ମେଲବୋର୍ନ,୨୮।୧୨(ଏଏଫ୍ପି)- ସ୍ଥାନୀୟ ମେଲବୋର୍ନ କ୍ରିକେଟ ଗ୍ରାଉଣ୍ଡ (ଏମ୍ସିଜି)ରେ ଚାଲିଥିବା ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ଘରୋଇ ଅଷ୍ଟ୍ରେଲିଆ ବୃହତ୍ ଅଗ୍ରଣୀ ହାସଲ କରିବା ସହ ସ୍ଥିତି ଆହୁରି ମଜଭୁତ କରିଛି। ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଅଷ୍ଟ୍ରେଲିଆ ପ୍ରଥମ ଇନିଂସ୍ରେ ୧୫୫.୧ ଓଭରରେ ୪୬୭ ରନ୍ କରି ଅଲ୍ଆଉଟ ହୋଇଥିଲା। ଜବାବରେ ନ୍ୟୁଜିଲାଣ୍ଡ ପ୍ରଥମ ଇନିଂସ୍ ଆରମ୍ଭ କରି ୫୪.୫ ଓଭରରେ ୧୪୮ ରନ୍ କରି ଅଲ୍ଆଉଟ ହୋଇଛି। ଏଥିଯୋଗୁ ଅଷ୍ଟ୍ରେଲିଆ ୩୧୯ ରନ୍ର ବୃହତ୍ ଅଗ୍ରଣୀ ହାସଲ କରିଥିଲା। ଏହାପରେ ଦ୍ୱିତୀୟ ଇନିଂସ୍ ଆରମ୍ଭ କରି ଅଷ୍ଟ୍ରେଲିଆ ଶନିବାର ତୃତୀୟ ଦିବସ ଖେଳ ଶେଷ ସୁଦ୍ଧା ୪୫ ଓଭରରେ ୪ ଉଇକେଟ ହରାଇ ୧୩୭ ରନ୍ ସଂଗ୍ରହ କରିଛି। ଏବେ ଅଷ୍ଟ୍ରେଲିଆ ୬ ଉଇକେଟ ହାତରେ ରଖି ମୋଟ୍ ଉପରେ ୪୫୬ ରନ୍ର ବୃହତ୍ ଅଗ୍ରଣୀ ହାସଲ କରିଛି। ଷ୍ଟମ୍ପ ଅପସାରଣ ବେଳକୁ ମାଥ୍ୟୁ ଓ୍ବାଡେ ୧୫ ଓ ପ୍ରଥମ ଇନିଂସ୍ରେ ଶତକ ହାସଲ କରିଥିବା ଟ୍ରାଭିସ ହେଡ୍ ୧୨ ରନ୍ କରି ଅପରାଜିତ ରହିଛନ୍ତି। ଦଳ ତରଫରୁ ଅଭିଜ୍ଞ ଓପ୍ନର ଡେଭିଡ ଓ୍ବାର୍ନର ୩୮, ଜୋ ବନର୍ସ ୩୫, ମାର୍ନସ ଲାବୁସେନ ୧୯ ଓ ଷ୍ଟିଭ୍ ସ୍ମିଥ୍ ୭ ରନ୍ କରି ଆଉଟ ହୋଇଛନ୍ତି। ବୋଲିଂରେ ନ୍ୟୁଜିଲାଣ୍ଡ ତରଫରୁ ନିଲ ଓ୍ବାଗ୍ନର ୨ ଓ ମିଚେଲ ସାଣ୍ଟନର ଗୋଟିଏ ଉଇକେଟ ଅକ୍ତିଆର କରିଛନ୍ତି।
ଅସମାପ୍ତ ପ୍ରଥମ ଇନିଂସ୍ ସ୍କୋର ୪୪/୨ରୁ ଖେଳ ଆରମ୍ଭ କରି ନ୍ୟୁଜିଲାଣ୍ଡ ଶନିବାର ଅଲ୍ଆଉଟ ହୋଇଥିଲା। ଓଭରନାଇଟ ବ୍ୟାଟ୍ସମ୍ୟାନ ଟମ୍ ଲଥାମ ୯ରୁ ଖେଳ ଆରମ୍ଭ କରି ୫୦ ରନ୍ର ଅର୍ଦ୍ଧଶତକୀୟ ପାଳି ଖେଳି ଆଉଟ ହୋଇଥିଲେ। ସେହିପରି ୨ରୁ ଖେଳ ଆରମ୍ଭ କରି ଅଭିଜ୍ଞ ରସ୍ ଟେଲର ମାତ୍ର ୪ ରନ୍ କରି ପ୍ୟାଭିଲିୟନ ଫେରିଥିଲେ। ଲଥାମଙ୍କୁ ବାଦ୍ ଦେଲେ ବାକି ସବୁ ବ୍ୟାଟ୍ସମ୍ୟାନ ବିଫଳ ହୋଇଥିଲେ। ଏହି କ୍ରମରେ ଟମ୍ ବ୍ଲଣ୍ଡେଲ ୧୫, ଅଧିନାୟକ କେନ ଓ୍ବଲିୟମସନ ୯, ହେନେରୀ ନିକୋଲ୍ସ ବିନା ସ୍କୋର, ଉଇକେଟକିପର ବ୍ୟାଟ୍ସମ୍ୟାନ ବିଜେ ଓ୍ବାଟଲିଂ ୭, କଲିନ ଡି ଗ୍ରାଣ୍ଡହୋମ ୧୧, ମିଚେଲ ସାଣ୍ଟନର ୩, ଟିମ୍ ସୌଦି ୧୦, ଟ୍ରେଣ୍ଟ ବୋଲ୍ଟ ୮ରନ୍ କରି ଆଉଟ ହୋଇଥିବା ବେଳେ ଓ୍ବାଗ୍ନର ୧୮ ରନ୍ କରି ଅପରାଜିତ ରହିଥିଲେ। ଅଷ୍ଟ୍ରେଲିଆ ତରଫରୁ ପ୍ୟାଟ୍ କୁମିନ୍ସ ସର୍ବାଧିକ ୫, ଜେମ୍ସ ପାଟିନସନ ୩, ମିଚେଲ ଷ୍ଟାର୍କ ୨ଟି ଉଇକେଟ ନେଇଥିଲେ। ପୂର୍ବରୁ ପ୍ରଥମ ଟେଷ୍ଟରେ ବିଜୟୀ ହୋଇ ଅଷ୍ଟ୍ରେଲିଆ ୩ ମ୍ୟାଚ୍ବିଶିଷ୍ଟ ଏହି ସିରିଜରେ ୧-୦ରେ ଅଗ୍ରଣୀ ହାସଲ କରିଛି।
ସଂକ୍ଷିପ୍ତ ସ୍କୋର:
ଅଷ୍ଟ୍ରେଲିଆ ପ୍ରଥମ ଇନିଂସ୍- ୧୫୫.୧ ଓଭରରେ ୪୬୭ ରନ୍ରେ ଅଲଆଉଟ।
ନ୍ୟୁଜିଲାଣ୍ଡ ପ୍ରଥମ ଇନିଂସ୍- ୫୪.୫ ଓଭରରେ ୧୪୮ ଅଲଆଉଟ
(ଲଥାମ- ୫୦, ଓ୍ବାଗ୍ନର- ୧୮*, ବ୍ଲଣ୍ଡେଲ- ୧୫, କୁମିନ୍ସ- ୫/୨୮, ପାଟିନସନ- ୩/୩୪, ଷ୍ଟାର୍କ- ୨/୩୦)।
ଅଷ୍ଟ୍ରେଲିଆ ଦ୍ୱିତୀୟ ଇନିଂସ୍- ୪୫ ଓଭରରେ ୧୩୭/୪
(ଓ୍ବାର୍ନର- ୩୮, ବନର୍ସ- ୩୫, ଲାବୁସେନ- ୧୯, ଓ୍ବାଡେ- ୧୫*, ଓ୍ବାଗ୍ନର- ୨/୩୯, ସାଣ୍ଟନର- ୧/୨୨)।