ତାଳଚେର,୨୧ା୯(ନି.ପ୍ର.) – ରି ଆଡମିଶନ ଫି ବୃଦ୍ଧି ପ୍ରତିବାଦରେ ଶୁକ୍ରବାର ତାଳଚେର ସ୍ବୟଂଶାସିତ ମହାବିଦ୍ୟାଳୟ ଯୁକ୍ତ ୨ ଛାତ୍ରୀଛାତ୍ରମାନେ ଆନ୍ଦୋଳନକୁ ଓହ୍ଲାଇଥିଲେ। ଫଳରେ ଦୀର୍ଘ ସମୟ ଧରି କଲେଜ ପରିସରରେ ଉତ୍ତେଜନା ପ୍ରକାଶ ପାଇଥିଲା। ଗତବର୍ଷ ରି ଆଡମିଶନ ଫି ୨୭ ଶହ ଟଙ୍କା ଥିଲା। ହେଲେ ଚଳିତବର୍ଷ କଲେଜ କର୍ତ୍ତୃପକ୍ଷ ଏଥିରେ ୧୩ ଶହ ଟଙ୍କା ବୃଦ୍ଧି କରିଛନ୍ତି, ଯାହାକୁ ନେଇ ଅଶାନ୍ତି ଦେଖା ଦେଇଥିଲା। ପୂର୍ବାହ୍ନରେ ଛାତ୍ରୀଛାତ୍ରମାନେ ଶ୍ରେଣୀ ବର୍ଜନ କରି କଲେଜର ୨ଟି ଫାଟକରେ ତାଲା ପକାଇ ଦେବା ସହ କଲେଜ ପରିସରକୁ କାହାରିକୁ ଛାଡି ନ ଥିଲେ। ପରେ ୧୦ ଜଣ ଛାତ୍ରନେତା ତାଳଚେର ଉପଜିଲାପାଳଙ୍କୁ ଭେଟି ସମସ୍ୟା ସମ୍ପର୍କରେ ଅବଗତ କରାଇଥିଲେ। ହଠାତ ଏତେ ଟଙ୍କା ବୃଦ୍ଧି କରାଯିବା ଯୋଗୁ ବହୁ ଛାତ୍ରୀଛାତ୍ର ହଇରାଣ ହରକତ ହେବେ ବୋଲି ସେମାନେ ଅଭିଯୋଗ କରିଥିଲେ। ତୁରନ୍ତ ବର୍ଦ୍ଧିତ ଫି ପ୍ରତ୍ୟାହାର କରିନେବାକୁ ସେମାନେ ଦାବି କରିଥିଲେ। କଲେଜ କର୍ତ୍ତୃପକ୍ଷ ବୁଝାଶୁଝା କରିବା ପରେ ଛାତ୍ରୀଛାତ୍ରମାନେ ଅପରାହ୍ନରେ ଆନ୍ଦୋଳନରୁ ଓହରିଥିଲେ ।