ପୋଲସରା,୨୯ା୧୧- ଗଞ୍ଜାମ ଜିଲା ପୋଲସରା ବ୍ଲକ ବେଲଙ୍ଗା ପଞ୍ଚାୟତ ମନଶିଳା ଗ୍ରାମର ପଣ୍ଡିତ ନାହାକଙ୍କ ମବଡ଼ପୁଅ କେଶବ ତାଙ୍କ ସାନ ଭାଇ କୁନାଙ୍କୁ ଗୁରୁବାର ସକାଳେ ଘରୋଇ କଳିକୁ କେନ୍ଦ୍ରକରି କୁରାଢ଼ିରେ ଆକ୍ରମଣ କରିବାରୁ ତାଙ୍କର ମୃତ୍ୟୁ ଘଟିଛି। ନାହାକଙ୍କର ୩ ପୁଅ। ବଡ଼ ହେଲେ କେଶବ, ମୁନା ଓ ସାନପୁଅ କୁନା। କେଶବଙ୍କ ସ୍ତ୍ରୀ ଝିଲି ଏବଂ କୁନାଙ୍କ ମଧ୍ୟରେ ବୁଧବାର ସନ୍ଧ୍ୟାରେ କୌଣସି କାରଣକୁ ନେଇ ପାଟିତୁଣ୍ଡ ହୋଇଥିଲା। ଏହାକୁ ନେଇ ଝିଲି, ଶ୍ୱଶୁର ପଣ୍ଡିତ ଓ ଶାଶୁ ଶାନ୍ତି ମିଶି ଥାନାରେ ଅଭିଯୋଗ କରିଥିଲେ। ପୋଲିସ ରାତିରେ ଆସି ସମସ୍ତଙ୍କୁ ବୁଝାଶୁଝା କରି ଯାଇଥିବା ବେଳେ ଗୁରୁବାର ସକାଳ ୭ଟାରେ ସାନଭାଇ କୁନାଙ୍କୁ ବଡ଼ଭାଇ କେଶବ ରାଗିଯାଇ କୁରାଢ଼ିରେ ଆକ୍ରମଣ କରିଥିଲେ। ସେ ଗୁରୁତର ହୋଇପଡିଥିଲେ। ପୋଲିସ ଖବର ପାଇ ଆମ୍ବୁଲାନ୍ସରେ ତାଙ୍କୁ ପୋଲସରା ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ସେଠାରେ ଅବସ୍ଥା ଗୁରୁତର ହେବାରୁ କୁନାଙ୍କୁ ବ୍ରହ୍ମପୁର ବଡ଼ ମେଡିକାଲ ପଠାଇଥିଲେ। ସେଠାରେ ଡ଼ାକ୍ତର ତାଙ୍କୁ ମୃତ ଘୋଷଣା କରିଥିଲେ। କେଶବଙ୍କୁ ପୋଲିସ ଥାନାରେ ଅଟକ ରଖିଛି।
