ରଣପୁର,୨୪ା୯(ସ୍ବ.ପ୍ର.): ପଡୋଶୀ ଗଞ୍ଜାମ ଜିଲାକୁ ଚୋରାରେ ଚାଲାଣ ହେଉଥିବା ବଉଳମାଳା ପଥର ବୋଝେଇ ୪୦୭ ଟ୍ରକ୍କୁ ରଣପୁର ପୋଲିସ ଜବତ କରିଛି। ଏହି ଘଟଣାରେ ଏସ୍କର୍ଟରେ ଯାଉଥିବା ଯୁବକଙ୍କ ସମେତ ୫ଜଣଙ୍କୁ ଗିରଫ କରି ପୋଲିସ ସୋମବାର କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ପରେ ସେମାନଙ୍କୁ ରଣପୁର ସବ୍ଜେଲକୁ ପଠାଇ ଦିଆଯାଇଛି। ଗିରଫମାନେ ହେଲେ ଖୋର୍ଦ୍ଧା ଜିଲା ଜଙ୍କିଆ ଥାନା ଭୋଗପୁର ଗଁାର ରାଜ କିଶୋର ପାଲଟାସିଂହ(୩୫), କବିରାଜ କନ୍ନହର ସିଂ (୩୦), ବିକାଶ ଜୟ ରଣସିଂହ(୩୭), ପବିତ୍ର ମାର୍ଥା (୩୧) ଓ ଉମାକାନ୍ତ କନ୍ନହର ସିଂ(୨୭)। ପ୍ରାପ୍ତ ସୂଚନା ଅନୁସାରେ ଓଡି୦୨ଏଡବ୍ଲ୍ୟୁ ୦୩୦୧ନଂ. ବିଶିଷ୍ଟ ୪୦୭ ଟ୍ରକରେ ୧୬୦ ପିସ୍ ବଉଳମାଳା ପଥର ବୋଝେଇ ହୋଇ ଜଙ୍କିଆ ଥାନାର ଭୋଗପୁରରୁ ଗଞ୍ଜାମ ଜିଲାକୁ ଯାଉଥିଲା। ଏହି ଟ୍ରକକୁ ଏସ୍କର୍ଟ ଦେଇ ଓଡି୩୩ବି-୫୦୬୨ନଂ.ର ବୁଲେଟ୍ ମଧ୍ୟ ଯାଉଥିଲା। ବିଶେଷ ସୂତ୍ରରୁ ଖବର ପାଇ ରଣପୁର ଥାନା ଆଇଆଇସି ରଶ୍ମିରଞ୍ଜନ ଦାଶ, ସବ୍ଇନ୍ସପେକ୍ଟର ପ୍ରୀତି ପ୍ରକାଶ ମହାନ୍ତିଙ୍କ ସମେତ ପୋଲିସ ଟିମ୍ ଏହି ଦୁଇ ଗାଡିକୁ ରବିବାର ରାତିରେ ସାନଗଡଠାରେ ଅଟକାଇ ନିଜ ହେପାଜତକୁ ନେଇଥିଲେ। ପୋଲିସ ୫ଜଣଙ୍କୁ ଗିରଫ କରି ସେମାନଙ୍କଠାରୁ ୫ ମୋବାଇଲ, ୧୨,୫୦୦ ଟଙ୍କା ଜବତ କରିଛି। ରଣପୁର ଥାନାରେ ଏ ନେଇ ଆଇପିସି ଦଫା ୩୭୯, ୪୧୧, ୩୪ରେ ମାମଲା (ନଂ.୧୯୮/୧୯) ରୁଜୁ ହୋଇଛି। ଖୋର୍ଦ୍ଧା ଜିଲାର ଭୋଗପୁରସ୍ଥିତ ପୁରୀ ଜଗନ୍ନାଥ ମହାପ୍ରଭୁଙ୍କ ମୁଣ୍ଡିଆରୁ ବେଆଇନ ଭାବେ ବଉଳମାଳା ପଥର ଗଞ୍ଜାମ, ନୟାଗଡ଼, ଫୁଲବାଣୀ ଚାଲାଣ ହୋଇଆସୁଥିବା ପୋଲିସ ତଦନ୍ତରୁ ଜଣାପଡିଛି।