କୁଜଙ୍ଗ,୨୪ା୬(ସ୍ବ.ପ୍ର.): କୁଜଙ୍ଗ ବ୍ଲକ ଜିଲାନାସୀ ପଞ୍ଚାୟତ ଦେଇ ପ୍ରବାହିତ ପାଇକା ନଦୀରେ ଫେରୀଘାଟ ପରିଚାଳନାକୁ କେନ୍ଦ୍ରକରି ବିବାଦ ସୃଷ୍ଟି ହୋଇଛି। ଉଭୟ ଜଗତ୍ସିଂହପୁର ଓ କେନ୍ଦ୍ରାପଡ଼ା ଜିଲା ପକ୍ଷରୁ ୨ଟି ଫେରିଘାଟ ପରିଚାଳିତ ହେଉଥିବାରୁ ଦୁଇ ଜିଲାର ନିଲାମଧାରୀଙ୍କ ମଧ୍ୟରେ ଏକ ପ୍ରକାର ପ୍ରତିଯୋଗିତା ଚାଲିଛି। ଯାତ୍ରୀଙ୍କୁ ନିଜ ଡଙ୍ଗାରେ ବସାଇବା ପାଇଁ ସେମାନେ କରୁଥିବା ପ୍ରତିଯୋଗିତା ଆଗାମୀ ଦିନରେ ବଡ଼ ସଂଘର୍ଷ ସୃଷ୍ଟି କରିବାର ଆଶଙ୍କା ରହିଛି। ଆଇନତଃ ନଦୀରେ କେଉଁ ପଞ୍ଚାୟତର ନିଲାମ ବୈଦ୍ଧ ତାହା ପ୍ରଶାସନ ସ୍ପଷ୍ଟ କରିବା ସହିତ ଏହି ବିବାଦର ସ୍ଥାୟୀ ସମାଧାନ କରିବା ଜରୁରୀ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।
ପ୍ରକାଶ ଯେ, କୁଜଙ୍ଗ ତହସିଲ ଅନ୍ତର୍ଗତ ଜିଲାନାସୀ ପଞ୍ଚାୟତ ଦେଇ ଏହି ନଦୀ ପ୍ରବାହିତ ହେଉଛି। ଗତବର୍ଷ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ପକ୍ଷରୁ ନଦୀଘାଟ ନିଲାମ କରାଯାଇଥିଲା। ଏହି ବ୍ଲକ ଅଧୀନ ତିଖିରି ପଞ୍ଚାୟତବାସୀ ନିଲାମ ନେଇ ଫେରୀଘାଟ ପରିଚାଳନା କରୁଥିଲେ। ମାତ୍ର ଏହି ନଦୀ ପାର୍ଶ୍ୱ କୁଜଙ୍ଗ ତହସିଲ ଅଧୀନ ଜିଲାନାସୀ ପଞ୍ଚାୟତର କୈବର୍ତ୍ତମାନେ ଫେରିଘାଟ ନିଲାମ ନେବାକୁ ଦାବି କରିଥିଲେ। ଏପରି କି ଗତ ଆର୍ଥିକ ବର୍ଷରେ ଏଠାରେ ସମାନ୍ତରାଳ ଭାବେ ୨ଟି ଫେରୀଘାଟ ପରିଚାଳିତ ହୋଇଥିଲା। ବିବାଦର ସମାଧାନ ପାଇଁ ଜଗତ୍ସିଂହପୁର ଜିଲା ପ୍ରଶାସନ ଆରଡିସିଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ଆରଡିସି ନଦୀର ଅବସ୍ଥିତି ସମ୍ପର୍କରେ ସରଜମିନ ତଦନ୍ତ କରି ରିପୋର୍ଟ ଦେବାକୁ ୨ ଜିଲାର ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ନିର୍ଦ୍ଧାରିତ ସମୟରେ କେନ୍ଦ୍ରାପଡ଼ା ଜିଲାର ଅଧିକାରୀମାନେ ତଦନ୍ତ କରିବାକୁ ଘଟଣାସ୍ଥଳକୁ ଆସି ନ ଥିଲେ। ଫଳରେ କେବଳ କୁଜଙ୍ଗ ତହସିଲ ପକ୍ଷରୁ ନଦୀର ଅବସ୍ଥିତି ଅନୁଧ୍ୟାନ କରାଯାଇଥିଲା। ଏଥିରୁ ନଦୀର ଅବସ୍ଥିତି ଜଗତ୍ସିଂହପୁର ଜିଲା ବୋଲି ଜଣାପଡିଥିଲା। ପରେ ପ୍ରଶାସନ ପକ୍ଷରୁ ଆଉ କିଛିଦିନ ଅପେକ୍ଷା କରିବା ପରେ ନୂତନ ଆର୍ଥିକ ବର୍ଷରେ କେନ୍ଦ୍ରାପଡ଼ା ଜିଲାର ନିଲାମକୁ ରଦ୍ଦ କରି କୁଜଙ୍ଗ ବ୍ଲକ ଜିଲାନାସୀ ପଞ୍ଚାୟତକୁ ନିଲାମ ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିଲା। ସେହି ଅନୁଯାୟୀ, ଜିଲାନାସୀ ପଞ୍ଚାୟତର ଲୋକେ ଆବଶ୍ୟକ ଅର୍ଥ ପୈଠ କରି ଘାଟ ନିଲାମ ନେଇଛନ୍ତି। ଅନ୍ୟପକ୍ଷରେ ସମାନ୍ତରାଳ ଭାବେ ତିଖିରି ପଞ୍ଚାୟତକୁ ମଧ୍ୟ ନିଲାମ ଦିଆଯାଇଥିବା ଜଣାପଡିଛି। ଫଳରେ ଏବେ ଗୋଟିଏ ନଦୀଘାଟରେ ଦୁଇଟା ଡ଼ଙ୍ଗା ପଡ଼ିଛି। ଦୁଇପକ୍ଷଙ୍କ ମଧ୍ୟରେ ଘାଟରେ ତୀବ୍ର ପ୍ରତିଯୋଗିତା ହେଉଛି। ଘାଟରେ ଅଧିକାଂଶ ତିଖିରୀ ଅଞ୍ଚଳର ଜନସାଧାରଣ ଯାତାୟାତ କରୁଛନ୍ତି। ସ୍ଥାନୀୟ ସରପଞ୍ଚ ପ୍ରମୋଦ କୁମାର ସ୍ବାଇଁ କହିଛନ୍ତି ଯେ, ଆଇନତଃ ଜିଲାନାସୀ ପଞ୍ଚାୟତର ନିଲାମ ବୈଧ। ମାତ୍ର ତିଖିରୀ ପଞ୍ଚାୟତ ପକ୍ଷରୁ ବେଆଇନ ଭାବେ ଘାଟ ପରିଚାଳନା କରାଯାଉଥିବା ସେ ଅଭିଯୋଗ କରିଛନ୍ତି। ଏ ସମ୍ପର୍କରେ କୁଜଙ୍ଗ ତହସିଲଦାର ରମେଶ ଚନ୍ଦ୍ର ପଣ୍ଡାଙ୍କୁ ପଚାରିବାରୁ ସେ କହିଲେ ଯେ, ଆରଡିସିଙ୍କ କହିବା ଅନୁଯାୟୀ ଏହାର ସମାଧାନ କରାଯିବ। ଏହି ନଦୀଘାଟ ଅଞ୍ଚଳ ଜଗତ୍ସିଂହପୁର ଜିଲା ଅଧୀନରେ ଥିବାରୁ କୁଜଙ୍ଗ ବ୍ଲକ ଏହାର ନିଲାମ କରିଛି। ଯଦି ସମାନ୍ତରାଳ ଭାବେ ଅନ୍ୟ ଏକ ଘାଟ ପରିଚାଳିତ ହେଉଛି, ତେବେ ତାହା ଆଇନ ସଙ୍ଗତ ନୁହେଁ। ଅନ୍ୟପକ୍ଷରେ ଦୁଇ ଡଙ୍ଗାରେ ଲାଇଫ୍ ଜ୍ୟାକେଟ୍ ନାହିଁ। ଯାତ୍ରୀ ବିପଜ୍ଜନକ ଭାବେ ଡଙ୍ଗାରେ ପାରି ହେଉଥିବା ଦେଖିବାକୁ ମିଳୁଛି।