ବଇଣ୍ଡା, ୧୧ା୫ (ଡି.ଏନ.ଏ.): ଅନୁଗୋଳ ଜିଲାରେ ରବିବାର ୧୩ କରୋନା ସଂକ୍ରମିତ ଚିହ୍ନଟ ପରେ ସଂକ୍ରମଣ ରୋକିବାକୁ ନୁନୁକାପଶି ସରପଞ୍ଚ ଜଳଧର ସାହୁ ଜିଲାପାଳଙ୍କ କ୍ଷମତା ବ୍ୟବହାର କରି ବଇଣ୍ଡା ସହ ପଞ୍ଚାୟତକୁ ୭୨ ଘଣ୍ଟା ଶଟ୍ଡାଉନ ଘୋଷଣା କରିଛନ୍ତି। ଉକ୍ତ ନିଷ୍ପତ୍ତି (ଚିଠି ନଂ.୬୩/୧୦ା୦୫ା୨୦୨୦) ସମ୍ପର୍କରେ ସେ ଆଠମଲ୍ଲିକ ଉପଜିଲାପାଳ, କିଶୋରନଗର ବିଡିଓ, ତହସିଲଦାର ଏବଂ ହଣ୍ଡପା ଆଇଆଇସିଙ୍କୁ ଅବଗତ କରାଇଛନ୍ତି। ଚିଠିରେ ସରପଞ୍ଚ ଉଲ୍ଲେଖ କରିଛନ୍ତି ଯେ, ୫୫ ନମ୍ବର ଜାତୀୟ ରାଜପଥ ପାର୍ଶ୍ୱରେ ବଇଣ୍ଡା ଛକ ପଡୁଥିବାରୁ ବାହାର ରାଜ୍ୟରୁ ଓଡ଼ିଶା ଫେରୁଥିବା ପ୍ରବାସୀମାନେ ବଇଣ୍ଡାଠାରେ ଗାଡ଼ିରୁ ଓହ୍ଲାଇ ବିଭିନ୍ନ ସାମଗ୍ରୀ କିଣାକିଣି କରୁଛନ୍ତି। ଫଳରେ ସ୍ଥାନୀୟ ଅଞ୍ଚଳବାସୀ ସୁରକ୍ଷିତ ନୁହନ୍ତି। କେବଳ ଏହି ସମୟ ମଧ୍ୟରେ ଜରୁରିକାଳୀନ ସାମଗ୍ରୀ ଔଷଧ, ଓମ୍ଫେଡ, ପନିପରିବା, ଫଳ, ତେଜରାତି ଦୋକାନ ଅପରାହ୍ନ ୧ଟା ପର୍ଯ୍ୟନ୍ତ ଖୋଲାଯାଇପାରିବ। ଜରୁରୀ କାମ ନ ଥିଲେ ଘରୁ ଲୋକେ ନ ବାହାରିବାକୁ ସରପଞ୍ଚ ସାହୁ ନିବେଦନ କରିଛନ୍ତି।
