ରାଞ୍ଚି,୧୫।୭: ଝାଡ଼ଖଣ୍ଡର ୮ଟି ପଞ୍ଚାୟତର ୨୦ ଗାଁରେ ଏବେ ବାଲ୍ୟ ବିବାହ ବନ୍ଦ ହୋଇଯାଇଛି। ଜନଜାତି ଅଧ୍ୟ୍ୟୁଷିତ ଏହି ଗାଁଗୁଡ଼ିକରେ କମ୍ ବୟସର ଝିଅପୁଅଙ୍କୁ ବିବାହ କରି ଦିଆଯାଉଥିଲା। ତେବେ ଏଠାରେ ଏଭଳି ପିଲାଙ୍କୁ ନେଇ ଫୁଟବଲ୍ ଦଳ ଗଠନ କରାଯାଇ ଏବେ ପ୍ରଶିକ୍ଷଣ ଦିଆଯାଉଛି। କୋଚ୍ ଆନନ୍ଦ ଗୋପାଲ ୨୦୧୩ଠାରୁ ଏଠାରେ ଫୁଟବଲ ପ୍ରଶିକ୍ଷଣ ଆରମ୍ଭ କରିଥିଲେ। ଗାଁ ଗାଁ ବୁଲି ଆନନ୍ଦ ବାଲ୍ୟବିବାହ ନ କରିବାକୁ ମାତାପିତାଙ୍କୁ ଅବଗତ କରାଇବା ସହିତ ଏହାର କୁପରିଣତି ସମ୍ପର୍କରେ ବୁଝାଇଥିଲେ। ଆନନ୍ଦଙ୍କ କଥାରେ ଲୋକଙ୍କ ମନରେ ନୂତନ ଭାବନା ଜାଗି ଉଠିଲା। ସେମାନେ ଝିଅଙ୍କ ବାଲ୍ୟବିବାହ ନ କରାଇ ପ୍ରଥମେ ତାଙ୍କର କ୍ୟାରିୟର ପ୍ରତି ଧ୍ୟାନ ଦେବାକୁ ଆରମ୍ଭ କଲେ। ଏବେ ଆନନ୍ଦଙ୍କ ପ୍ରଶିକ୍ଷଣ ଶିବିରରେ ୬୫୦ଜଣ ବାଳିକା ଫୁଟବଲ ଖେଳ ତାଲିମ୍ ନେଉଛନ୍ତି। ୨୦୧୬ରେ ଝାଡ଼ଖଣ୍ଡ ଦଳ ଅଣ୍ଡର-୧୭ରେ ଜାତୀୟ କପ୍ ଜିଣିବା ପରେ ଏସବୁ ଗାଁର ଲୋକଙ୍କ ଚିନ୍ତାଧାରାରେ ବହୁ ପରବର୍ତ୍ତନ ଆସିଥିବା କୁହାଯାଉଛି।
