ନୂଆଦିଲ୍ଲୀ,୧୫।୬: ଜୁନ୍ ୧୭ରୁ ଆରମ୍ଭ ହେବାକୁ ଥିବା ସଂସଦର ବଜେଟ୍ ଅଧିବେଶନରେ ଚଳିତଥର କୌଣସି ପୂର୍ବତନ ପ୍ରଧାନମନ୍ତ୍ରୀ ରହିବେ ନାହିଁ। ଦେଶରେ ଦୁଇଜଣ ପୂର୍ବତନ ପ୍ରଧାନମନ୍ତ୍ରୀ ଅଛନ୍ତି। ସେମାନେ ହେଉଛନ୍ତି ମନମୋହନ ସିଂ ଏବଂ ଦେବଗୌଡ଼ା। ଦେବଗୌଡ଼ା ଲୋକ ସଭା ନିର୍ବାଚନରେ ପରାଜିତ ହୋଇଛନ୍ତି। ସେହିପରି ମନମୋହନ ସିଂଙ୍କ କାର୍ଯ୍ୟକାଳ ଜୁନ୍ ୧୪ରେ ଶେଷ ହୋଇଛି। ସେ ୧୯୯୧ଠାରୁ ଆସାମରୁ ରାଜ୍ୟ ସଭାକୁ ଗତ ୨୮ ବର୍ଷ ଧରି ନିର୍ବାଚିତ ହୋଇ ଆସୁଥିଲେ। ମନମୋହନଙ୍କ ସହିତ ଏସ୍.କୁଜୁରଙ୍କ କାର୍ଯ୍ୟକାଳ ମଧ୍ୟ ଶେଷ ହୋଇଛି। ଫଳରେ ଏବେ ଆସାମରେ ୨ ରାଜ୍ୟ ସଭା ଆସନ ଖାଲିପଡ଼ିଛି। ପୂର୍ବରୁ ଏଠାରେ ମେ ମାସରେ ହୋଇଥିବା ରାଜ୍ୟସଭା ନିର୍ବାଚନରେ କଂଗ୍ରେସ ଏବଂ ଏଆଇୟୁଡିଏଫ୍ କୌଣସି ପ୍ରାର୍ଥୀ ଦେଇ ନ ଥିଲେ। ଫଳରେ ଭାଜପା ଏବଂ ଆସାମ ଗଣପରିଷଦ ପ୍ରାର୍ଥୀ ରାଜ୍ୟ ସଭାକୁ ନିର୍ବାଚିତ ହୋଇଥିଲେ। ଏଠାରେ ୧୨୬ ବିଧାନସଭା ଆସନ ମଧ୍ୟରେ କଂଗ୍ରେସର ୨୬ ଜଣ ଏବଂ ଏଆଇୟୁଡିଏଫ୍ର ୧୩ ଜଣ ବିଧାୟକ ଅଛନ୍ତି। ଭାଜପାର ଏଠାରେ ୬୦ ଜଣ ବିଧାୟକ ରହିଛନ୍ତି।