ମୋବାଇଲ୍ ଫୋନ୍ ଚୋରି ହେବା କିମ୍ବା ଏଥିରୁ ଡାଟା ଚୋରି ହେବା ଯୋଗୁ ବର୍ତ୍ତମାନ ଅନେକ ମହିଳା ବିଭିନ୍ନ ପ୍ରକାର ସମସ୍ୟାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି। ତେଣୁ ଏହାକୁ ବ୍ୟବହାର କରିବା ବେଳେ ସୁରକ୍ଷା ଦୃଷ୍ଟିରୁ କେତେକ ଦିଗ ପ୍ରତି ସତର୍କ ରହିବା ଆବଶ୍ୟକ…
– ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ଫୋନ୍ ଆପଣଙ୍କର ଯେତେ ପର୍ସନାଲ୍ ହେଉ ନା କାହିଁକି, ଏଥିରେ ଏଭଳି କିଛି ଡାଟା ଷ୍ଟୋର କରି ରଖନ୍ତୁ ନାହିଁ, ଯାହାର କୌଣସି ବି ଅପବ୍ୟବହାର କରାଯାଇପାରିବ।
– ଘରକୁ ଚାକରାଣୀ କିମ୍ବା ଅନ୍ୟାନ୍ୟ କାର୍ଯ୍ୟ ଲାଗି ବାହାର ଲୋକ ଆସୁଥିଲେ ଫୋନ୍କୁ ଏଣେ ତେଣେ ନ ରଖି ସୁରକ୍ଷିତ ସ୍ଥାନରେ ରଖନ୍ତୁ। ସେହିପରି ବାହାରକୁ ଯିବା ସମୟରେ ଯଦି ପକେଟରେ କିମ୍ବା ବ୍ୟାଗ୍ରେ ଫୋନ୍ ରଖୁଛନ୍ତି ତେବେ ବାରମ୍ବାର ଚେକ୍ କରିବାକୁ ଭୁଲନ୍ତୁ ନାହିଁ।
– ଏହା ବ୍ୟତୀତ ଫୋନ୍କୁ ପାସ୍ୱାର୍ଡ ପ୍ରୋଟେକ୍ଟେଡ୍ ରଖନ୍ତୁ। ଏଥିପାଇଁ ଆପଣ ସିକ୍ୟୁରିଟ କୋଡ୍ କିମ୍ବା ପାଟର୍ନ ବ୍ୟବହାର କରିପାରିବେ। ହେଲେ ଯଦି ଆପଣଙ୍କ ଫୋନ୍ରେ ଫିଙ୍ଗର୍ପ୍ରିଣ୍ଟ ଲକ୍ ସିଷ୍ଟମ ରହିଛି ତେବେ ଏହାର ସୁବିଧା ନେଇପାରିବେ।
– ଫୋନ୍ରେ ପାସ୍ୱାର୍ଡ ମ୍ୟାନେଜମେଣ୍ଟ ସଫ୍ଟୱେର୍ ରଖିବାକୁ ଆଦୌ ଭୁଲନ୍ତୁ ନାହିଁ। କାରଣ ଏହାକୁ ରଖିବା ଦ୍ବାରା ଆପଣ କ୍ରେଡିଟ୍ କାର୍ଡ, ପାସ୍ୱାର୍ଡ, ଫଟୋ କିମ୍ବା ଅନ୍ୟାନ୍ୟ ମହତ୍ତ୍ବପୂର୍ଣ୍ଣ ଡାଟା ସୁରକ୍ଷିତ ରଖିପାରିବେ। ଏମିତି କି ଫୋନ୍ ହଜିଗଲେ କିମ୍ବା ଚୋରି ହୋଇଗଲେ ମଧ୍ୟ ବିନା ପାସ୍ୱାର୍ଡରେ କେହି ଏହାକୁ ଖୋଲିପାରିବେ ନାହିଁ।
– ବର୍ତ୍ତମାନ ଅନେକ ନାମୀଦାମୀ କମ୍ପାନୀର ଫୋନ୍ରେ ଅପ୍ଲୋଡିଂ ଏବଂ ଡାଉନ୍ଲୋଡିଂରେ ଲକ୍ ସିଷ୍ଟମ୍ ଉପଲବ୍ଧ, ଯାହାଦ୍ବାରା ଆପଣଙ୍କ ବ୍ୟତୀତ ଅନ୍ୟ କେହି ଚାହିଁଲେ ଫୋନ୍ରୁ କୌଣସି ଡାଟା କପି କିମ୍ବା ଫର୍ୱାର୍ଡ କରିପାରିବେ ନାହିଁ।
– ଯଦି ଫୋନ୍ରେ ଇଣ୍ଟରନେଟ୍ ବ୍ୟବହାର କରୁଛନ୍ତି ତେବେ ସିକ୍ୟୁରିଟି ସିଷ୍ଟମ୍ ରଖନ୍ତୁ। ତଥାପି ଫୋନ୍ ହଜିବା ମାତ୍ରେ ପ୍ରଥମେ ସମସ୍ତ ଅନ୍ଲାଇନ୍ ଆକାଉଣ୍ଟର ପାସ୍ୱାର୍ଡ ପରିବର୍ତ୍ତନ କରିଦିଅନ୍ତୁ।
– ଫୋନ୍ ହଜିବା ମାତ୍ରେ ସିମ୍ କନେକ୍ସନ୍କୁ ତୁରନ୍ତ ବ୍ଲକ କରିଦିଅନ୍ତୁ। ଏହାକୁ ନେଇ କେହି ଯେପରି କୌଣସି ଆପରାଧିକ କାର୍ଯ୍ୟ ନ କରିପାରିବେ ସେଥିପାଇଁ ତୁରନ୍ତ ନିକଟସ୍ଥ ଥାନାରେ ଏନେଇ ଏକ କମ୍ପ୍ଲେନ୍ ଲେଖାଇଦିଅନ୍ତୁ।