ଲଣ୍ଡନ,୪ା୩: ତୁମେ ଯେତେବେଳେ ବି ଫେରିଆସିବ ଆମେ ତୁମକୁ ସ୍ବାଗତ କରିବୁ। ରାଜକୀୟ ଉତ୍ତରଦାୟିତ୍ୱରୁ ଦୂରେଇ ଯାଇଥିବା ବ୍ରିଟେନର ମହାନ ରାଜବଂଶର ଅନ୍ୟତମ ଦାୟାଦ ପ୍ରିନ୍ସ ହ୍ୟାରିଙ୍କୁ ଏହା କହିଛନ୍ତି ସମ୍ରାଜ୍ଞୀ ଏଲିଜାବେଥ୍ ଦ୍ୱିତୀୟ। ସତେ ଯେମିତି ନିଜ ନାତି ହ୍ୟାରି ଓ ନାତୁଣୀ ବୋହୂ ମେଘାନ ମର୍କେଲଙ୍କୁ ଝୁରୁଛନ୍ତି ମହାରାଣୀ। ମଙ୍ଗଳବାର ସୋସିଆଲ ମିଡିଆ ଓ ଅନ୍ତର୍ଜାତୀୟ ଗଣମାଧ୍ୟମରେ ଏହି ରିପୋର୍ଟ ଟ୍ରେଣ୍ଡିଂ କରିଛି।
ଖବରକାଗଜ ‘ମେଟ୍ରୋ’ର ଏକ ଆଲେଖ୍ୟ ଅନୁସାରେ ଓ୍ବିଣ୍ଡସୋର କ୍ୟାଶେଲରେ ରବିବାର ନାତି ସହ ଏକାଠି ବସିଥିଲେ ମହାରାଣୀ। ଆସନ୍ତା ସପ୍ତାହରେ ମେଘାନଙ୍କ ଶେଷ ଆନୁଷ୍ଠାନିକ ରାୟଲ ଏନ୍ଗେଜ୍ମେଣ୍ଟ ହେବାକୁ ଥିବାବେଳେ ଏହା ପୂର୍ବରୁ ମହାରାଣୀ ଏଲିଜାବେଥ ବିଚ୍ଛେଦଜନିତ କ୍ଷତ ଉପଶମ କରିବା ପାଇଁ ନାତିଙ୍କ ସହ ୪ ଘଣ୍ଟା ଧରି ଆଲୋଚନା କରିଥିଲେ। ୩୫ ବର୍ଷୀୟ ନାତିଙ୍କୁ ୯୩ ବର୍ଷୀୟା ଜେଜେମା’ କହିଥିଲେ, ହ୍ୟାରି ତୁମେ ଯେତେବେଳେ ଚାହିଁବ ଫେରିଆସି ପାରିବ। ତୁମେ ପ୍ରତ୍ୟାବର୍ତ୍ତନ କଲେ ଆମେ ସହୃଦୟେ ସ୍ବାଗତ କରିବୁ। ସେହି ସମୟରେ ବୈଠକରେ ଦୁହିଁଙ୍କ ଛଡ଼ା ଆଉ କେହି ନ ଥିଲେ ବୋଲି ‘ଦି ସନ୍’ ଏକ ରିପୋର୍ଟରେ ଉଲ୍ଲେଖ କରିଛି। ଏହା ପୂର୍ବରୁ ହୋଇଥିବା ସଣ୍ଡରିଂହାମ ସମିଟରେ ସାକ୍ଷାତ ବେଳର କଥୋପକଥନରୁ ସହଜ ମନେହେଉଥିଲେ ଉଭୟେ। ହ୍ୟାରି ଏହି ଲଞ୍ଚ ମିଟିଙ୍ଗ ପାଇଁ ଅନୁରୋଧ କରିଥିଲେ। ହ୍ୟାରି ଓ ମେଘାନଙ୍କ ବ୍ରିଟେନସ୍ଥିତ ବାସଭବନ ଫ୍ରଗମୋର୍ଠାରୁ ପ୍ରାୟ ଦୁଇ ମାଇଲ ପଥ ଚାଲି ଚାଲି ଅତିକ୍ରମ କରିଥିଲେ। ପ୍ରକାଶ ଯେ, ଗତମାସରେ ରାଜ ଦମ୍ପତି ଡ୍ୟୁକ୍ ଆଣ୍ଡ ଡଚେସ୍ ହଠାତ୍ ରାଜକୀୟ ଉତ୍ତରଦାୟିତ୍ୱରୁ ମୁକ୍ତ ହୋଇ ବ୍ୟବସାୟରେ ମନୋନିବେଶ କରିବା ପାଇଁ ସ୍ଥିର କରିଥିଲେ। ଏହି ନିଷ୍ପତ୍ତିର ଘୋଷଣା ବିଶ୍ୱକୁ ଚକିତ କରିଦେଇଥିଲା।