ବାରିପଦା ଅଫିସ,୨୫।୧୦: ମୟୂରଭଞ୍ଜ ଜିଲାରେ ଲଘୁଚାପ ଜନିତ ବର୍ଷା ଲାଗି ରହିଛି। ଲଗାଣ ବର୍ଷା ଯୋଗୁ ଘରୁ ବାହାରିବା ମଧ୍ୟ ମୁସ୍କିଲ ହୋଇପଡ଼ୁଛି। ଜିଲାର ବଡ଼ସାହିରେ ଶୁକ୍ରବାର ସୁଦ୍ଧା ସର୍ବାଧିକ ୧୦୮ ମିମି ବର୍ଷା ରେକର୍ଡ ହୋଇଥିବାବେଳେ ବିଜାତଳାରେ ସର୍ବନିମ୍ନ ୨୫ ମିମି ବର୍ଷା ରେକର୍ଡ ହୋଇଛି। ତେବେ ବର୍ଷାକୁ ଦୃଷ୍ଟିରେ ରଖି ଶୁକ୍ରବାର ଜିଲାର ସମସ୍ତ ବିଦ୍ୟାଳୟ ବନ୍ଦ କରିବାକୁ ଜିଲାପାଳ ବିନିତ ଭରଦ୍ୱାଜ ନିର୍ଦ୍ଦେଶ ଦେଇଛନ୍ତି। ଜିଲାର ସମସ୍ତ ପ୍ରାଥମିକ ବିଦ୍ୟାଳୟ, ଉଚ୍ଚ ବିଦ୍ୟାଳୟ, କେନ୍ଦ୍ରୀୟ ବିଦ୍ୟାଳୟ, ଆଦର୍ଶ ବିଦ୍ୟାଳୟ ସମେତ ବିଭିନ୍ନ ବିଦ୍ୟାଳୟକୁ ବନ୍ଦ ରଖିବା ପାଇଁ ଜିଲା ଶିକ୍ଷାଧିକାରୀ ଧୃବ ଚରଣ ବେହେରା ସମସ୍ତ ସ୍କୁଲ କର୍ତ୍ତୃପକ୍ଷଙ୍କୁ ଅବଗତ କରାଇଛନ୍ତି। ଶୁକ୍ରବାର ମଧ୍ୟାହ୍ନ ସୁଦ୍ଧା କୌଣସିଠାରେ ନଦୀ ଜଳ ବିପଦ ସଙ୍କେତ ପାର କରି ନ ଥିବା ଜିଲା ଜରୁରୀ ଅଧିକାରୀ ଜଣାଇଛନ୍ତି।
ସୂଚନାନୁଯାୟୀ, ଗୁରୁବାର ସକାଳ ୮ ଟାରୁ ଶୁକ୍ରବାର ସକାଳ ୮ଟା ମଧ୍ୟରେ ମୋରଡ଼ାରେ ୭୩ ମିମି, ରାସଗୋବିନ୍ଦପୁରରେ ୭୮ମିମି, କୁଳିଅଣାରେ ୬୭ ମିମି, ସାରସକଣାରେ ୪୫ମିମି, ଶୁଳିଆପଦାରେ ୪୪.୩ ମିମି, ବାଙ୍ଗିରିପୋଷିରେ ୬୫.୨ମିମି, ବାରିପଦାରେ ୬୫ମିମି, ଖୁଣ୍ଟାରେ ୯୦.୪ମିମି, ଗୋପବନ୍ଧୁନଗରରେ ୯୦.୪ମିମି, ଉଦଳାରେ ୧୦୦.୨ମିମି, କପ୍ତିପଦାରେ ୭୮ମିମି, ବିଶୋଇରେ ୩୪ମିମି, ବିଜାତଳାରେ ୨୫ ମିମି, ରାଇରଙ୍ଗପୁରରେ ୪୨ମିମି, କୁସୁମିରେ ୪୨ମିମି, ଜାମଦାରେ ୫୪ମିମି , ବହଲଦାରେ ୪୨.୨ମିମି, ତିରିଂରେ ୫୫.୨ମିମି, ଯଶିପୁରରେ ୩୮.୯ମିମି, କରଞ୍ଜିଆରେ ୪୪ମିମି, ଠାକୁରମୁଣ୍ଡାରେ ୩୪ମିମି, ଶୁକୃଳୀରେ ୩୯ମିମି, ରରୁଆଁରେ ୪୨ମିମି, ଶାମାଖୁଣ୍ଟାରେ ୪୪ମିମି, ବଡସାହିରେ ୧୦୮ମିମି ଓ ବେତନଟିରେ ୭୮ମିମି ବର୍ଷା ରେକର୍ଡ କରାଯାଇଛି।