ବାଲେଶ୍ୱର ଅଫିସ,୧୮।୯: ବାଲେଶ୍ୱର ଚାନ୍ଦିପୁର ସ୍ଥିତ ପ୍ରତିରକ୍ଷା ଗବେଷଣା ଓ ଉନ୍ନୟନ ସଂଗଠନ (ଡିଆର୍ଡିଓ) ପକ୍ଷରୁ ବୁଧବାର ପୂର୍ବାହ୍ନ ୧୦ଟା ୧ ମିନିଟ୍ ସମୟରେ ଆକାଶରୁ ଆକାଶକୁ ନିକ୍ଷେପ କରାଯାଇ ପାରୁଥିବା ସ୍ବଳ୍ପ ଦ୍ରୁତଗାମୀ କ୍ଷେପଣାସ୍ତ୍ର ‘ଅସ୍ତ୍ର’ର ବ୍ୟବହାରିକ ପରୀକ୍ଷଣ କରାଯାଇଥିଲା। କୁଲେଇକୁଣ୍ଡା ଏୟାର ବେସ୍ରୁ ସୁଖୋଇ ୩୦ଏମ୍କେଆଇ ଫ୍ଲାଇଟ୍ ଜେଟ୍ରୁ ଏହାକୁ ନିକ୍ଷେପ କରାଯିବାର କିଛି ସମୟ ପରେ ଚାନ୍ଦିପୁର ସମନ୍ବିତ ପରୀକ୍ଷଣ ପରିସର (ଆଇଟିଆର୍)ର ୩ ନଂ. ଲଞ୍ଚପ୍ୟାଡ୍ରୁ କ୍ଷେପଣାସ୍ତ୍ର ‘ବଂଶୀ’ର ପରୀକ୍ଷଣ କରାଯାଇଥିଲା। ଆକାଶମାର୍ଗରେ ‘ଅସ୍ତ୍ର’ କ୍ଷେପଣାସ୍ତ୍ର ‘ବଂଶୀ’କୁ ଟାର୍ଗେଟ୍ କରିବାରେ ସଫଳ ହୋଇଥିବା ବିଶେଷ ସୂତ୍ରରୁ ଜଣାପଡ଼ିଛି।
ଗତ ୧୬ ତାରିଖରେ କୁଲେଇକୁଣ୍ଡା ଏୟାର ବେସ୍ରୁ ସୁଖୋଇ ୩୦ଏମ୍କେଆଇ ଫ୍ଲାଇଟ୍ ଜେଟ୍ରୁ କେବଳ ‘ଅସ୍ତ୍ର’ ନିକ୍ଷେପ କରାଯାଇଥିଲା, ଯାହା ସଫଳ ହୋଇଥିଲା। ଏହି କ୍ଷେପଣାସ୍ତ୍ରର ଲମ୍ବ ୩.୮ ମିଟର ଓ ମୋଟେଇ ୧୭୮ ସେ.ମି.। ଏହା ୧୫୪କେଜି ଯୁଦ୍ଧାସ୍ତ୍ର ବହନ କରିବାର କ୍ଷମତା ରଖିଛି। ଏହା ତରଳ ଇନ୍ଧନରେ ଚାଳିତ ହୁଏ ଏବଂ ଶବ୍ଦର ଗତି ଠାରୁ ୪.୫ ମାର୍ଚ୍ଚ ସ୍ପିଡ୍ରେ ଗତି କରିପାରେ। ଏହାକୁ ଉଭୟ ସ୍ବଳ୍ପ ଏବଂ ଦ୍ରୁତଗାମୀ କ୍ଷେପଣାସ୍ତ୍ର ଭାବେ ବ୍ୟବହାର କରାଯାଇ ପାରିବ। ୨୦କି.ମି.ରୁ ୧୧୦କି.ମି. ପର୍ଯ୍ୟନ୍ତ ଏହାର ଲକ୍ଷ୍ୟଭେଦ କରିବା ସାମର୍ଥ୍ୟ ରହିଛି। ଭାରତୀୟ ପ୍ରତିରକ୍ଷା ଗବେଷଣା ପ୍ରତିଷ୍ଠାନ ଏହି କ୍ଷେପଣାସ୍ତ୍ର ନିର୍ମାଣ କରିଛି।