ଫେଡରରଙ୍କୁ ୧୦ମ ହାଲେ ଏଟିପି ଟାଇଟଲ

ହାଲେ ଓ୍ବେଷ୍ଟଫଲେନ (ଜର୍ମାନୀ), ୨୪ା୬ (ଏଏଫ୍‌ପି)-ରୋଜର ଫେଡରର ହାଲେ ଏଟିପି ଇଭେଣ୍ଟ ଜିତିଛନ୍ତି। ରବିବାର ଅନୁଷ୍ଠିତ ଫାଇନାଲରେ ସେ ବେଲଜିୟମର ଡେଭିଡ୍‌ ଗଫିନଙ୍କୁ ୭-୬ (୭/୨), ୬-୧ ସେଟ୍‌ରେ ପରାସ୍ତ କରିଛନ୍ତି। ଏଥିସହିତ ଏଠାରେ ସେ ୧୦ମ ଥର ପାଇଁ ଚାମ୍ପିୟନ ହୋଇପାରିଛନ୍ତି। ୩୭ ବର୍ଷୀୟ ଫେଡରର କହିଛନ୍ତି, ଏହାପୂର୍ବରୁ କୌଣସି ଟୁର୍ନାମେଣ୍ଟ ୧୦ ଥର ଜିତିବାରେ ସମର୍ଥ ହୋଇ ନ ଥିଲି। ସୁଇସ୍‌ ଟେନିସ ଷ୍ଟାରଙ୍କର ଏହା ହେଉଛି କ୍ୟାରିୟରର ୧୦୨ତମ ଟାଇଟଲ। ଆସନ୍ତା ମାସରେ ଫେଡରର ଲଣ୍ଡନରେ ତାଙ୍କ ୯ମ ଓ୍ବିମ୍ବେଲଡନ ଟାଇଟଲ ଅଭିଯାନ ଆରମ୍ଭ କରିବେ।