ବଛ୍ରେ ହେଲା ଥଁଡା ପାଏନ୍ ପ୍ରକଳ୍ପ ଅଚଲ : ଉଲ୍ଗୁଲାନର ଚେତାବନୀ ଦେଲା ବେଉସାୟୀ ସଂଘ
21 ମନମୁଣ୍ଡା, ୯।୬ (ଡି.ଏନ.ଏ): – ବୌଦ୍ଧ ଜିଲା ମନମୁଣ୍ଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ବାଡ଼ାକେ ଲାଗି ୨୦୧୬ ସାଲେ ୩ ଲାଖ୍ ଟଁକା ଖରଚ୍ରେ ଗୁଟେ ଥଁଡା ପାଏନ୍ ପ୍ରକଳ୍ପ ତିଆର କରାଯାଇଥିଲା। ଉଦେଶ୍ ଥିଲା ରୁଗୀ ଆର ତାକର ସହଯୋଗୀମାନେ ଅତିକମ୍ରେ ଖରାଦିନେ ଥଁଡା ପିଇଲା ପାଏନ୍ ଟିକେ ପାଏବେ। ହେଲେ ପ୍ରକଳ୍ପଟା ଦିନାକେତେ ଠିକ୍ଠାକ୍ ଚାଲ୍ଲା ଉତାରୁ ମୋଟର ପୁଡ଼ି ଅଚଲ ହେଇଯାଇଥିଲା। ପଁଚେତ୍ ତରଫୁ ମୋଟର ମରାମତି କରାଯାଇଥିଲା ବଲି ଥାନୀୟ ସରପଁଚ୍ ମିନାକ୍ଷୀ ସାହୁକଁରନୁ ଜନାପଡ଼ିଛେ। ହେଲେ ଦେଖ୍ଭାଲ ଅଭାବୁ ହେଉ କି ଉନିଅଁା କେହେନ୍ସି କାରନ୍ରୁ ପ୍ରକଳ୍ପର ମୋଟର ଫେନ୍ ଅଚଲ ହେଇଯାଇଛେ। ଯେନ୍ଥିରଲାଗି ଆଏଜ୍କେ ପାଖାପାଖି ବଛ୍ରେ ହେଲା ଥଁଡା ପାଏନ୍ ପ୍ରକଳ୍ପ ଅଚଲ ହେଇ ପଡ଼ିରହିଛେ। ଇ ପ୍ରକଳ୍ପରେ ସବୁ ଲୁକ୍କର ସୁବିଧା ଲାଗି ମୁଖିଆ ରାସ୍ତା ଏନ୍ଏଚ୍-୫୭ ଫାଲକେ କେତେଟା ଟ୍ୟାପର ବେବସ୍ତା କରାଯାଇଥିଲାବେଲେ ଡାକ୍ତରଖାନା ପରିସର ଭିତିରକେ ବି ଟ୍ୟାପ୍ ରହିଛେ। ଇ ମୁଡ଼ଫଟା ଖରା ଝାଉକେ ପ୍ରକଳ୍ପଟା ଅଚଲ ହେଇ ପଡ଼ି ରହିଲାବେଲେ ସାଧାରନ୍ ଲୋକ୍, ରୁଗୀ ଆର ତାକର ସହଯୋଗୀମାନେ ଥଁଡା ପାଏନ୍ ଟିକେର ଲାଗି ଦହଗଁଜ୍ ହେଉଥିବାର ଦେଖ୍ବାକେ ମିଲୁଛେ। ମନମୁଣ୍ଡା ଡାକ୍ତରଖାନା ଛକରେ ଜଲଛତରଟେ ବି ନଁାଇଁନ। ସେନ୍ତା ଥାନୀୟ ଲୋକ୍, ରୁଗୀ ଆର ତାକର ଲୋକ୍ମାନେ ଡାକ୍ତରଖାନା ପାସେ ଥିବାର ଗୁଟେ ନଲ୍ଚୁଅଁା ଉପରେ ଭରସା କରି ଚଲୁଛନ୍। ହେଲେ ସେ ନଲ୍ଚୁଅଁାର ପାଏନ୍ ବି ପିବାକେ ସୁଆଦିଆ ନୁହେ। ହେଲେ ଲୋକ୍ ଉପେ ଶୂଇନ୍ ହେଇ ସେ ପାଏନ୍କେ ବେଭାର କରୁଛନ୍। ଇ ବାବ୍ଦେ ସ୍ବାସ୍ଥ୍ୟ କେନ୍ଦ୍ର ଅଧ୍କାରୀ ଡାକ୍ତର ମହେନ୍ଦ୍ର କୁମାର ସଏକୁଁ ପଚରାଲାରୁ ପ୍ରକଳ୍ପ ପଁଚେତ୍ ବିଭାଗ ଦାୟୀତିଅରେ ଅଛେ। ରୁଗୀମାନକର ଲାଗି ସ୍ବାସ୍ଥ୍ୟ କେନ୍ଦ୍ର ତରଫୁ ଓ୍ବାର୍ଡ ପାସେ ଥଁଡା ପାଏନ୍ର ବେବସ୍ତା ଥିବାର ସେ କହିଥିଲେ। ସେନ୍ତା ସରପଁଚ୍ ମିନାକ୍ଷୀ ସାହୁକୁଁ ପଚରାଲାରୁ ପ୍ରକଳ୍ପ ବ୍ଲକ ତରଫୁ ହେଇଛେ। ବ୍ଲକ, ଆରଡବ୍ଲ୍ୟୁଏସ୍ଏସ୍ ଜେଇକୁଁ ଫୋନ କଲେ ନାଇଁ ଉଠାବାର ବଲି ସେ କହିଥିଲେ। ବିଭାଗୀୟ କତୁରପକ୍ଷକଁର ଅବହେଲାର ଲାଗି ବହୁତ୍ ଦିନ ହେଲା ପ୍ରକଳ୍ପ ଅଚଲ ହେଇ ପଡ଼ିଛେ। ଯେନ୍ଥିରଲାଗି ଜନସାଧାରନରେ ଅସନ୍ତୋଷ ଦେଖାଦେଇଛେ। ଯେତେ ଜଲ୍ଦି ହେବା ପ୍ରକଳ୍ପକେ ସଚଲ କରାଯାଉ ନାଇଁହେଲେ ଆଏବାର ଦିନେ ଆଂଦୋଲନ କରାଯିବା ବଲି ଡାକ୍ତରଖାନା ଛକ ବେଉସାୟୀ ଆର ବୁଧିଜୀବୀମାନେ ଚେତାବନୀ ଦେଇଛନ୍।