁର୍ଜଓ୍ବୋଲ କହିଛନ୍ତି। ଏକ ଖବରଦାତା ସମ୍ମିଳନୀରେ ସେ ପ୍ରଶ୍ନ କରିଛନ୍ତି, ଆର୍ଡିଏକ୍ସ ଏବଂ ଆଇଇଡି ବୋଝେଇ କାର୍ କିପରି ଭାବେ ସୁରକ୍ଷା ଗାଡ଼ିକୁ ଆକ୍ରମଣ କରିପାରିଥିଲା? ଜମ୍ମୁ-କଶ୍ମୀରର ନିଲମ୍ବିତ ଡିଏସ୍ପି ଦାବିନ୍ଦର ସିଂଙ୍କ ଏହି ଆକ୍ରମଣରେ କି ଭୂମିକା ଥିଲା। ସେ ଆତଙ୍କବାଦୀମାନଙ୍କୁ ସାହାଯ୍ୟ କରିଥିଲେ କି ବୋଲି ସୁର୍ଜଓ୍ବୋଲା ପ୍ରଶ୍ନ କରିଛନ୍ତି। ଏହାସହ ସେ କହିଛନ୍ତି, ପୁଲଓ୍ବାମା ଆକ୍ରମଣ ଘଟିଥିବା ଜାଣିସୁଦ୍ଧା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜିମ୍ କର୍ବେଟ ନ୍ୟାଶନାଲ ପାର୍କରେ ଫିଲ୍ମ ଶୁଟିଂ କରୁଥିଲେ। ସେ କ୍ୟାମେରା ସାମ୍ନାରେ ଚା ପିଇ ପକୋଡ଼ା ଖାଇ ନୌକାବିହାର କରୁଥିଲେ। ସ୍ବରାଷ୍ଟ୍ରମନ୍ତ୍ରୀ ସାମ୍ନାକୁ ଆସି ଏହି ଅନୁତ୍ତରିତ ପ୍ରଶ୍ନଗୁଡ଼ିକର ଉତ୍ତର ଦେଲେ ୪୦ ଶହୀଦଙ୍କ ପ୍ରତି ଉପଯୁକ୍ତ ଶ୍ରଦ୍ଧାଞ୍ଜଳି ହେବ।
