ରିଷିଡା, ୧୩।୩ (ଡି.ଏନ୍.ଏ.)- କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ରିଷିଡ଼ାକେ ପାଇପ ପାଏନ୍ ଯୁଗେଇ ଦେବାର ଲାଗି ତେଲନଦୀରୁ ବେବସ୍ତା କରାଯାଇଛେ। ସେନ୍ତା ପାଏନ୍ ରଖବାର ଲାଗି ଗୁଟେ ଓଭର ହେଡ ଟ୍ୟାଙ୍କ ତିଆର କରାଯାଇଛେ। ହେଲେ ପାଇପ ଯୁଡ଼ା କାମ୍ ନାଇଁ ସରବାର ଲାଗି ଆଏଜ୍ତକ ୨୦ ପରତିଶତ ଲୋକ୍ ନ ପାଏନ୍ ପାଇପାରୁଛନ୍। ରିଷିଡ଼ା ବସଷ୍ଟଣ୍ଡ୍, ଗାନ୍ଧୀନଗର, ସଲଣ୍ଡିଆମୁଣ୍ଡା, ମାଠୁଲପଡ଼ା, କଲୋନୀପଡ଼ା, ଇରିଗେସନ କଲୋନୀକେ ପାଇପ ପାଏନ୍ ନାଇଁ ଯିବାର। ଏନ୍ତାଥି ଖରାଦିନ ମୂଲ ନାଇଁ ହେବାର ଆଗରୁ ଇ ଅଂଚଲରେ ପାଏନ୍ ସମସିଆ ଦେଖାଦେଇଛେ। ଇଆଡ଼େ ୨୦ ପରତିଶତ ପାଏନ୍ ସପ୍ଲେ ହେଉଥିବାର ଅଂଚଲରେ ୩ଟା ଷ୍ଟାଣ୍ଡ ପୋଷ୍ଟରେ ଠିକ୍ ହିସାବେ ପାଏନ୍ ବାହାରୁଥିଲାବେଲେ ବାକିଥି ଅଲପ ପାଏନ୍ ବାହାରୁଛେ। ସୂଚନା ଅନ୍ସାରେ ରିଷିଡ଼ା ମାତୃପୁରୀନେ ପାଏନ୍ ଟଁାକିକେ ପାଏନ୍ ନାଇଁ ଉଠ୍ବାର। ଯେନ୍ଥିରଲାଗି ପାଏନ୍ ସପ୍ଲେରେ ବଡ଼ଭାରି ଅସ୍ବିଧା ଦେଖାଦେଉଛେ। ସେନ୍ତା ଭୂତଲ ପଏନ୍ କମିଯିବାର ଲାଗି ଆଗରୁ ତିଆର ହେଇଥିବାର ପାଏନ୍ ପ୍ରକଳ୍ପ ବି ଅଚଲ ହେଇଯାଇଛେ।