ବୁରହାନପୁର,୨୪।୮: ମଧ୍ୟପ୍ରଦେଶ ବୁରହାନପୁରରେ ଜଣେ ମହିଳା ରାଜ୍ୟ ରାଜପଥ କଡ଼ରେ ପ୍ରସବ କରିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି। ପ୍ରସବ ଯନ୍ତ୍ରଣା ପରେ ‘ଜନନୀ ଏକ୍ସପ୍ରେସ୍’ ସହ ଯୋଗାଯୋଗ କରାଯାଇଥିଲେ ବି ଏହା ନ ପହଞ୍ଚିବାରୁ ମହିଳା ଜଣଙ୍କ ତାଙ୍କ ସ୍ବାମୀଙ୍କ ସହ ମୋଟର ସାଇକେଲରେ ହସ୍ପିଟାଲ ଯାଇଥିବା ବେଳେ ରାଜ୍ୟ ରାଜପଥ କଡରେ ଏକ କନ୍ୟା ସନ୍ତାନ ଜନ୍ମ ଦେଇଥିଲେ। ମହିଳାଙ୍କ ଶାଶୁଙ୍କ କହିବା କଥା ହେଲା ଏ ନେଇ ସେମାନେ ଏଏନ୍ଏମ୍ଙ୍କ ସହ ମଧ୍ୟ ଯୋଗାଯୋଗ କରିଥିଲେ। ହେଲେ ଆମ୍ବୁଲାନ୍ସ କି ‘ଜନନୀ ଏକ୍ସପ୍ରେସ୍’ ପହଞ୍ଚିବା ବିଳମ୍ବ ହେବାରୁ ସେମାନେ ଗର୍ଭବତୀଙ୍କୁ ମୋଟର ସାଇକେଲରେ ହସ୍ପିଟାଲ ନେଇ ଯାଉଥିଲେ। ଏହାପରେ ମା’ ଓ ନବଜାତ ଶିଶୁ କନ୍ୟାଙ୍କୁ ନିକଟସ୍ଥ ଶାହପୁର କମ୍ୟୁନିଟି ହେଲ୍ଥ ସେଣ୍ଟର ନିଆଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ଚିକିତ୍ସା କରିଥିଲେ।