ମାଲକାନଗିରି,୨୩।୧୦(ଡି.ଏନ୍.ଏ.): ପରିଣତ ବୟସରେ ମାତାପିତା ଭଲରେ ଗଣ୍ଡେ ଖାଇବା, ରହିବା ପାଇଁ ପରିବାରରେ ପୁଅ ବୋହୂ, ନାତି ନାତୁଣୀଙ୍କ ହାତକୁ ଚାହିଁଥାନ୍ତି। କିନ୍ତୁ ଜଣେ ୮୦ ବର୍ଷର ବୃଦ୍ଧ ନିଜେ ବଞ୍ଚିବା ପାଇଁ କିପରି ସଂଘର୍ଷ କରି ପରିବାରର ଭରଣପୋଷଣ କରୁଛନ୍ତି ତାହା ଦେଖିବାକୁ ମିଳିଛି ମାଲକାନଗିରି ସହରରେ। ଜିଲା ସଦର ମହକୁମା ଚିଦାନନ୍ଦ ସାହିର ଦୁଃଖୁ ଗୌଡ଼(୮୦)। ଆଖିକୁ ଭଲ ଦେଖା ଯାଏ ନାହିଁ କିମ୍ବା କାନକୁ ଶୁଭେ ନାହିଁ। ସ୍ତ୍ରୀ ଜାନକୀ ଗୌଡ଼ (୭୮)ଙ୍କର ମଧ୍ୟ ସେହି ଅବସ୍ଥା। କାମଧନ୍ଦା କରି ନ ପାରି ରୋଗାଗ୍ରସ୍ତ ଅବସ୍ଥାରେ ଏକ ଝୁମ୍ପୁଡି ଘରେ ପଡ଼ି ରହିଛନ୍ତି। ଦୁଃଖୁ ପ୍ରତିଦିନ ସକାଳୁ ସହରରେ ଏଣେତେଣେ ପଡ଼ିଥିବା ଅଦରକାରୀ ତଥା ବର୍ଜ୍ୟବସ୍ତୁ ସଂଗ୍ରହ କରି ଗୋଟିଏ ଜାଗାରେ ଠୁଳ କରି ରଖନ୍ତି। ବସ୍ତାରେ ପୂରାଇ ମୁଣ୍ଡରେ ବୋହିବା ନିମନ୍ତେ ବଳ ନ ଥିବାରୁ ଏକ ରଶି ବାନ୍ଧି ଘୋଷାଡ଼ି ଘୋଷାଡି ନେଇ ବ୍ୟବସାୟୀଙ୍କୁ ବିକ୍ରି କରିଥାନ୍ତି। ଏଥିରେ ଦିନକୁ ୩୦ରୁ ୪୦ଟଙ୍କା ରୋଜଗାର କରୁଥିବା ଦୁଃଖୁ ପ୍ରକାଶ କରିଛନ୍ତି। ତାଙ୍କ କହିବା ଅନୁଯାୟୀ, ବଡ଼ପୁଅ ଡମୁ ଦୀର୍ଘ ୨୦ ବର୍ଷ ତଳୁ ପାଗଳ ହୋଇ କେଉଁଆଡ଼େ ପଳାଇଛନ୍ତି। ୩/୪ବର୍ଷ ବହୁତ ଖୋଜାଖୋଜି କରିଥିଲେ ମଧ୍ୟ ତାଙ୍କର ଠିକଣା ମିଳି ନ ଥିଲା। ସାନପୁଅ ଶିବ ବିବାହ ପରେ ନିଜ ସ୍ତ୍ରୀକୁ ନେଇ ଅଲଗା ରହୁଛନ୍ତି। ଅଟୋ ଚଳାଇ ଯାହା କିଛି ରାଜଗାର କରୁଥଲେ ସେ ବର୍ତ୍ତମାନ ବିଛଣାରେ। ଦୁଇଜଣ ନାତି ଓ ଗୋଟିଏ ନାତି ସାନପୁଅ ପାଖରେ ରହୁଥିବାବେଳେ ବଡ଼ନାତି ରୋହିତ ଦଶମ ଶ୍ରେଣୀରେ ପାଠ ପଢୁଛନ୍ତି। ସରକାର ଦୁଃଖୁଙ୍କୁ ଖଣ୍ଡେ ବାସଗୃହ ଏବଂ ଚିକିତ୍ସା ସୁବିଧା ଯୋଗାଇ ଦେବାକୁ ସେ ନିବେଦନ କରିଛନ୍ତି।