ନୂଆଦିଲ୍ଲୀ,୩୦।୧୨: କେବେ ଭାରତୀୟ ଟିମ୍ ପାଇଁ ହକି ଖେଳୁଥିବା ଏହି ଖେଳାଳିଙ୍କ ଜୀବନ ଏବେ ବିତୁଛି ରାସ୍ତାକଡ଼ରେ। ଥଣ୍ଡା କାକରରେ ଦିଲ୍ଲୀର ଫୁଟପାଥରେ ଏହି ପୂର୍ବତନ ଖେଳାଳି ନିଜର ଜୀବନ କାଟୁଛନ୍ତି। ସୋସିଆଲ ମିଡିଆରେ ତାଙ୍କର କାହାଣୀ ସାମ୍ନାକୁ ଆସିବା ପରେ ଖେଳାଳିଙ୍କ ପରିଚୟ ମିଳିଛି। ପରିଚୟ ମିଳିବା ପରେ ତାଙ୍କୁ ସାହାଯ୍ୟର ହାତ ବଢ଼ାଇଛନ୍ତି କେନ୍ଦ୍ର କ୍ରୀଡାମନ୍ତ୍ରୀ କିରଣ ରିଜିଜୁ ଓ ବଲିଉଡ୍ ମହାନାୟକ ଅମିତାଭ ବଚ୍ଚନ। ସୂଚନାଯୋଗ୍ୟ, ସୋସିଆଲ ମିଡିଆରେ ଭାଇରାଲ ହେଉଥିବା ଏହି ହକି ଖେଳାଳିଙ୍କ ନାମ ହେଉଛି ଅମରଜିତ ସିଂହ। ଜୁନିୟର ହକିରେ ସେ ଭାରତ ପାଇଁ ପ୍ରତିନିଧିତ୍ୱ କରିସାରିଛନ୍ତି। ହକି ଖେଳିବା ସମୟରେ ଅମରଜିତ କିଛି ବର୍ଷ ଲଣ୍ଡନ ଓ ଜର୍ମାନୀରେ ବି ରହିସାରିଛନ୍ତି। କିନ୍ତୁ ଏବେ ସେ ଦିଲ୍ଲୀର ପାହାଡ ଗଞ୍ଜ ଅଞ୍ଚଳର ଫୁଟପାଥ୍ରେ ରହୁଥିବା ଜଣାପଡ଼ିଛି। ଅମରଜିତଙ୍କ ବିଷୟରେ ଏନେଇ ଜଣାପଡ଼ିବା ପରେ କେନ୍ଦ୍ର କ୍ରୀଡାମନ୍ତ୍ରୀ କିରଣ ରିଜିଜୁ ତାଙ୍କୁ ସହାୟତା ପାଇଁ ଆଶ୍ୱାସନା ଦେଇଛନ୍ତି। ଏଥିସହ ସେ ଟୁଇଟ କରି କହିଛନ୍ତି, ‘ବାସ୍ତବରେ ଭାରତ ପାଇଁ ଖେଳି ଏଭଳି ଜୀବନ ବିତାଉଥିବା ଖେଳାଳିଙ୍କୁ ନିଶ୍ଚୟ ସାହାଯ୍ୟ ଯୋଗାଇ ଦିଆଯିବ’। ଏନେଇ ସୋସିଆଲ ମିଡିଆ ମାଧ୍ୟମରେ ସେ ବାରମ୍ବାର ସୂଚାଇଛନ୍ତି ବୋଲି ରିଜିଜୁ କହିଛନ୍ତି। ଯଦି ଏଭଳି ଖେଳାଳିଙ୍କ ଖବର ମିଳିଯାଏ, ତେବେ ତାଙ୍କୁ ଖୁବ୍ଶୀଘ୍ର ସହାୟତା ଯୋଗାଇଦିଆଯିବ। ଅପରପକ୍ଷେ ଅମିତାଭ ମଧ୍ୟ ଏନେଇ ଟୁଇଟ କରି କହିଛନ୍ତି, ଯଦି ଅମରଜିତଙ୍କ ବିଷୟରେ ସବିଶେଷ ତଥ୍ୟ ମିଳିଯାଏ, ତେବେ ତାଙ୍କୁ ସାହାଯ୍ୟ କରିବା ସହଜ ହୋଇଯିବ। ଅମରଜିତଙ୍କ ବାବଦରେ ଏବେ ଅଧିକ ତଥ୍ୟ ମିଳି ନ ଥିବାରୁ ଅଧିକ ଜାଣିବା ପାଇଁ ଉଦ୍ୟମ କରାଯାଉଥିବା ନେଇ ସୂଚନା ମିଳିଛି।