ପ୍ୟାରିସ, ୨୫।୧୦ (ପି.ଟି.)- ଭାରତର ସାତ୍ତ୍ୱିକସାଇରାଜ ରାଙ୍କିରେଡ୍ଡୀ ଓ ଚିରାଗ ସେଟ୍ଟୀ ଯୋଡ଼ି ଏଠାରେ ଚାଲିଥିବା ୭ ଲକ୍ଷ ୫୦ ହଜାର ଆମେରିକୀୟ ଡଲାର ପୁରସ୍କାର ରାଶିବିଶିଷ୍ଟ ଫ୍ରେଞ୍ଚ୍ ଓପନ୍ ବ୍ୟାଡ୍ମିଣ୍ଟନ ପ୍ରତିଯୋଗିତାର ପୁରୁଷ ଡବଲ୍ସରେ ଚମତ୍କାର ପ୍ରଦର୍ଶନ କରିଛନ୍ତି। ନିକଟରେ ଥାଇଲାଣ୍ଡ ଓପନ୍ ଜିତିଥିବା ସାତ୍ତ୍ୱିକ-ଚିରାଗ ଯୋଡ଼ି ୨୧-୧୮, ୧୮-୨୧, ୨୧-୧୩ ଗେମ୍ରେ ଡିଫେଣ୍ଡିଂ ବିଶ୍ୱ ଚାମ୍ପିୟନ ମହମ୍ମଦ ଏହଶାନ ଓ ହେଣ୍ଡ୍ରା ସେଥିଓ୍ବାନ ଯୋଡ଼ିଙ୍କୁ ପରାସ୍ତ କରି କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ସେହିଭଳି ଦୁଇ ମହିଳା ଷ୍ଟାର୍ ଖେଳାଳି ପି.ଭି. ସିନ୍ଧୁ ଓ ସାଇନା ନେହ୍ବାଲ ମଧ୍ୟ ଅନ୍ତିମ-୮ରେ ସ୍ଥାନ ସୁରକ୍ଷିତ କରିନେଇଛନ୍ତି। ମହିଳା ସିଙ୍ଗଲ୍ସ ପ୍ରି-କ୍ୱାର୍ଟର ଫାଇନାଲରେ ବିଶ୍ୱ ଚାମ୍ପିୟନ ସିନ୍ଧୁ ୨୧-୧୦, ୨୧-୧୩ ସିଧାସଳଖ ଗେମ୍ରେ ସିଙ୍ଗାପୁରର ୟେଓ ଜିଆ ମିନ୍ଙ୍କୁ ମାତ୍ ଦେଇଛନ୍ତି। ସିନ୍ଧୁ ନିକଟରେ ଚାଇନା, କୋରିଆ ଓ ଡେନମାର୍କ ଓପନ୍ରେ ନୈରାଶ୍ୟଜନକ ପ୍ରଦର୍ଶନ କରି ପ୍ରାରମ୍ଭିକ ପର୍ଯ୍ୟାୟରୁ ବିଦାୟ ନେଇଥିଲେ। ତେଣୁ ସେ ଏଠାରେ ସଫଳ ହେବା ଲକ୍ଷ୍ୟରେ ରହିଛନ୍ତି। ସେହିଭଳି ୮ମ ସିଡ୍ ସାଇନା୨୧-୧୦, ୨୧-୧୧ ଗେମ୍ରେ ଡେନମାର୍କର ଲିନେ ହୋଜମାର୍କ ଜାଏର୍ସଫେଲ୍ଡଟ୍ଙ୍କୁ ହରାଇଛନ୍ତି।