ଦିଗପହଣ୍ଡି,୨୬ା୧୦(ଡି.ଏନ.ଏ.)-ଦିଗପହଣ୍ଡି ବ୍ଲକ ବଡ଼ଡୁମ୍ବୁଳା ଗାଁରେ ସୀତାଦେଈ ପାହାଡର ଝରଣା ପାଣି ପଶିଯିବାରୁ ପ୍ରାୟ ୨ ଶହ ପରିବାର ଜଳବନ୍ଦୀ ଅଛନ୍ତି। ବିଡିଓ ହଳଧର ଶବର, ବ୍ଲକ ସହକାରୀ ଯନ୍ତ୍ରୀ ଇଂ.ଗଙ୍ଗାଧର ଲେଙ୍କା ଶୁକ୍ରବାର ଅପରାହ୍ନରେ ଗାଁରେ ପହଞ୍ଚତ୍ ସବିଶେଷ ତଥ୍ୟ ସଂଗ୍ରହ କରି ଫେରିଛନ୍ତି। ଗୁରୁବାର ରାତିରେ ପ୍ରବଳ ବର୍ଷା ଯୋଗୁ ଗାଁ ନିକଟରେ ଥିବା ଝରଣାର ବଢିପାଣି ପଞ୍ଚାୟତ ଅଧୀନ ୱାର୍ଡ ନଂ. ୧୫ ଓ ୧୬ ଅନ୍ତର୍ଗତ ତଳ ସାହିର ତବତ ସ୍ବାଇଁ, ନରସିଂହ ସ୍ବାଇଁ, ପ୍ରଶାନ୍ତ ସ୍ବାଇଁ, ଟୁନା ସ୍ବାଇଁ, ପୂର୍ଣ୍ଣଚନ୍ଦ୍ର ସାହୁ, ଦୁର୍ଯ୍ୟୋଧନ ସାହୁ, ମୋହନ ଜାନୀ, ଗାଣ୍ଡୁ ଜାନୀଙ୍କ ଘରେ ପଶି ଯାଇଛି। ସନ୍ଧ୍ୟା ସୁଦ୍ଧା ବ୍ଲକ ପ୍ରଶାସନ କିମ୍ବା ପଞ୍ଚାୟତ ପକ୍ଷରୁ କୌଣସି ପ୍ରକାର ସହାୟତା ମିଳି ନ ଥିବା ସାମାଜିକ କର୍ମୀ ସନ୍ତୋଷ ଜେନା କହିଛନ୍ତି। ପଞ୍ଚାୟତ ପକ୍ଷରୁ ପମ୍ପ ଲଗାଇ ପାଣି ନିଷ୍କାସନ କରାଯାଇଥିବା ସରପଞ୍ଚ ଲକ୍ଷ୍ମୀ ସେଠୀ କହିଛନ୍ତି। ପ୍ରାୟ ୨ ଫୁଟ ଉଚ୍ଚରେ ପାଣି ପ୍ରବାହିତ ହେଉଥିବା ବେଳେ ବହୁ ପରିବାରଙ୍କ ଘରେ ଚୁଲି ଲାଗିନି। ସେହିପରି ପଞ୍ଚାୟତ ଅଧୀନ ଅନୁସୂଚିତ ଜନଜାତି ବହୁଳ ମଳୁକୁଟପଲ୍ଲୀ ଓ ଛଣବଗଡ ଗାଁକୁ ସଂଯୋଗ କରୁଥିବା ପୂର୍ବରୁ ରାସ୍ତାର କଲଭର୍ଟଟି ପାହାଡୀ ନାଳ ପାଣିରେ ବୁଧବାର ଅପରାହ୍ନରେ ଭାସିଯିବାରୁ ଗତ ୩ ଦିନ ହେଲା ୨ଗଁା ବାହ୍ୟ ଜଗତରୁ ବିଚ୍ଛିନ୍ନ ହୋଇପଡ଼ିଛି। ରାସ୍ତା ମଝିରେ ୩ ଫୁଟ ଉଚ୍ଚରେ ପାଣି ପ୍ରବାହିତ ହେଉଥିବାରୁ ଲୋକଙ୍କ ଯାତାୟାତରେ ବାଧା ସୃଷ୍ଟି ହୋଇଛି। ସହଦେବ ଟିକରପଡା ପଞ୍ଚାୟତ ଜୁଆଣପଲ୍ଲୀର ଦୁର୍ଯ୍ୟ ଗୌଡଙ୍କ ଛପର ଘର ବର୍ଷାରେ ଗୁରୁବାର ରାତିରେ ସମ୍ପୂର୍ଣ୍ଣ ଭାଙ୍ଗି ତାଙ୍କ ପରିବାର ବିଦ୍ୟାଳୟ ଘରେ ଆଶ୍ରୟ ନେଇଛନ୍ତି। ବିପନ୍ନ ପରିବାରଙ୍କୁ ପଲିଥିନ ଜରିପାଲ ଯୋଗାଇବାକୁ ଉପସ୍ଥିତ ଭୀଷ୍ମଗିରି ରାଜସ୍ବ ନିରୀକ୍ଷକ ଶ୍ରୀକାନ୍ତ ଦୋରାଙ୍କୁ ତହସିଲଦାର ନିର୍ଦ୍ଦେଶ ଦେଇଥିବା କହିଛନ୍ତି।