ନୂଆଦିଲ୍ଲୀ,୨୦-୧: ବଜେଟ ସମ୍ପର୍କିତ ବିଭିନ୍ନ ପ୍ରସଙ୍ଗ ଉପରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି ଲାଗି କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ଏକ ସୋସିଆଲ ମିଡିଆ କ୍ୟାମ୍ପେନ୍ ଆରମ୍ଭ କରାଯିବ। ଏହା ଚଳିତ ମାସ ୨୨ ଠାରୁ ଶୁଭାରମ୍ଭ ହେବ ବୋଲି ସୂଚନା ରହିଛି। ଏହାର ନାମ ଅର୍ଥଶାସ୍ତ୍ରୀ କ୍ୟାମ୍ପେନ୍ ରହିଛି। ଏହା ଦ୍ୱାରା ବିଭିନ୍ନ ଅର୍ଥନୈତିକ ଶବ୍ଦକୁ ଆନିମେଟେଡ ଭିଡିଓ ଦ୍ୱାରା ଲୋକଙ୍କ ସାମ୍ନାରେ ପରିବେଷଣ କରାଯିବ। ଫଳରେ ବଜେଟ ପ୍ରକ୍ରିୟାକୁ ଛାତ୍ରୀଛାତ୍ର ଏବଂ ସାଧାରଣ ଲୋକମାନେ ସହଜରେ ବୁଝିବାକୁ ସକ୍ଷମ ହେବେ ବୋଲି ପ୍ରକ୍ରିୟା ସହ ଜଡିତ ଜଣେ ଅଧିକାରୀ ସୂଚନା ଦେଇଛନ୍ତି। ଏଭଳି କାର୍ଯ୍ୟକ୍ରମ ଗତ ବର୍ଷ ବଜେଟ ଆଗରୁ ସରକାର ହାତକୁ ନେଇଥିଲେ। ସେହିଭଳି ବଜେଟରେ ରହିଥିବା ପ୍ରତିଶ୍ରୁତିକୁ ନେଇ ଆଉ କ୍ୟାମ୍ପେନ୍ ଆରମ୍ଭ କରାଯାଇଛି। ଏହାର ଟ୍ୟାଗଲାଇନ ରହିଛି ହମାରା ଭରୋଷା। ଏହାକୁ ୧୨ ଆଞ୍ଚଳିକ ଭାଷାରେ ଲଞ୍ଚ କରାଯାଇଛି। ସରକାରଙ୍କ ପ୍ରତିଶ୍ରୁତି ଏବଂ ସୁବିଧା ଯୋଗାଣ ଉପରେ ଏହା ଆଧାରିତ। ସ୍ବାସ୍ଥ୍ୟ କ୍ଷେତ୍ର, ମାନବ ବିହୀନ ଲେଭଲ କ୍ରସିଂ, ହାଉସିଂ ଫର ଅଲ୍ ଭଳି ବିଭିନ୍ନ ବିଷୟ ଏହା ମଧ୍ୟରେ ସାମିଲ ରହିଛି। ଏହି ସିରିଜରେ ଅର୍ଥ ମନ୍ତ୍ରଣାଳୟ ରବିବାର ନ୍ୟାଶନାଲ ଇନଫ୍ରାଷ୍ଟ୍ରକଚର ପାଇପ ଲାଇନ ସମ୍ପର୍କରେ ନିଜ ଟୁଇଟର ହ୍ୟାଣ୍ଡେଲରେ ସୂଚନା ଦେଇଛି। ଉଭୟ କ୍ୟାମ୍ପେନ ଆସନ୍ତା ୨୯ ଯାଏ ଚାଲିବ ବୋଲି ଅଧିକାରୀ କହିଛନ୍ତି।
