ପ୍ୟାରିସ୍,୨୫ା୫(ଏଏଫ୍ପି)-ଫ୍ରେଞ୍ଚ ଓପନ୍ ଗ୍ରାଣ୍ଡସ୍ଲାମ ଟେନିସ୍ ପ୍ରତିଯୋଗିତାରେ ଏଥର ଖେଳାଳିଙ୍କ ଲାଗି ଟଏଲେଟ୍ ବ୍ରେକ୍ ସଂଖ୍ୟାକୁ ସୀମିତ କରିବା ଲାଗି ଆୟୋଜକଗଣ ନିଷ୍ପତ୍ତି ନେଇଛନ୍ତି। ଏଥର ଏକ ମ୍ୟାଚ୍ ବେଳେ ଜଣେ ଖେଳାଳି କେବଳ ଥରେମାତ୍ର ଟଏଲେଟ୍ ବ୍ରେକ୍ ନେଇପାରିବ। ଏହି ନୂଆ ନିୟମ ଲାଗୁ କରିବା ପଛରେ କାରଣ ରହିଛି। ଏକ ସଂଘର୍ଷପୂର୍ଣ୍ଣ ମ୍ୟାଚ୍ ଚାଲିଥିବାବେଳେ ଯଦି ଜଣେ ଖେଳାଳି ଟଏଲେଟ୍ ବ୍ରେକ୍ରେ ଯାଏ ତେବେ ବିଶେଷକରି ଏକ ସେଟ୍ ହାରିବା ପରେ ଏହା ବିପକ୍ଷ ଖେଳାଳି ଓ ଦର୍ଶକଙ୍କ ମନରେ ବିରକ୍ତି ଭାବ ସୃଷ୍ଟି କରିଥାଏ। କିନ୍ତୁ ଏଥର ରୋଲାଣ୍ଡ ଗ୍ୟାରୋସରେ ଦ୍ୱିତୀୟ ସିଡ୍ ମାନ୍ୟତାପ୍ରାପ୍ତ କାରୋଲିନା ପ୍ଲିସ୍କୋଭା ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ପୁରୁଷ ଖେଳାଳିଙ୍କୁ ବେଳେବେଳେ ୫, ୬ଘଣ୍ଟା ଧରି ଖେଳିବାକୁ ପଡୁଛି। ତେଣୁ ସେମାନଙ୍କୁ ଦୁଇଥର ସୁଯୋଗ ଦିଆଯିବା ଉଚିତ। ମହିଳାଙ୍କ କ୍ଷେତ୍ରରେ ଥରେ ମାତ୍ର ଯଥେଷ୍ଟ।