ଫୁଲବାଣୀ ଅଫିସ/ ଦାରିଙ୍ଗବାଡି (ଡି.ଏନ୍.ଏ.) ୮ା୧୨-କନ୍ଧମାଳ ଜିଲାରେ ଶୀତର ପ୍ରକୋପ ବୃଦ୍ଧି ପାଉଛି। ଗତ ୨ଦିନ ଧରି ଏହାର ପ୍ରକୋପ ବେଶ୍ ଅନୁଭୂତ ହେଉଛି। ବିଶେଷ କରି ସକାଳେ ଅସହ୍ୟ ଥଣ୍ଡା ଅନୁଭୂତ ହେଉଛି। ଅପରାହ୍ନରୁ ଶୀତ ମାଡି ଆସୁଛି, ଖରା ଥିଲେ ମଧ୍ୟ ଶୀତ ବସ୍ତ୍ର ନ ପିନ୍ଧିଲେ ବାହାରକୁ ବାହାରି ହେଉନାହିଁ। ଶୀତର ପ୍ରକୋପ ଶୁକ୍ରବାର ଓ ଶନିବାର ହଠାତ୍ ବୃଦ୍ଧି ପାଇଥିବାରୁ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ଶନିବାର ଜିଲା ପାଣିପାଗ ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ ଦାରିଙ୍ଗବାଡିରେ ସର୍ବନିମ୍ନ ତାପମାତ୍ରା ୬.୫ ଡିଗ୍ରୀ ଏବଂ ଫୁଲବାଣୀରେ ୮ ଡିଗ୍ରୀ ରେକର୍ଡ କରାଯାଇଛି। ଆଗକୁ ଶୀତ ବଢ଼ିବ ବୋଲି ପୂର୍ବାନୁମାନ କରାଯାଉଛି। ଏବେ ପ୍ରତ୍ୟୁଷରେ ଗାଡି ଚଲାଇଲେ ମୁହଁ, ହାତ, ପାଦ ପୋଡିଗଲା ପରି ଅନୁଭୂତ ହେଉଛି। ଚଳିତବର୍ଷ ଶୀତ ରେକର୍ଡ ଭାଙ୍ଗିବ ବୋଲି ସ୍ଥାନୀୟ ଲୋକେ ଅନୁମାନ କରୁଛନ୍ତି। ଶୀତ ସାଙ୍ଗକୁ ଘନ କୁହୁଡି ସ୍ଥିତିକୁ ସଙ୍ଗୀନ କରୁଛି। ଶନିବାର କୁହୁଡି ନ ଥିବାରୁ ଶୀତ ଅଧିକ ଅନୁଭୂତ ହୋଇଛି। ବସ୍ ଷ୍ଟାଣ୍ଡ, ସହରର ବିଭିନ୍ନ ସ୍ଥାନରେ ଲୋକେ ଶୀତ ଦାଉରୁ ରକ୍ଷା ପାଇବାକୁ ନିଅଁା ଜାଳି ବସୁଛନ୍ତି। ହଠାତ୍ ଶୀତ ବୃଦ୍ଧି ଯୋଗୁ ବୃଦ୍ଧାବୃଦ୍ଧଙ୍କ ପାଇଁ ସମସ୍ୟା ସୃଷ୍ଟି ହୋଇଛି। ଶୀତକୁ ଦୃଷ୍ଟିରେ ରଖି ଜିଲାକୁ ପର୍ଯ୍ୟଟକଙ୍କ ଆଗମନ ବଢ଼ିବାରେ ଲାଗିଛି। ଜିଲା ତଥା ଜିଲା ବାହାରୁ ଆସିଥିବା ପର୍ଯ୍ୟଟକ ଶୀତର ମଜା ଉଠାଇଛନ୍ତି। ଶନିବାର ଅପରାହ୍ନରେ ପାଗ ମେଘୁଆ ରହିଛି, ତେଣୁ ରାତି ସମୟରେ ତାପମାତ୍ରା ବଢିପାରେ। ଲଗାତର ପାରଦ ଏପରି ଖସିଲେ ଦାରିଙ୍ଗବାଡି ଅଞ୍ଚଳରେ ନିଶ୍ଚିତ ତୁଷାରପାତ ହେବ ବୋଲି ପୂର୍ବାନୁମାନ କରାଯାଉଛି।