ଓ୍ବାଶିଂଟନ/ମସ୍କୋ/ଲଣ୍ଡନ, ୮ା୫: ମହାମାରୀ କରୋନା ଭୂତାଣୁ ବିଶ୍ୱରେ କଳାବାଦଲ ଢ଼ାଙ୍କିଦେଇଛି। ଏହି ପ୍ରାଣଘାତୀ ରୋଗରୁ ମୁକୁଳିବା ଲାଗି ସଂଗ୍ରାମ ଜାରି ରହିଥିଲେ ହେଁ ଆକ୍ରାନ୍ତଙ୍କ ସଂଖ୍ୟା ବଢ଼ି ୩୮.୫୬ ଲକ୍ଷରେ ପହଞ୍ଚିଲାଣି। ବିଶ୍ୱରେ ଗୁରୁବାର ସୁଦ୍ଧା ମୋଟ ୨.୬୬ ଲକ୍ଷ ଲୋକଙ୍କ ଜୀବନ ଯାଇଥିବା ବେଳେ ଆମେରିକା, ୟୁରୋପ ଭଳି ରୁଷିଆ ସ୍ଥିତି ମଧ୍ୟ ଅସମ୍ଭାଳ ହେଲାଣି। ଗୁରୁବାର ରୁଷିଆରେ ଫ୍ରାନ୍ସ ଓ ଜର୍ମାନୀଠାରୁ ଅଧିକ ସଂକ୍ରମିତ ବ୍ୟକ୍ତି ଥିବା ଜଣାପଡ଼ିଛି। ଆମେରିକା, ସ୍ପେନ୍, ଇଟାଲୀ ଓ ବ୍ରିଟେନ ପରେ ସର୍ବାଧିକ ଆକ୍ରାନ୍ତ ରୁଷିଆରେ ଚିହ୍ନଟ କରାଯାଇଛି। ଏବେ ରୁଷିଆରେ ୧,୭୭,୧୬୦ ସଂକ୍ରମିତ ଥିବା ପ୍ରକାଶ। ୧,୬୨୫ ଜଣଙ୍କ ଜୀବନ ଏଠାରେ ଗଲାଣି। ଗତ ୨୪ ଘଣ୍ଟା ମଧ୍ୟରେ ୧୧ ହଜାରରୁ ଊର୍ଦ୍ଧ୍ୱ ନୂଆ ମାମଲା ସାମ୍ନାକୁ ଆସିଥିବା ବେଳେ ଗୁରୁବାର ୮୮ ଲୋକଙ୍କ ଏଠାରେ ପ୍ରାଣ ଯାଇଛି। କ୍ରମବର୍ଦ୍ଧିଷ୍ଣୁ ମାମଲାକୁ ନେଇ ରୁଷିଆର ଚିନ୍ତା ବଢ଼ିଯାଇଛି।
ଆମେରିକାରେ ସର୍ବାଧିକ ୧୨,୬୭ ଲକ୍ଷ ଲୋକ କରୋନା ସଂକ୍ରମିତ ଥିବା ବେଳେ ୭୫ ହଜାର ଲୋକଙ୍କ ଜୀବନ ଗଲାଣି। ଗୋଟିଏ ଦିନରେ ଏଠି ପ୍ରାୟ ୪ ହଜାର ମାମଲା ସାମ୍ନାକୁ ଆସିଛି। ସ୍ପେନ୍ରେ ଆକ୍ରାନ୍ତଙ୍କ ସଂଖ୍ୟା ବଢ଼ି ୨.୫୭ ଲକ୍ଷରେ ପହଞ୍ଚିଥିବା ବେଳେ ୨୬, ୦୬୦ ଲୋକ ମଲେଣି। ଇଟାଲୀରେ ୨୯,୬୯୦ ଜଣ ଜୀବନ ହାରିଥିବା ବେଳେ ସଂକ୍ରମିତଙ୍କ ସଂଖ୍ୟା ବୃଦ୍ଧିପାଇ ୨.୧୪ ଲକ୍ଷରୁ ଅଧିକ ହେଲାଣି। ବ୍ରିଟେନରେ ଅନୁରୂପ ସ୍ଥିତି। ଏଠାରେ ଆକ୍ରାନ୍ତଙ୍କ ସଂଖ୍ୟା ୨.୦୧ ଲକ୍ଷ ଥିବାବେଳେ ୩୦,୦୭୬ ମୁଣ୍ଡ ଗଡ଼ିଲାଣି। ଏହା ପରେ ରୁଷିଆ ସର୍ବାଧିକ ସଂକ୍ରମିତ ବ୍ୟକ୍ତିଙ୍କ ତାଲିକାର ପଞ୍ଚମ ସ୍ଥାନରେ ରହିଛି। ଫ୍ରାନ୍ସରେ ୧.୭୪ ଲକ୍ଷରୁ ଊର୍ଦ୍ଧ୍ୱ ଲୋକ କରୋନା ପୀଡ଼ିତ ଥିବାବେଳେ ମୃତ୍ୟୁସଂଖ୍ୟା ୨୫,୮୦୯ରେ ପହଞ୍ଚିଛି। ଜର୍ମାନୀରେ ୧.୬୮ ଲକ୍ଷ, ତୁର୍କୀରେ ୧.୩୧ ଲକ୍ଷ, ବ୍ରାଜିଲରେ ୧.୨୭ ଲକ୍ଷ, ଇରାନରେ ୧.୦୩ ଲକ୍ଷ ଲୋକ ଭୂତାଣୁ ଆକ୍ରାନ୍ତ ହୋଇଥିବା ଜଣାପଡ଼ିଛି। ପ୍ରାଣ ହରାଇଥିବା ବ୍ୟକ୍ତିଙ୍କ ମଧ୍ୟରେ ଜର୍ମାନୀରେ ୭,୩୨୨, ବ୍ରାଜିଲରେ ୮,୬୦୫, ତୁର୍କୀରେ ୩,୫୮୪, ଇରାନରେ ୬,୪୮୪, ଚାଇନାରେ ୪,୬୩୩, କାନାଡ଼ାରେ ୪,୨୮୦, ବେଲଜିୟମରେ ୮,୪୧୫, ନେଦରଲାଣ୍ଡ୍ସରେ ୫, ୨୮୮, ସ୍ବିଡେନରେ ୩,୦୪୦ କୁ ବୃଦ୍ଧିପାଇଛି। ପରିସ୍ଥିତି କ୍ରମଶଃ ଭୟଙ୍କର ରୂପ ଧାରଣ କରୁଥିବା ବେଳେ ବିଶ୍ୱର ୨୧୨ ଦେଶ ଏକପ୍ରକାର ଅକାମୀ ହୋଇପଡ଼ିଛି। ଅର୍ଥନୀତି ଭୁଶୁଡ଼ି ପଡ଼ିବା ସହ ଲୋକମାନଙ୍କ ମଧ୍ୟରେ କେକୁଆ ଭୟ ସୃଷ୍ଟିହୋଇଛି।