ପାଲଲହଡ଼ା, ୧୮ା୭(ଡି.ଏନ.ଏ.) – ଅନୁଗୋଳ ଜିଲା ପାଲଲହଡ଼ା ବ୍ଲକ ନଗିରା ପଞ୍ଚାୟତ ବାଲିବାହାଳ ଗ୍ରାମରେ ବୁଧବାର ଅପରାହ୍ନରେ ବଜ୍ରପାତ ଘଟି ୨୩ ଗୋରୁଙ୍କ ମୃତ୍ୟୁ ଘଟିଛି। ଅପରାହ୍ନ ପ୍ରାୟ ୨ଟାରେ ପାଲଲହଡ଼ାର ବିଭିନ୍ନ ଅଞ୍ଚଳରେ ଝିପିଝିପି ବର୍ଷା ସାଙ୍ଗକୁ ପ୍ରବଳ ଘଡଘଡି ହୋଇଥିଲା। ଏହି ସମୟରେ ଗୋରୁ ଗୋଠରେ ଚରୁଥିବା ୨୩ଟି ଗାଈ ବଜ୍ରପାତ ଯୋଗୁ ସେଠାରେ ଟଳି ପଡିଥିଲେ। ଗୋରୁ ପଲରେ ଗ୍ରାମର ମୁଣ୍ଡାରୀ ନାୟକଙ୍କ ୨ଟି, ଭୁବନ ପ୍ରଧାନଙ୍କ ୩, କପିଳ ନାୟକଙ୍କ ୨, ଦାସୀ ପ୍ରଧାନଙ୍କ ୧, ଦୁର୍ଯ୍ୟୋଧନ ଦେହୁରୀଙ୍କ ୧, ଅମିନ ଠାକୁରଙ୍କ ୬, ଘାସିରାମ ଗିରିଙ୍କ ୪, ସାହେବ ନାଏକଙ୍କ ୨, କାଳିଆ ବାରିକଙ୍କ ୨ଟି ଗୋରୁଥିଲେ ବୋଲି ଜଣାପଡିଛି I ଘଟଣାସ୍ଥଳରେ ସ୍ଥାନୀୟ ସରପଞ୍ଚ ପିତ୍ତନ ବାରିକ ଏବଂ ପଞ୍ଚାୟତ ନିର୍ବାହୀ ଅଧିକାରୀ ପ୍ରଶାନ୍ତ କୁମାର ସାହୁ ପହଞ୍ଚିଥିଲେ। ପରେ ପାଲଲହଡା ଉପଜିଲାପାଳ ଅଜିତ କୁମାର ପ୍ରଧାନ ସ୍ଥାନୀୟ ତହସିଲଦାର ଏବଂ ଆର୍ଆଇଙ୍କୁ ଘଟଣାର ତଦନ୍ତ ପାଇଁ ପଠାଇଥିଲେ। ରିପୋର୍ଟ ଆସିବା ପରେ ପଦକ୍ଷେପ ନିଆଯିବ ବୋଲି ପ୍ରଧାନ କହିଛନ୍ତି।