ନୂଆଦିଲ୍ଲୀ,୧୯-୧: ଫେବୃୟାରୀ ପହିଲାରେ ସାଧାରଣ ବଜେଟ ଆସିବାକୁ ଥିବା ବେଳେ ଏଥିରେ ବିଭିନ୍ନ ଟିକସ ରିହାତି ମିଳିପାରେ ବୋଲି ବଜାର ବିଶେଷଜ୍ଞ ମତ ରଖିଛନ୍ତି। ବେତନଭୋଗୀ ଏବଂ କର୍ପୋରେଟ ଏହି ବଜେଟକୁ ନେଇ ଅନେକ ଆଶାବାଦୀ ଅଛନ୍ତି। ମାତ୍ର ବଜେଟରେ ସାଲାରୀକ୍ଲାସ ବା ବେତନଭୋଗୀ ଶ୍ରେଣୀଙ୍କୁ ଅଧିକ ଫାଇଦା ମିଳିବ ବୋଲି ବଜାର ବିଶେଷଜ୍ଞ ଆଶାବାଦୀ। ୨୦ରୁ ୩୦% ଟିକସ ସ୍ଲାବରେ ରହିଥିବା ଟିକସଦାତାଙ୍କ ଲାଗି ସ୍ବତନ୍ତ୍ର ସ୍କିମ ଆସିପାରେ। ଏହା ଉପରେ ଫ୍ଲାଟ୍ ଟିକସ ହାର ଲାଗୁ କରାଯାଇପାରେ। ଏହାବାଦ ବାସଗୃହ ଋଣ ଉପରେ ପ୍ରଦାନ କରାଯାଉଥିବା ସୁଧ କ୍ଷେତ୍ରରେ ରିହାତି ସୀମା ବଢିବା ନେଇ ଆଲୋଚନା କରାଯାଉଛି।
ଏକ ଗଣମାଧ୍ୟମ ରିପୋର୍ଟ ମୁତାବକ, ୨୦ରୁ ୩୦% ଟିକସ ପ୍ରଦାନ କରୁଥିବା ଟିକସଦାତାଙ୍କ ଲାଗି ୧୫ରୁ ୧୮% ଫ୍ଲାଟ ଟିକସ ହାର ଲାଗୁ କରାଯାଇପାରେ। ବର୍ତ୍ତମାନ ୨.୫ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଟିକସ ମୁକ୍ତ ରହିଛି। ୨.୫ରୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ ବର୍ତ୍ତମାନ ୫% ଟିକସ ଲାଗୁ ହେଉଛି। ସେହିଭଳି ୫ରୁ ୧୦ ଲକ୍ଷ ଟଙ୍କା ଉପରେ ୨୦%, ୧୦ ଲକ୍ଷରୁ ଉର୍ଦ୍ଧ୍ୱ ଆୟ ଉପରେ ୩୦% ଟିକସ ହାର ଲାଗୁ ହେଉଛି। ସେହିଭଳି ଟିକସ ଯୁକ୍ତ ଆୟ ଉପରେ ଅଲଗା ୪% ସେସ୍ ମଧ୍ୟ ଲାଗୁ କରାଯାଉଛି। ୫୦ ଲକ୍ଷ ଟଙ୍କାରୁ ଉର୍ଦ୍ଧ୍ୱ ଆୟ କରୁଥିବା ବ୍ୟକ୍ତି ବିଶେଷଙ୍କୁ ସୁପରରିଚ ବର୍ଗରେ ରଖାଯାଇଥିବା ବେଳେ ସେମାନଙ୍କ ଉପରେ ସରଚାର୍ଜ ମଧ୍ୟ ଲାଗୁ ହୋଇଥାଏ। ଏହାବାଦ ୮୦ସିରେ ରିହାତି ସୀମା, ବାସଗୃହ ଋଣ ମୂଳ ଅର୍ଥ ଉପରେ ଅଧିକ ରିହାତି ଏବଂ ବାସଗୃହ ଋଣ ଟିକସ ଉପରେ ପ୍ରଦାନ କରାଯାଉଥିବା ରିହାତି ମଧ୍ୟ ପ୍ରଦାନ କରାଯାଇପାରେ।