ଓହିଓ: ମା’ର ମମତାରେ ଏତେ ଆକର୍ଷଣ ଅଛି ଯେ, ବେଳେବେଳେ ଅସମ୍ଭବ ମନେ ହେଉଥିବା କାମ ବି ସହଜରେ ହୋଇଯାଏ। ଏହାର ଏକ ନିଛକ ଉଦାହରଣ ଦେଖିବାକୁ ମିଳିଛି ଆମେରିକାର ଓହିଓଠାରେ। ଏଠାରେ ୟଙ୍ଗ୍ସଟାଉନରେ ଥିବା ଚାର୍ଲି ଆଡାମ୍ସ ତାଙ୍କ ମା’ ଜୁଲିଙ୍କୁ ଦେଖା କରିବାକୁ ଚାହୁଁଥିଲେ। ୮୦ ବର୍ଷୀୟ ତାଙ୍କ ମା’ ନିୟୁ ମିଡିଲ୍ଟାଉନରେ ଏକ ନର୍ସିଂ ହୋମରେ ରହୁଥିଲେ। କିନ୍ତୁ ଲକ୍ଡାଉନ୍ ଯୋଗୁ କୌଣସି ସ୍ଥାନକୁ ଯିବାର ଅନୁମତି ନାହିଁ।
କିନ୍ତୁ ମା’ଙ୍କୁ ଦେଖାକରିବା ପାଇଁ ବ୍ୟସ୍ତ ହୋଇ ପଡ଼ିଥିଲେ ଆଡାମ୍ସ। ଏଥିପାଇଁ ସେ ଏକ ଉପାୟ ଚିନ୍ତା କରିଥିଲେ। ତାଙ୍କ କମ୍ପାନୀରେ ଥିବା ଏକ ବକେଟ ଟ୍ରକକୁ ଆଣି ସେଥିରେ ସେ ନିଜେ ଉପରକୁ ଯାଇ ତାଙ୍କ ମା’ ରହୁଥିବା ତୃତୀୟ ମହଲାର ଝରକା ପାଖରେ ପହଞ୍ଚିଥିଲେ। ଏହାପରେ ଝରକା ବାହାରୁ ମା’ ପୁଅଙ୍କର ମିଳନ ହୋଇଥିଲା। ଝରକା ବାହାରେ ଥାଇ ସେ ତାଙ୍କ ମାଆ ଜୁଲିଙ୍କୁ ଡାକି ଭାବବିହ୍ବଳ ହୋଇ ପଡ଼ିଥିଲେ। ଉଭୟଙ୍କର ଏହି ମିଳନର ଭିଡିଓକୁ ତାଙ୍କର ଜଣେ ସମ୍ପର୍କୀୟ ସୋସିଆଲ ମିଡିଆରେ ପୋଷ୍ଟ କରିଥିଲେ। ସୋସିଆଲ ମିଡିଆରେ ଏହି ଭିଡିଓକୁ ବହୁ ସଂଖ୍ୟାରେ ଲୋକ ପସନ୍ଦ କରିଛନ୍ତି।