ନୂଆଦିଲ୍ଲୀ,୨୮-୪: ରିଲାଏନ୍ସ କମ୍ୟୁନିକେଶନ(ଆର୍କମ୍) ପୁଣି ଥରେ ଟେଲିକମ୍ ବିଭାଗ(ଡିଓଟି)କୁ ବକେୟା ୪୯୨ କୋଟି ଟଙ୍କା ଫି ଦେବାରେ ବିଫଳ ହୋଇଛି। ଜଣେ ଅଧିକାରୀ ଏ ସମ୍ପର୍କରେ ସୂଚନା ଦେଇ କହିଛନ୍ତି ଯେ, ଅନିଲ ଅମ୍ବାନୀଙ୍କ କମ୍ପାନୀ କ୍ରମାଗତ ତୃତୀୟଥର ବକେୟା ଦେବାରେ ଅସମର୍ଥ ହୋଇଛି। ଋଣରେ ବୁଡ଼ିଯିବା ପରେ ଦେବାଳିଆ ଅଦାଲତରେ ଆବେଦନ ଦେଇଥିବା ଆର୍କମ୍ ପକ୍ଷରୁ କୁହାଯାଇଛି ଯେ, ଏନ୍ସିଏଲ୍ଏଟିଙ୍କ ଏକ ନିର୍ଦ୍ଦେଶ କାରଣରୁ ଏହା ବକେୟା ଦେବ ନାହିଁ। ଡିଓଟି ଅଧିକାରୀ କହିଛନ୍ତି ଯେ, ଆର୍କମ୍କୁ କାରଣ ଦର୍ଶାଅ ନୋଟିସ ଜାରି ଅଥବା ଅପରେଟର ଠାରୁ ସ୍ପେକ୍ଟ୍ରମ ପ୍ରତ୍ୟାହାର କରିବା ପୂର୍ବରୁ ଟ୍ରିବ୍ୟୁନାଲଙ୍କ ଆଦେଶକୁ ଅପେକ୍ଷା କରାଯାଉଛି। ନ୍ୟାଶନାଲ କମ୍ପାନୀ ଲ’ ଆପେଲାଟ ଟ୍ରିବ୍ୟୁନାଲ(ଏନ୍ସିଏଲ୍ଏଟି) ଆସନ୍ତା ୩୦ରେ ଏ ସଂକ୍ରାନ୍ତ ମାମଲାର ଶୁଣାଣି କରିବେ। ସେହି ଦିନ ଟ୍ରିବ୍ୟୁନାଲ ଆର୍କମ୍ ଦ୍ୱାରା ଆଗତ ଦେବାଳିଆ ଆବେଦନର ମଧ୍ୟ ଶୁଣାଣି କରିବେ। ସୂଚନାଥାଉ କି, ୪୯୨ କୋଟି ଟଙ୍କାର ବକେୟା ସ୍ପେକ୍ଟ୍ରମ ଫି ଦେବାକୁ ଆର୍କମ୍କୁ ଚଳିତ ମାସ ୧୯ତାରିଖ ଶେଷ ଦିନ ଥିଲା, ଯେଉଁଥିରେ ୧୦ ଦିନର ଗ୍ରେସ୍ ପିରିୟଡ ସାମିଲ କରାଯାଇଥିଲା। ପୂର୍ବରୁ ଆର୍କମ୍ ଏପ୍ରିଲ ୫ରେ ୨୮୧ କୋଟି ଟଙ୍କା ଏବଂ ୧୩ରେ ୨୧ କୋଟି ଟଙ୍କା ସ୍ପେକ୍ଟ୍ରମ ଫି ଦେବାରେ ବିଫଳ ହୋଇଥିଲା।