ମସ୍କୋ,୨।୪(ଏଏଫ୍ପି): କୋଭିଡ- ୧୯ ମହାମାରୀର ରୂପ ନେଇଥିବା ବେଳେ ରୁଷିଆନ ଫୁଟବଲ ଆସୋସିଏଶନ (ଆର୍ଏଫ୍ଏସ୍) ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ସବୁ ଫୁଟବଲ ମ୍ୟାଚ୍କୁ ବ୍ୟାନ୍ କରାଯାଇଥିବା ବେଳେ ଏବେ ଏହାକୁ ମେ’ ୩୧ ତାରିଖ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛ ବୋଲି ଆରଏଫ୍ଏସ୍ ତରଫରୁ କୁହାଯାଇଛି। ରୁଷିଆରେ କରୋନ ଭାଇରସ୍ର ସଂକ୍ରମଣକୁ ଦୃଷ୍ଟିରେ ରଖି ସବୁ କ୍ରୀଡ଼ା ଇଭେଣ୍ଟକୁ ମେ’ ୩୧ ତାରିଖ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି ବୋଲି ଆର୍ଏଫ୍ଏସ୍ ଓ୍ବେବ୍ସାଇଟ୍ରେ ଘୋଷଣା କରାଯାଇଛି। ପୂର୍ବରୁ ଏପ୍ରିଲ ୧୦ ତାରିଖ ପର୍ଯ୍ୟନ୍ତ ସବୁ ଇଭେଣ୍ଟକୁ ବାତିଲ କରିବାକୁ ନିଷ୍ପତ୍ତି ନିଆଯାଇଥିଲା। ଏବେ ଏହି ଅବଧୀରେ ବୃଦ୍ଧି ଘଟିଛି। ରୁଷିଆନ ପ୍ରିମିୟର ଲିଗ୍ ମଧ୍ୟ ଏହି ନିଷ୍ପତ୍ତିକୁ ମାନିନେଇଛି।
ଏବେ ଆମେ ଚାମ୍ପିୟନଶିପ୍କୁ ଶେଷ କରିବାକୁ ଚାହୁଁନାହୁଁ ହେବାଲି ଲିଗ୍ ଅଧ୍ୟକ୍ଷ ସର୍ଗେଇ ପ୍ରିୟାଡକିନ କହିଛନ୍ତି। ରୁଷିଆନ୍ ପ୍ରିମିୟର ଲିଗ୍ ଫୁଟବଲରଙ୍କ ଦରମା କାଟ କରିବାକୁ ଏବେ ଆଲୋଚନା ଚାଲିଛି ବୋଲି ସେ କହିଛନ୍ତି। ଏହି କ୍ରମରେ ସେ କ୍ଲବ୍ ସ୍ପାର୍ଟାକ ମସ୍କୋକୁ ପ୍ରଶଂସା କରିଛନ୍ତି। ଦେଶର ପ୍ରଥମ କ୍ଲବ ଭାବେ ଏହି କ୍ଳବ ଦରାମା ବା ପାଉଣା କାଟ କରିବାକୁ ନିଷ୍ପତ୍ତି ନେଇଥିଲା। ଦେଶରେ ଲକ୍ଡାଉନ ଚାଲିଥିବା ବେଳେ ସ୍ପାର୍ଟାକ ମସ୍କୋର ଫୁଟବଲର ମାନେ ପୂର୍ବରୁ ୪୦ ପ୍ରତିଶତ କମ୍ ଦରମା ନେବାକୁ ସମ୍ମତି ପ୍ରକାଶ କରିଥିଲେ। କ୍ଲବର ଏହି ଦୁଃସମୟରେ ଖେଳାଳିମାନେ ସହଯୋଗ କରିବାକୁ ଏପରି ନିଷ୍ପତ୍ତି ନେଇଥିଲେ। ଉଲ୍ଲେଖଥାଉ କି, ରୁଷିଆରେ ୨,୭୭୭ ଜଣ କରୋନା ଭାଇରସ୍ରେ ସଂକ୍ରମିତ ହୋଇଛନ୍ତି ଓ ୨୪ ଜଣ ମୃତ୍ୟୁମୁଖରେ ପଡିଛନ୍ତି।
