ପାଟଣା,୨୫ା୫(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ଚିନାବାଳିପଶି ପଞ୍ଚାୟତ କେତାଙ୍ଗ ଗ୍ରାମରେ ଗୁରୁବାର ଅପରାହ୍ନରେ ବଜ୍ରପାତରେ ଜଣେ ବିବାହିତା ମହିଳାଙ୍କ ମୃତ୍ୟୁ ଘଟିଛି। ମହିଳା ଜଣକ ହେଉଛନ୍ତି ଈଶ୍ୱର ମହାନ୍ତଙ୍କ ସ୍ତ୍ରୀ ଅହଲ୍ୟା ମହାନ୍ତ,(୪୬)। ସୂଚନା ଅନୁଯାୟୀ ଅହଲ୍ୟା ଘରଠାରୁ ୧୦୦ମିଟର ଦୂର ବଗିଚାରେ କାମ କରୁଥିବା ବେଳ ବଜ୍ରପାତରେ ଘଟଣାସ୍ଥଳରେ ମୃତ୍ୟୁବରଣ କରିଥିଲେ। ସେ ଘଟଗାଁ ବ୍ଲକ ମଶିଣାବିଲା ପଞ୍ଚାୟତ ବରବେଡା ଗ୍ରାମରେ ଅଙ୍ଗନଓ୍ବାଡି କର୍ମୀ ଭାବେ କାର୍ଯ୍ୟ କରୁଥିଲେ। ଅନୁରୂପ ଭାବେ ଏହି ବ୍ଲକ ସରାସକୋଲା ପଞ୍ଚାୟତ ସରାସକୋଲା ଗ୍ରାମରେ ଗୁରୁବାର ଅପରାହ୍ନରେ ବଜ୍ରପାତରେ ଜଣେ ୧୮ବର୍ଷୀୟ ଯୁବକ ଗୁରୁତର ହୋଇ ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ। ସେ ହେଉଛନ୍ତି ଦାଶରଥି ଦେହୁରୀଙ୍କ ପୁଅ ବିକାଶ କୁମାର ଦେହୁରୀ ।
ଅବସ୍ଥା ସଙ୍କଟାପନ୍ନ ହେବାରୁ ବିକାଶଙ୍କୁ ୧୦୮ ଆମ୍ବୁଲାନ୍ସ ଯୋଗେ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରାଯାଇଛି। ସୂଚନା ଅନୁଯାୟୀ ଗୁରୁବାର ପୂର୍ବାହ୍ନରେ ସରାସକୋଲା ଅଞ୍ଚଳରେ ବଜ୍ରପାତ ହୋଇଥିଲା। ବିକାଶ ଘରେ ଥିବା ବେଳେ ବଜ୍ରପାତର ଶିକାର ହୋଇ ଗୁରୁତର ହୋଇଛନ୍ତି। ଡାକ୍ତର ସୌମ୍ୟକାନ୍ତ ସୂତାରଙ୍କ ସୂଚନା ଅନୁଯାୟୀ ବଜ୍ରପାତରେ ବିକାଶଙ୍କ ଶରୀର ୩୦ପ୍ରତିଶତ ପ୍ରଭାବିତ ହୋଇଛି।