ରଣପୁର,୬।୧୨(ସ୍ବ.ପ୍ର.): ନୟାଗଡ଼ ଜିଲା ରଣପୁର ଥାନା ବଜ୍ରକୋଟ ଗ୍ରାମରେ ଗୁରୁବାର ସନ୍ଧ୍ୟାରେ କଙ୍ଗାରୁ କୋର୍ଟ କରାଯାଇ ଭଗବାନ ଦଳେଇଙ୍କ ଘରୁ ଲୁଟ୍ ହୋଇଛି। ଘରୁ ୭ହଜାର ଟଙ୍କା, ଚାଉଳ, ଗହମ ଆଦି ଖାଦ୍ୟ ସାମଗ୍ରୀ ଲୁଟ୍ କରିବା ସହ ତାଙ୍କର ଘର ଭାଙ୍ଗି ଦିଆଯାଇଥିବା ସେ ରଣପୁର ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପାଇବା ପରେ ଥାନା ପକ୍ଷରୁ ମାମଲାକୁ ଦର୍ପନାରାୟଣପୁର ଫାଣ୍ଡିକୁ ପଠାଇ ଦିଆଯାଇଥିବା ଭଗବାନ କହିଛନ୍ତି।
ଗ୍ରାମରେ ଏକ ରାସ୍ତା କାର୍ଯ୍ୟ ଆରମ୍ଭ ହୋଇଛି। ଏଥିପାଇଁ ସରକାରୀସ୍ତରରେ ମାପଚୂପ କରାଯାଇ ରାସ୍ତା ଚିହ୍ନଟ କରାଯାଇଥିଲା। ଏଥିନେଇ କିଛି ଲୋକଙ୍କ ଘର ମଧ୍ୟ ଭଙ୍ଗା ଯାଇଥିଲା। ହେଲେ ଭଗବାନଙ୍କ ଘର ମାପଚୂପରେ ଆସି ନ ଥିଲା। ହେଲେ ରାସ୍ତା ଯିବ କହି ତାଙ୍କ ଘରକୁ ମଧ୍ୟ ଭାଙ୍ଗିବାକୁ କୁହାଯାଇଥିଲା। ରାସ୍ତା ନ ଯାଇ କାହିଁକି ଘର ଭାଙ୍ଗିବି ବୋଲି ଭଗବାନ ପ୍ରଶ୍ନ କରିଥିଲେ। ଏଣୁ କଙ୍ଗାରୁ କୋର୍ଟ ବସାଇ ତାଙ୍କୁ ପ୍ରଥମେ ବାସନ୍ଦ କରାଯାଇ ଘର ଭାଙ୍ଗିଦିଆଯାଇଥିବା ଭଗବାନ କହିଛନ୍ତି। ଏନେଇ ସେ ଅଭିଯୋଗ କରିବାକୁ ଘରଠାରୁ ୪ କିମି ଦୂର ରଣପୁର ଥାନାକୁ ଯାଇଥିବା ବେଳେ ସେଠାରୁ ୯ କିମି ଦୂରରେ ଥିବା ଦର୍ପନାରାୟଣପୁର ଫାଣ୍ଡିରେ ଅଭିଯୋଗ କରିବାକୁ ଯିବାକୁ ପଠାଇ ଦିଆଯାଇଥିବା ସେ କହିଛନ୍ତି। ତେବେ ଶୀତଦିନେ ସେମାନଙ୍କ ପରିବାର ଗଛତଳେ ଆଶ୍ରୟ ନେଇଥିବା ଜଣାପଡ଼ିଛି।