ଏଭଳି ଏକ ଗାଁ ଅଛି, ଯେଉଁଠାରେ ଲୋକ ଦୀର୍ଘାୟୁ ହୋଇ ନ ଥାନ୍ତି। ତାଙ୍କର ଜୀବନକାଳ ବହୁତ୍ କମ୍। ସେଠାରେ ପରିସ୍ଥିତି ଏଭଳି ହୋଇଛି ଯେ, ଶେଷରେ ସରକାର ଏଠାକାର ଲୋକଙ୍କୁ ଗାଁ ଛାଡିବାକୁ ପରାମର୍ଶ ଦେଇଛନ୍ତି। ଏହି ଦୃଶ୍ୟ ଦେଖିବାକୁ ମିଳିଛି ଝାଡଖଣ୍ଡ ପଲାମୁ ଜିଲାର ଚୁକରୁ ଗାଁରେ। ସୂଚନାଯୋଗ୍ୟ, ଗାଁଲୋକେ ପିଉଥିବା ପାଣିରେ ଅତ୍ୟଧିକ ମାତ୍ରାରେ ଫ୍ଲୋରାଇଡ୍ ରହିଛି। ଫଳରେ ସେମାନେ ଶାରୀରିକ ଅକ୍ଷମ ପାଲଟୁଥିବା ଜଣାପଡ଼ିଛି। ଲଗାତାର ଭାବେ ଏହି ପାଣି ପିଇବା ଯୋଗୁ ଫ୍ଲୋରୋସିସ୍ ନାମକ ରୋଗରେ ଆକ୍ରାନ୍ତ ହେଉଛନ୍ତି ବୋଲି ସ୍ଥାନୀୟବାସିନ୍ଦା କହିଛନ୍ତି। ଏହି ଦୂଷିତ ପାଣି ଯୋଗୁ ଲୋକଙ୍କ ହାଡ଼ ଓ ଦାନ୍ତ ଦୁର୍ବଳ ହେଉଛି ବୋଲି ଅଭିଯୋଗ ହୋଇଛି। କେବଳ ସେତିକି ନୁହେଁ କେତେ ଜଣ ଯୁବକଙ୍କର ଏହି ରୋଗରେ ମୃତ୍ୟୁ ହୋଇଥିବା ସୂଚନା ରହିଛି। ଗତ ୨୫ବର୍ଷରୁ ଗଁାଲୋକେ ଏହି ସମସ୍ୟାର ସମ୍ମୁଖୀନ ହେଉଥିବା ବେଳେ ଏଠାରେ ୫୦ବର୍ଷରୁ ଊର୍ଦ୍ଧ୍ୱ ବୟସର କେହି ବ୍ୟକ୍ତି ନାହାନ୍ତି ବୋଲି କୁହାଯାଏ। ଉକ୍ତ ଗଁାରେ କେବଳ ରାଜେଶ୍ୱର ପାଲ ନାମକ ଜଣେ ବୃଦ୍ଧ ରହିଛନ୍ତି। ତାଙ୍କର ବୟସ ୬୯ ହୋଇଥିବା ବେଳେ ସେ ଗଁାର ଏକମାତ୍ର ବୃଦ୍ଧ ବ୍ୟକ୍ତି। ଅପରପକ୍ଷରେ ଏହି ସମସ୍ୟା ଯୋଗୁ ସ୍ଥାନୀୟ ପ୍ରଶାସନ ତାଙ୍କୁ ଭିଟାମାଟି ଛାଡିବାକୁ ପରାମର୍ଶ ଦେଇଛନ୍ତି। ହେଲେ ସେଠାକାର ଲୋକଙ୍କ କହିବା ଅନୁସାରେ ସବୁ ଲୋକ ଦିବ୍ୟାଙ୍ଗ ପାଲଟିଛନ୍ତି। ଏଭଳି ସ୍ଥିତିରେ ଅନ୍ୟତ୍ର ସ୍ଥାନରେ ପୁଣି ଯାଇ ବାସ କରିବା ସେମାନଙ୍କ ପାଇଁ ଅସମ୍ଭବ ବୋଲି ଗାଁଲୋକେ କହିଛନ୍ତି।